InfoHub Logo

تۇيمەش — كەلىگە ءتۇيىپ، جاڭعىرىققا سالىپ توقپاقپەن جانىشتالعان ەت. ونى كەيدە سول كۇيى قاتىرىپ نەمەسە قارىنعا سالىپ ساقتايدى. مايعا قارىپ، سۋعا قايناتىپ، كەيدە ىشەككە تىعىپ قايناتىپ پىسىرىلەدى.

ماي تۇيمەش — مايىن كوبىرەك جىبەرىپ كەلىگە تۇيگەن ەت. ونى كوبىنەسە وڭەشكە، جۇرەكتىڭ قولقاسىنا تىعىپ پىسىرۋگە بولادى.

بىتەۋ — بۇيەنگە تىعىپ پىسىرگەن ۇساق ەت. ونىڭ ءبىر جاعى تۇيىق، ەكىنشى باسى تىگۋلى، سوعان وراي پىسكەندە ءوز سورپاسى وزىندە بولادى.

مەڭىرەۋ — ءاسىپتىڭ ۇلكەن جانە سەمىز ەتىپ جاسالعان ءبىر ءتۇرى.

جاۋجۇمىر — سويىلعان مالدىڭ ەتىن بۇزىپ، قالىڭ ەتتەرىن ارسالاپ الىپ، تۇگەلدەي ءوز قارنىنا سالىپ، سۋ قۇيماي پىسىرگەن ەت. ونى كەيدە جاۋبۇيرەك دەپ تە اتايدى.

بورشا كىسە — تاۋىق، قاز، ۇيرەكتىڭ، بۇزاۋ، لاق، قوزىنىڭ ەتتەرىنە كۇرىش، سارىمساق، بۇرىش، شيكى جۇمىرتقا، سارى ماي قوسىلادى. ءسۇت قۇيىپ وتىرىپ ماشيناعا تارتىلادى. سودان ىشەككە، بۇيەنگە تىعىلىپ نەمەسە قامىر اراسىنا سالىنىپ پىسىرىلەدى.

جاۋبۇيرەك — قويدىڭ، ەشكىنىڭ، باعلاننىڭ بۇزباي پىسىرگەن بوكسەسى.

سىرباز — ءوز تەرىسىنە وراپ، الدىن—الا وت جاعىلعان شۇڭقىرعا كومىپ پىسىرگەن باعلان ەتى.

ەت حوشان — قۇيرىق ماي، قامىر، وسىمدىك مايىن قوسپالاپ قارىنعا سالىپ پەشكە پىسىرەتىن، تۇز—بۇرىش، ءيىس ءدامى كەلىستى تاعام.

---