InfoHub Logo

كوركەم تىرلىكتىڭ كوزى اشىق، كوكىرەگى سەرگەك ميحناتكەشى ءوزىنىڭ توقسان جاسىن ۇزدىكسىز ىسپەن توعايتقاندى قازاق ينتەلليگەنسياسى ءوز شوعىرىنان كورىپ-بىلگەن ەمەس.

اۋىق-اۋىق قاتتى سىلكىنەتىن تاۋلار تاريحىنداعى ايتىپ كەلمەيتىن اپات ارتى دا وزىنەن كەيىنگى تىلسىم تىرشىلىك جۇيەسىنە كوبىنە بەرەكەلى بيىك پەن ەڭىس، شۇرايلى جازىقتار جاساپ قالدىرادى. الگى مولشەردەگى اتا جاسىنىن جارتىسىن دا بۇيىرتپاي، تاعدىر تالكەگىنە دۋشار ەتكەن اقىن-جازۋشىلارىمىزدىڭ ءىزىن الا كەلگەندەرگە اللا تاعالانىڭ بۇل دا ءبىر سونداي راحىمى مول، ونىكتى وتەۋى شىعار: «توقسانعا ءھام سوعان جەتەقابىل اتالار تىزبەگىن كورىپ وتىرىپ، مەن ءومىر زاڭىنىڭ وسىنداي جاعىن دا ويلايمىن. ويتكەنى، قارىمدى قالامگەر تولتىرعان توقسانىڭىز الدىمەن اۋزى دۋالى، قالامى قاعىلەز ابىز ارناسىن كەڭەيتەدى. حالىقتىڭ رۋحي قازىناسى دا كوبىنشە سولاردان ونەدى. تۋراسىنا كوشسەك، بۇل ءبىزدىڭ ءۇزىلىپ قالا جازداعان ۇدەمىز. ەڭكەيە، ءۇنسىز وتىرىپ ويلارعا بەرىلگەندە ەلدىڭ ەرتەڭىمەن قاپىسىز قاۋىشاتىن كورەگەن قاريا كوز جۇمعالى نە زامان! بالكىم سول ساۋەگەيدىڭ اتقان تاڭمەن بىرگە حاتقا ءتۇسىپ، ءسات سايىن وقىلىپ وتىراتىن لەبىزى وسى اتالاردىڭ جان دۇنيەسىنەن سىرتقا سىر اڭعارتا باستاسا-شە؟.. ءتىپتى «بالكىم» ەمەس-اۋ، كورگەنشە ءادىل كۋالىك ەتە الاتىندار ونى ءقازىردىڭ وزىندە بايقاپ تا ۇلگەرسە كەرەك («مەن كەشەدەن كەلدىم بۇگىنگە» — ءا. تاجىبايەۆ، «عاسىر مەن عاسىر بەتتەسىپ» — ءا. سارسەنبايەۆ ت. ب.)

بۇل جولعى اڭگىمەمىز وزىنشە ءبىر توعا قىزىق ادام حاقىندا. اششى-تۇششى ءومىر ساباعىن اركىم ءوز مۇمكىندىگىنە قاراي پايداعا اسىرادى دەگەندە ءبىز باستاپقى، اتانىڭ قانى، انانىڭ ءسۇتى دارىتقان، مۇمكىندىكتى ايتاتىن-اق شىعارمىز. بۇگىن توقسان جاسىنا توقىراماي جەتكەن، ەڭبەگىن ەل مەنشىگىنە كوشىرۋ ۇستىندە كونەرىپ تە كوڭىلىن كونشىتكەن ءابۋ اعا (ءابۋعالي) سارسەنبايەۆ سول باستاپقى بولمىسىندا بارشاعا بالادان بەتەر يلانباق ءۇشىن جاراتىلعانداي. ونىڭ ويىنشا، ادام اتاۋلى وعان ادالىن عانا ايتادى. قۋانىشىنا كەلسەك، ونىسى — قۇددى قۇل مىنەزدەس: لەبىزىڭنەن راحىم رايى بەلگى بەرسە — ءسوز ءبىتتى — ول سەنى قۇشىرلانا قۇشاقتاپ، بەتىڭنەن سۇيەدى. ال شىندىق شىركىن ويلاعان جەرىنەن شىقپاي قالعاندا باسقاشا باپقا كوشسە. ول ونىڭ ءومىر ساباعىنان جيناقتاعان، ءادىل ەمەس ارەكەتكە قارسىلىعى دەپ تۇسىنبەك كەرەك. سونداي جاعدايدا ول ءوز بويىندا جوق دەپ جۇرگەن قاتالدىققا دا قايران قالىپ، اسىرەسە ابىگەرگە ۇرىنادى. وسىنى بايقاماسام مەن ابەكەڭنىڭ باياعى الپىس جىلدىعىندا:

ءابۋ اق قوي شاعالا، جەلكەننەن دە،
قۋانعاندا سۇيەدى ول جەلكەننەن دە.
اقشا بۇلتقا قارايدى ول اسپانداعى،
جەردەگى ءبىر پاسىقتان جيىركەنگەندە، —

دەپ جازا الماس تا ەدىم. الگىشە تۋمىستان، تۇرمىستان جيناقتاعاننىڭ قوسىندىسىن قورىتساق، وسى ارادا سەن تيىسپەگەندە — موينى بوس موماقان، نامىسىنا جۇعىسساڭ ءوز قايراتىنا ءوزى نانبايتىن ناعىز قازاق جاتىر.

وسى ءبىر ناعىز قازاق — اقىن بولىپ، جازۋشى بولىپ، جاس ۇرپاققا وقۋلىق تا جازىپ بەرە الاتىن پەداگوگ-جازۋشى بولىپ جاراتىلسا، ونى حالىق مۇددەسىمەن قابىسقان جەرىنەن جىك تابامىز دەپ بوس اۋرەگە بوي الدىرۋدىڭ قاجەتى قانشا؟!

ابەكەڭنىڭ شىعارماشىلىق ومىرىندەگى بارى مەن زارى تۇگەلدەي حالىق قولىنا كوشىپ بoلعaنى تۋرالى جوعارىدا ايتتىق. مەن ءتۇرلى جانردا جازىلعان سول قازىنانىڭ نەگىزىندە ءبىرى مەن ءبىرى ساباقتاس ءۇش سالا جاتقانىن عانا ەسكە تۇسىرەمىن (جارعا، ەرگە، ەلگە قۇلاعان ماحابباتىنىڭ ءبارى سونىڭ ىشىندە).

بۇل كىسى — بالىقشى بالاسى، ءوزى دە بالىقشى بولعان.

قۇنداعىنان باس شىعارىپ باستاپقى كورگەنى—تەڭىز. شىعارمالىعىندا تەرەڭ ءتۇبىن تۇپتەمەي تىنباعان تاقىرىبى دا — تەڭىز. ۇلى وزەننىڭ تەڭىزگە ەڭسەرىلە قۇلاعان جەرىنەن «ەدىل تولقىنى»، «اق مارالدىڭ جۇرەگى» اتتى داستاندار تۋىپ، ابەكەڭنىڭ اقىندىعىن وقىتسا، «تولقىندا تۋعاندار» مەن «تەڭىز اۋەندەرى» ونىڭ رومان اۋقىمىنان شىعا الاتىن شەجىرە جازۋشىلىعىن، ال «تەڭىز ماحابباتى»—دراماتۋرگ ەكەندىگىن ەلگە تانىتتى. مەنىڭ شامالاۋىمشا ابەكەڭ پوەزياسىنىڭ ليريكالىق جان جۇيەسىنەن وتە ءجيى ۇشىراساتىن تەڭىز تەبىرەنىستەرى اقىننىڭ وي تەرەڭدىگىنە ولشەم بولعانداي. اق باس تولقىننان كوتەرىلگەن «اقشا بۇلت» ارۋلار باسىنداعى شارشىداي شاققان شالقىسا، قالىڭ قارا بۇلتتار قورعاسىنداي اۋىر اقۋالدارعا قىزمەت قىلادى. بەلگىلى بەس تومدىعىنىڭ قاي تۇسىندا دا تەڭىزدەي تەلەگەي تولعانىستاردان قالامگەر قايرات جينايتۇعىن. بالىق باتاعاسىنداعى وزبىرلىققا قارسى كۇرەستە جەتىلگەن، بالىقشى تۇرمىسى وڭعارىلىپ، باسقاشا باقىت ۇستاعاندا سوعان دا باسشىلىق ەتە بىلگەن كەمەڭگەر كەيىپكەرلەر ابەكەڭ شىعارمالارىندا كوركەم ءبىر كورمە زالىن تولتىرعانداي بولعان. سويتكەن تەڭىز جىرشىسىن بۇگىنگى قۇردىمعا بەت العان ارال، تارتىلعان تالاي داريالار، ۋلانعان تولقىندار، ول از دەگەندەي، توڭىرەگىن تۇگەل جالماپ جۇتقالى باس كوتەرگەن اتىراۋ تەڭىزىنىڭ اجداھا مىنەزى شەرمەندە كۇيگە دۋشار ەتكەنىن ونىڭ سوڭعى پاراقتارداعى پاقىرىنا كۇرسىنىسىنەن جانە كورىپ وتىرمىز.

ابەكەڭنىڭ ءبىر ءسات تىزگىنىن بوساتپاي بەرىك ۇستايتىن، قايتا اينالىپ سوققان سايىن جاڭا ويلارعا ويىسىپ وتىراتىن تاقىرىبىنىڭ ءبىرى — ءوزى قاتىسقان ۇلى سوعىس وقيعالارى، سونداعى جەڭىسكە جەتەلەگەن ەرلىك پەن بىرلىك كورىنىستەرى. وسىدان ءبىراز جىل بۇرىن «قاسيەتتى ماحاببات» اتتى ولەڭ-رومان جانرىنا كەلىڭكىرەيتىن ەڭبەگىندە مۇلدە ءبىر جاڭا، تارتىمدى تاسىلمەن سول سوعىس تۋرالى جىلناما، شەشەن شەجىرە جاريالاعان ەدى. ودان كەيىنگى پۋبليسيستيكالىق تولعانىستارىندا ۇلتارالىق قاتىناستار توڭىرەگىندەگى ادامنىڭ جارىم جاسىن كەمىتەتىن وپاسىز قىلىقتاردى — ەسىكتەن كىرىپ، ءتور مەنىكى دەيتىندەر سىقىلدىنى كىناراتتاي وتىرىپ تا، سوعىستاعىداي جاندار جاراستىعىن اڭسايدى.

«جار رۋحىمەن سىرلاسۋ» دەلىنەتىن داستانى ارقىلى ءوزىنىڭ ەڭ ءبىر ەجەلگى ارناسى — ماحابباتتىڭ قۇدىرەتتى كۇشىن تاعى دا العا تارتادى. پوەماداعى اسىل جاردىڭ ومىردەگى ءوزىن كورسەم-اۋ دەيتىندەر دە بولۋى مۇمكىن، ارينە. بۇل ارادا جىردىڭ سيقىرلى سىرى، تارتىمدى تابيعاتى دا جاڭاعىداي جاقسى ادام بىتىمىنە بىرەگەي ءتانتى قىلماق ءوز الدىنا، بۇنىڭ بۇلايشا ەگىلە-توگىلە جاراتىلۋىنىڭ باسقا دا ءبىر جاعى بارىن جۇرتتىڭ ءبارى بىلە دە بەرمەيدى. ونى مىنا بىزدەن سۇراڭىز. ءبىز ءسىزدى تالايعى تانىس اياۋلى اپاڭىزبەن تابىستىرساق، ونىڭ رۋحىمەن ءوزىڭىز دە جەكە شۇيىركەلەسىپ، بالكىم وعان ءسىز دە ىشتەي بۇگىنگى تىرشىلىكتىڭ باعزى ءبىر تىگىسى ءسوتىلىپ تۇرعان جەرلەرىن ايتىپ، شاما كەلگەنىنشە شاعىنىپ باعارسىز. بۇل كىسىنى ءومىر بويى شىعىس قىزىنىڭ شىراعدانىن جوعارى كوتەرىسكەن اتاقتى جۋرناليست ءلازيزا سەرعازينا اپاڭىز دەپ ءبىلىڭىز. ەگەر ول كىسى ابەكەڭنىڭ سۇيىكتى زايىبى بولماعاندا سوناۋ «اقمارالدىڭ جۇرەگىنەن» بەرگى جەردەگى اعىل-تەگىل ماحاببات حيكاياسى تاپ سول ءوز دارەجەسىندە جىر دوستارىنىڭ جان جۇيەسىنە وتتى قۋاتىمەن ورنىعا الار ما ەدى؟.. وسىنىن ءوزى — ءوز الدىنا دەربەس تۇرعان ءبىر جاۋاپسىز سۇراق... لازكەن قيىن، قىزىق دەلىنەتىن تاۋقىمەت تە، تاماشا دا كەزەڭنىڭ ءبارىن باستان كەشىرگەن باياعى قىزىل وتاۋ قىزى ەدى عوي. اقىن ونىڭ قادىر-قاسيەتىن قازبالاي جوقتاسا، ونىڭ دا، باستى سەبەبى ءبىر عانا جالعىزسىراۋدا جاتقان جوق (قۇداي ىسىنە قۇم شاشپاق تا جوق). ايەلدىڭ جاقسى قىلىعىمەن جان توعايتىپ داعدىلانعان اقىن وسى شىعارماسىنىڭ وزىندە-اق شولاق قابىلەتتەن قاتتى شوشىنادى. ونى وقىپ وتىرعاندا ءسىز ءوزىڭىز-اق بۇگىنگى بايانسىز نەكەلەردىڭ بەت پەردەسىن پارشالاسام دەيسىز.

ابەكەڭدى كەۋدەسىن قارىس ايىرا كۇرسىندىرەتىن ماحاببات ازاسى — تۋعان جەردى — قازاق جۇرتىنىڭ قاسيەتتى مەكەنىن شەكسىز سۇيۋمەن ساباقتاس جاتىر. ونى ءوز الدىنا تاراتىپ ايتپاي-اق، اقىننىڭ تاعى ءبىر ەكولوگيالىق ەلەگياسىنان كورەمىز. ايتىپ وتىرعان شىعارمام — جاناعى ءسوز باسىندا جاقشا ىشىندە الىنعان «عاسىر مەن عاسىر بەتتەسىن». بۇندا تابيعاتقا عانا ەمەس، ادامنىڭ وزىنە، ونىڭ بۇكىل بولاشاعىنا توتەسىنەن تونگەن اپات ءسوز بولادى. و باستا بۇل شىعارما «كەزەكتەگى عاسىر پەرزەنتىنىڭ جان داۋىسى» دەگەن اتپەن جارىق كورگەن-دى. اتىنىڭ وزىنەن-اق بايقاپ وتىرعان شىعارسىز، ابىز قارتىڭىز ءالى دۇنيە ەسىگىن اشپاعان، ۇلتى قازاق پەرزەنتتىڭ جان تۇرشىكتىرە شىرقىراعان قۇلىنداعى داۋسىنا قۇلاق تۇرگىزەدى: «باياعى زامانداردان سورى ارىلماعان وسى حالىققا مىناۋ مىستان عاسىر وپا بەرگەن بە، ءسىرا؟.. دۇنيەگە كەلە قالعاندا مەن قانداي كۇي كەشەرمىن؟.. باسار جەر، ىشىپ-جەرلىك نەسىبەم، جۇتار اۋام ۋ بولماسا نەتسىن؟! ول تۇرعاي اۋەلى، تاعدىر ماعان ادامعا تيەسىلى جەتى مۇشەنى تۇگەل بۇيىرتار ما؟!. ءتىپتى وسى حالىقتىڭ ءوزى ءبۇتىن كۇيدە ءومىر ءسۇردىم دەي الا ما ەكەن؟.. وسىناۋ قاتىگەز عاسىر تەڭ جارتىسىن قىرىپ سالعاندا، قالعانىن قالاي ءبۇتىن دەپ ساناۋعا بولار؟.. ۋسويقى كەزەڭ جۇرتىن سوڭىنان ەرتكەن ەرلەردى ەكى تالماپ ءبىر جۇتقاندا باسقالارىنىڭ يىعىندا قالعان باسى قايسى؟ قۇر بەكەر كەۋدەمەن كيمەلەگەن باسسىز ناسىلدە بابا بولعان با؟!. باباسىز ەسكەن بالانىڭ ۇلت، جۇرت بولعانىن كىم كورگەن؟».. اقىن دۇنيەدە جوق ءسابي ءپىرىن وسىنشالىق ۇرەيمەن جىر قاناتىنا قوندىرىپ الىپ، زار بيىككە زاۋلاسا. ءسىز دە ودان ءۇزىلىپ قالا المايسىز... ەندەشە ءسىز وسى ارادا، ءسوز باسىندا «الدە قاشان كوز جۇمعانى» ايتىلعان كوسەم ساۋەگەيمەن كەزدەسىپ تە قالعاندايسىز. شەڭبەرى شەكسىز كەڭ جاتقان كەمەل ماحاببات دەپ وسىنى ايتساق كەرەك!..

قيلى-قيلى كەزەڭدەردە ات قۇرعاتپاي جول جۇرۋگە داعدىلانعان، ەلدىڭ الەۋمەتتىك ومىرىنە ەتەنە ارالاسىپ ابدەن ىسىلعان قالام ءھام قوعام قايراتكەرى وسىناۋ سىن ساعاتتاردى اشىق ايتىستارعا بەلسەنە ارالاسۋىن توقتاتقان جوق. اسىرەسە السىرەپ قالعان قازاق ءتىلىنىڭ، مەشەۋلەگەن مەكتەپتەردىڭ تاعدىرى ونى ەرەكشە الاڭداتتى. ابەكەڭنىڭ ءبىر كەزدەردە باسپا جۇمىسىن باسقارىسىپ، وقۋلىقتار جاساسقانىن الگى ءبىر ءسوز اراسىندا دا اڭعارتتىق. ەلدىڭ وسى باعىتتاعى جوعىن جوقتاپ الىس-الىس ساپارلارعا شىعىپ كەتىپ ءجۇردى. كورمەي قالعان كوز، جۇرمەي قالعان اياق، بوساپ قالعان بۋىندار قاي ساعاتتا دا مازاسىز شال جارلىعىنا شاراسىزدان كوندى. وسىدان ازداعان جىلدار بۇرىن ول استراحان وبلىسىنداعى قازاق ەلىن ارالاپ قايتقان بەتىندە ۇكىمەت باسشىلارىنا تۋرا ماعىناسىندا جىلاپ بارعان، ەفير مەن تەلەەكراندى ۇستى-ۇستىنە پايدالانعانى دا بار. ەڭبەگى زايا كەتپەدى. 1سكە جاۋاپتى ازاماتگار سول وڭىرگە بارىپ قايتقاننان كەيىن قازاق تىلىندە مەكتەپتەر اشىلىپ، راديو تورابى ىسكە قوسىلدى، ايماقتىق قازاق گازەتى ومىرگە كەلدى. سول كەزدە جازىلعان ءبىر ماقالامدا وسى ءبىر ونەگەلى ءىس وركەنىن ۇزارتىپ، رەسپۋبليكا جەرىنەن سىرتقارى جاتقان وزگە تاراپتارداعى قازاقتار تۇرمىسىنا وڭدى اسەرىن تيگىزسە تاماشا بولار ەدى دەگەن ەدىم ودان كەيىنگى جاعداي ماعان ءمالىم ەمەس.

اياۋلى اقىن-جازۋشىلارىمىزدىڭ تىرلىگىندە توڭىرەگىنە شام جارىعىنداي شاشىراعان شاراپاتىن كۇندەلىكتى ومىرىمىزگە اۋىزەكى ايتىسىپ، ەستەلىك تۇرىندە جازىپ تا ءجۇرمىز عوي. ارامىزدا ارداق تۇتىپ وتىرعان اعا كىسى تۋرالى دا وسىنداي بىرەر اۋىز جىلى لەبىز بىلگىزسەك، ودان شىندىق شىرايلانباسا جۇتاماسىن بىلۋدەي-اق بىلەمىز-ay... كىسىنىڭ ۇستىنەن كىنارات ءسوز جۇگىرتپەسە ءىشى اۋىراتىن بىرەۋلەر دە بoلaدى-ay... سول بىرەۋلەردىڭ بىرەۋى ءبىر ورايدا ۇيالماي-قىزارماي وسى ادامدى دا جەرشىل-جىكشىلدەر قاتارىنا قوستى. ەگەر سونىڭ قيقىمداي شىندىعى بولسا، تۋعان توپىراعىمىزدىڭ جۋىقتاستىعى ءۇشىن-اق مەن بۇل كىسىدەن بويىمدى اۋلاق ۇستار ەدىم. جاڭاعىداي «ءابۋ اق «قوي شاعالا، جەلكەننەن دە» دەگەن ءسوزىمنىڭ جالپىعا جاريا تۇردە قايتىپ الار ەدىم. قاراتاۋ ماڭايىنىڭ زياش قالاۋوۆاسى، تالدىقورعاننان قانيپا بۇعىبايەۆاسى — ەكەۋى دە وسى ءۇيدىڭ بوي جەتكەن قىزى بولاتىن. ەكەۋىن دە ءاز اكە ءابۋ، اياۋلى انا ءلازيزا ءوز قولدارىنان ۇزاتقان. ەكەۋى دە وسى ۇيادان اقىن بوپ ۇشتى. جەزقازعاننىڭ باۋبەك بۇلقىشيەۆى، تاعى دا تالدىقورعاننىڭ قۇداش مۇقاشيەۆى، اقتوبەنىڭ قۋاندىق شاڭعىتبايەۆى، جىمپيتىنىڭ ابدوللا جۇماعالييەۆى — ءبارى دە ابەكەڭنىڭ ءار جەردەن تەرىپ دەگەندەي، ءوز ۇيىنە جەتەلەپ اكەلگەن جەتكىنشەكتەرى بولعان. اتالعانداردىڭ ىشىندەگى مايداندا قازا تاپقان ەكى مارقۇم ولە-ولگەنشە وسى ۇيمەن حات جازىسىپ، مايدان گازەتىندەگى ابەكەڭمەن دە بايلانىستارىن ۇزبەگەن. وسىدان ارتىق وعان قانداي مىنەزدەمە قاجەت؟..

قۇبىلمالى قۇلقى مول تەنتەك تەڭىز ۇستىندە ون ەكى ون ءۇش جاسىنان دۇلەي داۋىلدار ازابىن كۇن دەمەي، ءتۇن دەمەي ۇلكەندەرمەن بىرگە بولىسكەن كىسى ەلگەزەك تە بەينەتقور داعدىسىنان ءبىر ءسات جاڭىلماعان عوي. كارىلىك توسەگى قيمىل-ارەكەتىن قىسقارتىپ تاستاعان بۇگىندەرى دە جالعىز قىزى رايحانعا ءتۇننىڭ ءبىر ۋاعىندا ويىنا ورالعاندى سول مەزەتتە قاعازعا تۇسىرتەتىن كورىنەدى. وسى قىلىعى مىناداي ءبىر ەپيزودتى مەنىڭ ەسىمە ەرىكسىز تۇسىرەدى:

بۇل ادام جالپى جاعداي تىعىرىققا تىرەلگەندە تۋرا ماعىناسىندا ءوزىن ءوزى ۇمىتقانداي. باياعى وقۋلىق شىعاراتىن باسپا ديرەكتورى كەزىندە جانىن سىرىدەي قىسقان قاۋىرت جۇمىس بۇنىڭ ءوزىن دە، قاراۋىنداعى وزگەلەردىڭ ەكەۋ-ۇشەۋىن دە تۇنگى جۇمىسقا جەككەن. سونداي كۇندەردىڭ بىرىندە، تۇنگى ساعات ەكىلەر شاماسىندا قازاقستان كومپارتياسىنىڭ ءبىرىنشى حاتشىسى شاياحمەتوۆ (ول كىسى دە تۇنگى جۇمىستى كۇندىزگىدەن كەم پايدالانباعان) تەلەفون سوعىپ:

— بۇل كىم؟ — دەسە كەرەك. قولجازبا اۋرەسىمەن ابدەن قالجىراپ وتىرعان ابەكەڭ اكەسىنىڭ اتىن دا قاپەلىمدە ەسىنە تۇسىرە الماي، سونداعى بار تاپقان امالى:

— ءاي، ايتىپ جىبەرىڭدەرشى، وسى مەنىڭ فاميليام قالاي ەدى؟

الىس-الىس گۇلدەردەن شىرىن تامشىلارىن تاسىعان بال اراسىنداي قازاق تارجىمەشىلەرىنىڭ ءبىرى دە — وسى ابەكەڭ. بۇل كىسى قازاق تىلىنە اۋدارعانداردان ا.پۋشكين مەن م.لەرمونتوۆتى، ش.پەتەفي شىعارمالارىن اتاساق تا جەتەر. ورىس، تۇرىك، ەستون تىلدەرىنە ءوز شىعارمالارى دا اۋدارىلدى. اڭگىمەنىڭ اقىرىندا ونى دا ايتا كەتەلىك. اۋدارما تۇرعاي، ءتۇپنۇسقاسىنىڭ ءالى وقىلماعان تالاي دۇنيەسى «قارت قوينىندا قالاش» كۇيىندە قالىپ تۇر. ەل پايداسىنا سارقا جۇمسالعان ماڭداي-تەر، تابان-ەت دەگەندەرىڭىز ەستە ەلەۋسىز قالعان با، — سالتاناتتى ساعاتتارىنىڭ بىرىندە ونىڭ ومىراۋىنا كوز جۇگىرتسەڭىز كوپ مەدالدار ۇستىنەن جەتى وردەنىن كورەر ەدىڭىز. سونىڭ بىرەۋى — تاۋەلسىز قازاقستان پرەزيدەنت ءوز قولىنان تاپسىرعان «پاراسات» وردەنى.

زەينەتكە قوسا بەينەتىنىڭ ءوزىن پارىزىنداي قۇپتاعان توقسان جاستاعى ابىز ادامعا:

— قارتايدىم دەپ قاجىما، ەڭبەگىڭ — ەل اۋزىندا توزبايتىن تولعاۋ! — دەگەننەن اسىپ نە ايتا الامىز، — ينشاللا، راسى دا سول.

1995 جىل.

---