ءۇندىستاننىڭ كادەتتەرى تاراز ۋنيۆەرسيتەتىندەگى اسكەري كافەدرانىڭ جۇمىسىمەن تانىستى
ءوزارا ىنتىماقتاستىق جونىندەگى مەموراندۋم بويىنشا م.دۋلاتي اتىنداعى تارمۋ-عا ءۇندىستان ۇلتتىق كادەتتەر (ۇۇك) كورپۋسىنان دەلەگاسيا كەلدى. بۇل تۋرالى ۋنيۆەرسيتەتتىڭ باسپا ءسوز قىزمەتى حابارلادى.
ءۇندىستاندىق كادەتتەر ازاماتتىق ماماندىقپەن قاتار اسكەري سالا ماماندارىن دايارلايتىن اسكەري كافەدرانىڭ جۇمىسىمەن تانىستى. ءۇندىستاننان كەلگەن اسكەري دەلەگاسيا الدىمەن ۋنيۆەرسيتەت رەكتورى ماحمەتعالي سارىبەكوۆتىڭ قابىلداۋىندا بولدى.
كەزدەسۋ بارىسىندا ءسوز العان ۋنيۆەرسيتەت باسشى ماحمەتعالي نۇرعالي ۇلى ءۇندىستان مەن قازاقستان اراسىنداعى ارىپتەستىك بايلانىستىڭ تامىرى تىم تەرەڭدە جاتقاندىعىن اتاپ ءوتتى.
«بىرىنشىدەن، تاراز مەملەكەتتىك ۋنيۆەرسيتەتى مۇحاممەد حايدار دۋلاتيدىڭ ەسىمىن يەلەنگەن. ال، ورتا عاسىرداعى ورتالىق ازيا تاريحىنىڭ شەجىرەشىسى دۋلاتي ەسىمى ءۇندىستاندىقتار ءۇشىن دە تاڭسىق ەمەس. ول كىسى ءۇندىستانداعى كاشمير ولكەسىن 11 جىل باسقارعان. ۇلى بابامىزعا توپىراق تا سول كاشمير جەرىنەن بۇيىرعان. سوندىقتان، ءۇندى اسكەريلەرىنىڭ دەلاگاسياسىنىڭ تارمۋ-عا تابان تىرەۋى بەكەر ەمەس. ەكىنشىدەن، تاراز ۇلى جىبەك جولىنىڭ بويىنداعى ەجەلگى قالا. دەمەك، بۇل قالا ورتاسىرداعى وركەنيەتتەر توعىسقان ورتالىققا اينالدى دەۋگە بولادى. ءبىز بۇگىن سول تاريحي ساباقتاستىقتىڭ اسكەري سالا ماماندارىن دايارلاۋداعى ارىپتەستىككە ۇلاسقاندىعىنىڭ كۋاسى بولىپ وتىرمىز»، - دەدى ماحمەتعالي نۇرعالي ۇلى.
ودان سوڭ، تارازعا ۇۇك-نىڭ 12 كادەتىن باستاپ كەلگەن پولكوۆنيك كيرپال سينگ دەلەگاسيانى كۇتىپ الۋدا قوناقجايلىق كورسەتكەن ۋنيۆەرسيتەت باسشىلىعىنا العىسىن جەتكىزدى. ءوز كەزەگىندە، ءۇندىستاندىق كادەتتەرى دە ەلىمىزدەگى اسكەري سالا ماماندارىن دايارلاۋ ماسەلەلەرىنە قاتىستى سۇراقتارىن قويىپ، ناقتى جاۋاپتارىن الدى. كەزدەسۋ بارىسىندا ءۇندىستاندىق دەلەگاسيا قازاقستاندىق جوعارى وقۋ ورىندارىمەن ازاماتتىق سالا ماماندارىن دايارلاۋ ىسىندە دە بايلانىس ورناتۋعا نيەتتى ەكەندىكتەرىن جەتكىزدى.
وتكەن جىلى قول قويىلعان ارىپتەستىك تۋرالى مەموراندۋمعا ساي ەلىمىزدەگى اسكەري كافەدرالارىندا ۇندىستانمەن اسكەري سالا ماماندارىن دايارلاۋ ىسىندە قارىم-قاتىناس جاندانىپ كەلەدى. اتالعان مەموراندۋم نەگىزىندە تارمۋ اسكەري كافەدراسىنىڭ ستۋدەنتتەرى دە 2 رەت ۇۇك كورپۋسىندا بولىپ كەلدى. اتاپ ايتقاندا، وتكەن جىلدىڭ 21 قاراشا - 4 جەلتوقسان ارالىعىندا اسكەري كافەدرا باسشىسى، پولكوۆنيك ساعات مۇقۇشيەۆتىڭ جەتەكشىلىك ەتكەن دەلەگاسيا «سافاري شولدەرى-2015» اسكەري وقۋ-جاتتىعۋ جيىنىنا قاتىسىپ قايتتى. ال، بيىلعى جىلدىڭ 14 - 29 قاڭتار ارالىعىندا ۇۇك كورپۋسىنا اتتانعان قازاقستاندىق دەلەگاسيا قۇرامىندا ەكى ستۋدەنت باردى.
ءۇندىستاندىق اسكەريلەر دەلەگاسياسى تارازدىڭ كورىكتى جەرلەرىمەن تانىسىپ، ەجەلگى كەشەن - اقىرتاس سارايىنىڭ ورنىندا بولدى.
You Might Also Like
-
كاركىنبايەۆا گۋلميرا وشاكبايەۆنا جوعارى ساناتتى ارنايى ءپان وقىتۋشىسى باقاناس اگرارلى-يندۋستريالدىق كوللەدجى
-
ى.التىنسارين اتىنداعى ارقالىق مەملەكەتتىك پەداگوگيكالىق ينستيتۋتى
