InfoHub Logo

المەرەك باتىردىڭ جورىققا اتتانۋدى مۇلدە توقتاتىپ، ەل ىشىندەگى تىنىش تىرشىلىك ارەكەتتەرىنىڭ قالىپتاسۋىنا ءبىرجولا دەن قويۋعا اۋىسقان كەزى ەكەن. كۇنى-تۇنى ەلدىڭ قامىن ويلايدى. «از حالىق ەدىك، ازىپ كەتپەيىك» دەپ، ءجون سىلتەپ، اۋىل-ايماعىنان ۇزاپ الىسقا شىقپايدى. قاتتى-قايىرىمنان قالعان قارت كىسىلەر دە المەرەكتى توڭىرەكتەپ، قاسىنا كوبىرەك ۇيىرىلەدى. دانا ابىزدان تۇرمىس-تىرشىلىك قۇبىلىستارىنىڭ قىر-سىرىن ءجيى سۇرايدى، توقتاۋسىز اشىلا سىرلاسادى.

ءوزىنىڭ ارقاسۇيەر ايبىنى، اقىلداسى سانايتىن الجاننىڭ قاس تۇلەگى سىرىمبەت باتىردىڭ دا ۇيدە ۇيالاپ قالعان كەزى بولعان سوڭ، وزىنەن جاسى كىشى المەرەكتى شاقىرىپ الىپ، كۇن سايىن اڭگىمە-دۇكەن قۇرىسادى. سىرىمبەت باتىردىڭ بالاسى حانكەلدى باتىردىڭ دا ايبىنى اسىپ، كۇش-قايراتى تولىسىپ تۇرعان شاعى. ەلدىڭ جاۋى كوپ. تۇس-تۇستان اش قاسقىرشا انتالايدى. ءبارىنىڭ جاۋلاپ الىپ، قۇلعا اينالدىرعىسى كەلەدى.

قارتتار وسى جايدى اقىلداسادى دا، جاس باتىرلارعا جول نۇسقايدى. سوندىقتان ۇلكەن-كىشى باتىرلار ات ۇستىنەن تۇسپەيدى، ەلى مەن جەرىن كۇزەتەدى. ەلدىڭ شەتىن بارلاپ، الىستان جاۋدىڭ قىبىر-قيمىلىن اڭديدى. وزدەرى دە ساق جۇرەدى.

جاز ءوتىپ، ەلدىڭ جايلاۋدان ويعا ويىسقان مەزگىلى ەكەن. قارت الاتاۋدىڭ كوك مۇزى سىرەسىپ جاتقان قۇزدارىنىڭ ەتەگىنەن تومەن ءتۇسىپ، ەڭىستى قۇلديلاي ويعا سىرعيدى. ءشوبى سونى ساي-سالا جاندانىپ سالا بەرەدى. ورعي اققان تالدىبۇلاق جىلعاسىنىڭ جايپاق جاعاسى ەلسىز، قۇلازىپ جاتقان، ءبىر ءتۇرلى سۇرەڭسىز ەدى. بۇل كورىنىسكە كوڭىلى قوڭىلتاقسىعان، جان سەزىمى قوبالجىعان سىرىمبەت باتىر:

— ەلسىز جەردە سىن دا، ءسان دە بولمايدى ەكەن-اۋ! — دەيدى قاڭىراعان جازىققا قاراپ. قاسىنداعى ابىزعا بۇرىلىپ، جابىعا كۇرسىنەدى. سوندا باتىردىڭ كىربەڭ كوڭىلىن جادىراتقىسى كەلگەن المەرەك ابىز تاماعىن كەنەي جوتكەرىنىپ الادى دا، ويدى سەرگىتەتىن جىگەرلى جۇبانىش ءسوز ايتادى.

— قامىقپاڭىز، باتىر! ەلىمىز دە، ەڭسەمىز دە ءوسىپ كەلەدى. ەلدىڭ ءسوزى بار ەمەس پە: «ەل كوشكەن سوڭ جەر قۇلازيدى، مال كەتكەن سوڭ بەل قۇلازيدى. قۇس كەتكەن سوڭ كول قۇلازيدى، قىز كەتكەن سوڭ ەل قۇلازيدى. جاپىراعى تۇسكەن سوڭ تال قۇلازيدى، قاتارى كەتكەن سوڭ شال قۇلازيدى. جايىلىمى جوق اڭ قۇلازيدى، قايىرى جوق حان قۇلازيدى. سۇسىن اسىرعان بوران بوزدايدى، شاڭىن سىپىرعان دالا توزبايدى». وسى ەل، وسى جەر
قۇرىماسا ەكەن، شىركىن! — دەپ اينالاعا قۇمارتا كوز جۇگىرتتى قارت باتىر.

— مىنا دالانىڭ كەلبەتىنە قاراپ، ەلدىڭ بولاشاعىنا سەنەسىڭ!

بۇل تۇجىرىمدى ەستىگەن سىرىمبەت باتىر:

— وي، دۇنيە-اي، ەل سوعان جەتسە ەكەن! — دەپ تاعى دا وكسي كۇرسىنىپ، كۇڭىرەنە كۇيزەلەدى.

---