توق ىشەكتىڭ جارالى قابىنۋى

بەلگىلەرى

ناۋقاستىڭ ءىشى اۋىرادى، ءىش ءوتۋ مەن ءىش قاتۋ الماسىپ وتىرادى، ءىش جەلدەنەدى. ءىشتىڭ تومەنگى جانە ءبۇيىر بەلىكتەرىندە تولعاق ءتارىزدى اۋىرۋ بىلىنەدى. ول كوبىنە تاماقتانىپ بولعاننان كەيىن 2-3 ساعاتتان سوڭ بايقالادى. ورگانيزمدە اقۋىزدار دۇرىس ىدىراماعاندىقتان، ۋلانۋ كۇشەيىپ، باس اۋىرادى، السىزدىك پايدا بولادى. ءناجىس شىرىشتى نەمەسە قان ارالاس. جۇرەگى اينىپ، قۇسادى، اۋىز ءىشى كۇيىپ اۋىرىپ، تاماققا تابەتى ناشارلايدى. ول ورتالىق جۇيكە جۇيەسىنە دە ىقپالىن تيگىزەدى، سونىڭ سالدارىنان ۇيقى دا بۇزىلادى.

ەگەر دەر كەزىندە دارىگەرگە قارالماسا، ول توق ىشەكتىڭ ويىق جارالى اۋرۋىنا ۇلاسادى. ءىشتى قول ساۋساقتارىمەن تەكسەرىپ كورگەن كەزدە توق ىشەك تۇسى قاتتى اۋىرادى، باۋىر مەن كوكباۋىر كولەمىنىڭ ۇلعايعانى بايقالادى. اۋرۋ ۋشىعا كەلە ناۋقاس ارىقتاي تۇسەدى، قانى ازايىپ، قانازدىق پايدا بولادى، تروفيكالىق وزگەرىستەر دە بىلىنەدى. كوتەنشەكتە دە، اسىرەسە ۇلكەن دارەتكە وتىرعان كەزدە، اۋىرسىنۋلار پايدا بولادى. اۋرۋدى ناقتى انىقتاۋ ءۇشىن ناجىسكە تالداما جاسالادى، رەنتگەندىك جانە ەندوسكوپيالىق زەرتتەۋلەر جاسالادى، كلينيكالىق كورىنىستەرگە دە مۇقيات نازار اۋدارىلادى. كوپرولوگيالىق زەرتتەۋ جۇرگىزگەن كەزدە قان مەن شىرىش تابىلادى. رەنتگەنولوگيالىق زەرتتەۋ جۇرگىزگەندە توق ىشەكتىڭ سپازمى، شىرىشتى قابىق بەدەرىنىڭ بۇزىلعانى بايقالادى. رەكتورومانوسكوپيا ارقىلى تەكسەرگەندە ويىق جارا مەن شىرىشتى قابىق گيپەرەمياسى انىقتالادى.

ەمى

الدىمەن، اۋرۋدىڭ سەبەبىن انىقتاپ الۋ كەرەك. ەمدى سوعان ساي باستايدى. تاماقتى كۇنى بويى بىرنەشە ءبولىپ قابىلداۋ كەرەك بولادى. ديەتالىق ەمگە ەرەكشە كوڭىل بولىنەدى. №4 ديەتا تاعايىندالادى. سۇيىق سورپا، ۇنتالعان بوتقا، سۇزبە، كيسەل، ءتاتتى ەمەس جەمىس-جيدەك شىرىندارى — نەگىزگى تاماق. ەتتى ازايتادى. ەگەر ءىش قاتاتىن بولسا، مايدى شەكتەۋ كەرەك، ويتكەنى ولار ىشەكتىڭ جيىرىلۋىن تومەندەتەدى جانە گازدىڭ ءتۇزىلۋىن قامتاماسىز ەتەتىن كومىرسۋلاردى ازايتادى. لاكتازا فەرمەنتىنىڭ تاپشىلىعى بايقالعاندىقتان، ءسۇت پەن ءسۇت ونىمدەرىن شەكتەگەن ءجون. ول اسقىنسا، بىر-ەكى كۇندەي تاماقتى ازايتىپ، اش جۇرۋگە دە بولادى. اۋرۋعا جاقپايتىن تاماقتى ءتىپتى پايدالانباۋ كەرەك.

دارى-دارمەكپەن ەمدى ىشەكتەگى شارتتى-پاتوگەندى فلورانىڭ سەزىمتالدىعىن انىقتاعاننان كەيىن تاعايىندايدى. سوزىلمالى جۇقپالاردان بولعان بولسا، قابىنۋعا قارسى قولدانىلاتىن سۋلفانيلاميدتەر مەن انتيبيوتيكتەر قولدانىلادى. ىشەكتىڭ ءتۇيىلۋىن، اۋىرۋىن كەتىرۋ ءۇشىن سپازموليتيكتەر، مىسالى، اتروپين، پاپاۆەرين، نو-شپا، بەللادونا ت.ب. تاعايىندايدى. دەرتتىك كۇشەنۋ پايدا بولسا، وعان تۇيمەداق تۇندىرماسىمەن، كاليي پەرمانگاناتىنىڭ ءالسىز ەرىتىندىسىمەن، انتيپيرينمەن ميكروكليزما جاسايدى. مايمەن، مىسالى شىرعاناق، يتمۇرىن، بالىق مايلارىمەن جاسالعان كليزما جاقسى كومەكتەسەدى قابىنۋعا قارسى گيدروكورتيزونمەن دە كليزما جاساۋعا بولادى. مىندەتتى تۇردە ءارتۇرلى دارەۋمەندەر بەرىلەدى. اسىرەسە ۆ توبى دارۋمەندەرى، رر، س، ا دارۋمەندەر كوبىرەك قولدانىلادى.

ەگەر اللەرگيالىق كوليت بولسا، انتيگيستاميند پرەپاراتتار (پيپولفەي، ديمەدرول)، ستەرويدتى گورموندار (پرەدنيزولون، دەكسامەتازون، تريامسينولون تاعايىندالادى.

توق ىشەك قىزمەتىنە ەمدىك ءشوپ ارالاستىرىلعان بۇلاۋدىڭ، بالشىقپەن اپپليكاسيا جاساۋدىڭ، نوۆوكاينمەن جاسالاتىن ەلەكتروفورەزدىڭ يندۋكتومەتريالاردىڭ پايداسى كوپ. شيپاجايعا بارار الدىندا اۋرۋدى ەمدەگەن دارىگەردەن اقىل-كەڭەس العان دۇرىس.