ۇلگىلى بالا
«ۇلگىلى ءتارجىما» قولعا تيگەننەن كەيىن مەن ەندى باستاۋىش مەكتەپ ءۇشىن حرەستوماتيا قۇراستىرۋعا كىرىستىم. مۇندا مەن ەڭ الدىمەن ىبىراي ءالتىنساريننىڭ حرەستوماتيالارىن ۇلگى ەتتىم. ويتكەنى ىبىراي ءارى شەبەر پەداگوگ، ءارى جاقسى مەتوديست ەدى. سوندىقتان باستاۋىش مەكتەپتە وقيتىن قازاق بالالارىنا ارنالىپ جازىلعالى وتىرعان حرەستوماتيا، ءسوز جوق، ىبىرايدىڭ ۇلگىسى بويىنشا جازىلۋى كەرەك ەدى. ىبىرايدىڭ وقۋ قۇرالدارىنداعى نەگىزگى سارىن مىنەز-قۇلىقتى تۇزەۋدىڭ، جاۋىزدىققا، وزبىرلىققا قارسى كۇرەستىڭ، ادالدىق، ادىلەتتىلىك ادامگەرشىلىك تاربيەسىن بەرۋدىڭ سارىنى ەدى.
«ۇلگىلى بالا» حرەستوماتياسىنا كرىلوۆتىڭ ءوزىم اۋدارعان مىسالداردان كىرگىزدىم، ورىس كلاسسيكتەرىنىڭ، بالالارعا ارناپ جازعان قىسقا اڭگىمەلەرىن وزىمشىلەپ قازاق تۇرمىسىنا لايىقتاپ جازدىم، سول سياقتى قازاقتىڭ باي اۋىز ادەبيەتىن سۇرىپتاپ پايدالاندىم.
وسىمەن قاتار، بۇل كىتاپقا تابيعات تۋرالى، ونىڭ ءار الۋان قۇبىلىستارى تۋرالى، گەوگرافيا، وسىمدىك جانۋارلار تۋرالى ماعلۇماتتار بەرەتىڭ بالالاردىڭ ۇعىمىنا سىيىمدى جانە قىزىقتى قىسقا-قىسقا اڭگىمەلەر، مىسالدار كىرگىزدىم. ءاربىر اڭگىمەنىڭ سوڭىنا سۇراقتار قويدىم.
حرەستوماتيانى قۇراستىرعانىمدا، نەگىزگى ويلاعان ماقساتىم، كوزدەگەن نىسانام — جاس ۇرپاقتى ونەر-بىلىمگە، ادىلەتتىلىككە، ادامگەرشىلىككە تاربيەلەۋ ەدى. مۇنداعى ءاربىر ولەڭشى، اڭگىمەلەردىڭ مازمۇنى وقۋشىلاردى ونەر-بىلىمگە شاقىرۋ، شىنشىل بولۋعا ۇندەۋ، جەتىم-جەسىرلەردى، ناشارلاردى بوياۋ، قايرىمسىز بايلاردى اشكەرەلەۋ، سول سياقتى الەۋمەتتىك تەڭدىكتى ناسيحاتتاۋ ەدى. «ۇلگىلى بالا» حرەستوماتياسىنىڭ يدەيالىق نەگىزگى وي ءتۇيىنى وسى ەدى.
«ۇلگىلى بالا» سول كەزدە، ءتىپتى ودان بەرىگىرەكتە دە، كوپتەگەن مەكتەپتەردە وقۋ قۇرالى بولىپ پايدالانىلىپ ءجۇردى. حرەستوماتيانى ءوز كەزىندە باستاۋىش مەكتەپتەگى بالالاردى دۇرىس تاربيەلەۋ جۇمىسىندا ءوز حالىنشە بەلگىلى دارەجەدە ەداۋىر قىزمەت اتقارعان ەڭبەكتىڭ ءبىرى دەپ بىلەمىن. كىتاپتىڭ جازىلۋ تاريحى، ونى جازۋعا سەبەپ بولعان جاعداي وسى جوعارىدا ايتىلعاندار ەدى.
You Might Also Like
-
جاز ءوتتى. مەن فەدوروۆكاعا كەلگەن سوڭ، وقۋ باستالدى ساعيلادان اندا-ساندا حات كەلىپ تۇردى. مەن دە ۇزبەي حات جازىپ تۇردىم. ەكەۋمىزدىڭ ارامىزدا بۇل حاتتاردى تاسيتىندار: دۇيسەن دۇيسەنبەكتەر ەدى.
-
ناداندىققا، فەودالدىق ەسكىشىل، ورەسكەل سوراقى سالتقا قارسى كۇرەس جۇرگىزۋدىڭ بىردەن-بىرەۋى — حالىقتى اعارتۋ، بالالاردى وقىتۋ، حالىقتى ساۋاتتاندىرۋ دەپ، ونى مادەنيەت ساتىسىنا اياق باستىرۋ دەپ ۇع...
