InfoHub Logo

ۋولت ديسنەي — اتاقتى امەريكالىق سۋرەتشى-مۋلتيپليكاتور، اتى الەمگە تانىلعان رەجيسسەر، اكتەر، سەناريست ءارى پروديۋسەر، تولىق مەتراجدى مۋلتفيلمدەردىڭ تولىق سەرياسىن جاساۋشى. الەمدەگى بۇكىل بالالار جاقسى كورەتىن ميككي ماۋستىڭ، قويان وسۆالدتىڭ، دونالد داكتىڭ جانە 200-دەن استام پەرسوناجدىڭ اتاسى. ول «وسكاردىڭ» 29 پرەمياسىنىڭ جانە اقش جوعارى ازاماتتىق ۇكىمەتتىك ماراپاتى «بوستاندىق مەدالى» يەگەرى بولدى. «Walt Disney Productions» كومپانياسىنىڭ قۇرۋشىسى جانە الەمدەگى العاشقى ۇلكەن ساۋىق-سايراندىق «ديسنەيلەند» بالالار ساياباعىن قۇرۋشى بولىپ تابىلادى.

ۋولت ديسنەيدىڭ ءومىربايانى، جەتىستىگىنىڭ تاريحى

ۋولتەر ديسنەيدىڭ ءومىربايانى سوناۋ 1901 جىلدىڭ 5ء-شى جەلتوقساندا اعاش ۇستاسى مەن ءمۇعالىمنىڭ وتباسىندا بەس بالانىڭ ءتورتىنشىسى بولىپ ۋولتەر ەلياستىڭ دۇنيە ەسىگىن اشۋىمەن باستاۋ الادى. ۋولت ەلياس ديسنەيدىڭ اكەسىنىڭ ءتۇبى يرلاندتىق-كانادالىق، ال شەشەسى فلورانىڭ تەگى نەمىس-امەريكالىق. وتباسى مەكەن ەتكەن چيكاگو سول كەزەڭدە تەك قانا ءىرى وندىرىستىك قالا عانا ەمەس، سونىمەن قاتار شتاتتىڭ ەڭ قىلمىسى كوپ قالاسى بولىپ تانىلعان بولاتىن. كورشى كوشەدەگى بولعان پوليسەيدىڭ ءولىمى ديسنەيلىك وتباسىنىڭ شىدامىنىڭ شەگى بولدى. وسى وقيعادان سوڭ ديسنەيلىك وتباسى اكەلەرىنىڭ اعاسىنا ميسسۋري شتاتىنداعى، مارسەلين اتتى كىشىگىرىم قالاعا كوشىپ كەتەدى. سول جەردە ديسنەيلەر فەرماعا يە بولادى. بۇل كەزدە ۋولتتىڭ جاسى 4-تە بولاتىن. ۋولتتىڭ سۋرەت سالعىسى كەلەتىن، الايدا وتباسىندا قارانداش پەن قاعاز ساتىپ الۋعا اقشا بولمادى. ول قارا ماي جانە تاياق تاۋىپ الىپ، ءۇيدىڭ سۋرەتىن سالدى…

ۋولت ديسنەيدىڭ بالالىق شاعى مەن جاستىق شاعى

مارسەليندە ۋولتتى كوبىسى تانيتىن. ول ۇنەمى كوتەرىڭكى كوڭىلدە جۇرەتىن، سوندىقتان دا ونى كورشىلەرى مەن تانىستارى جاقسى كورەتىن. بىردە كورشىلەردىڭ ءبىرى قارت ارداگەر، شەرۆۋد دارىگەر قاعاز جىرتىندىسىنا ءوزىنىڭ اتىنىڭ سۋرەتىن سالىپ بەرگەنى ءۇشىن ۋولتقا 25 سەنت تولەيدى. كەيىنىرەك، ديسنەي شەرۆۋد دارىگەردىڭ بيەسىنىڭ ءساتتى شىققان پورترەتى وعان سۋرەتشى بولۋ تۋرالى وي سالدى دەپ ەسەپتەدى.

بالا كۇنىنەن ۋولت سۋرەت سالۋعا قۇشتار بولدى، ال جەتى جاسىندا ءوزىنىڭ العاشقى كوميكستەرىن ساتا باستايدى. جاس ۋولت مەكتەپىشىلىك گازەتتى شىعارۋعا سۋرەتشى جانە فوتوگراف رەتىندە ات سالىسىپ، ال كەشكىلىك ۋاقىتتاردا اسەم ونەر اكادەمياسىنا بارىپ ءجۇردى. سوڭىرا گازەت كاريكاتۋريستتەرىنىڭ كۋرسىنان ءوتىپ، مۇندا ەرەكشە ويلاۋدى، قالىپتى لوگيكانىڭ قىزىقتى بۇزىلىسى مەن ىقشامدى ۇلگىگە ۇيرەندى.

ۋولت 8 جاسقا تولعاندا، اكەسى وعان جۇمىس ىستەتە باستايدى. بالاسى اكەسىنە تيەسىلى فيرمانىڭ حاتتارى مەن جارنامالارىن تاراتاتىن: كەز كەلگەن اۋا رايىندا، جاڭبىردا دا، قاردا دا، تاڭەرتەڭ جانە قاراڭعى تۇندە دە قيسايىپ كەتكەن باتەڭكەسىمەن ۋولت كوشە ارالاپ، پوچتانى دەر كەزىندە جەتكىزۋ ءۇشىن جۇگىرىپ جۇرەتىن. ۋولتتىڭ تاپقان بار اقشاسىن اكەسى الىپ وتىراتىن. الايدا، ۋولتتىڭ تاۋى شاعىلمادى: ول جاي عانا اكەسى تالاپ ەتكەن جۇمىسىن ەكى ەسە ىستەي وتىرىپ، قاتال «باستىعىنان» جاسىرىن تۇردە نورمادان تىس تاپقان كۇندەلىكتى اقشاسىن الىپ قالىپ وتىردى.

ديسنەي 10 جاسقا تولعاندا ونىڭ اكەسى سۇزەك اۋرۋىنا ۇشىرايدى. فلورا ديسنەي كۇيەۋىنىڭ جانىندا وتىرىپ، ونىڭ كەۋىپ قالعان ەرنىنە  اپەلسيننىڭ بولىكتەرىن ەلياستىڭ اۋزىنا تامشى بولسا دا سوك ءىشسىن دەپ، سىعىپ بەرىپ وتىرادى ەكەن. «بۇل اپەلسيننىڭ بولىكتەرى بىزگە، باۋىرىمىز ەكەۋمىزگە تاڭعاجايىپ بولىپ كورىنەتىن، ءتىپتى ءبىزدىڭ دە سۇزەكپەن نەمەسە ودان دا جامان اۋرۋعا ۇشىراساق ەكەن دەيتىنبىز، سونداعىسى عاجايىپ شىرىننىڭ بىرەر تامشىسىنان اۋىز تيۋ ەدى» — دەپ ەسكە الادى ۋولتتىڭ اپكەسى رۋت.

بەرتىن كەلە، اكەسى اۋرۋىنان ايىعىپ، ولار امەريكاداعى وزگە دە كۇنكورىس ءۇشىن تىنىمسىز كوشىپ-قونۋشىلار سەكىلدى كانزاس سيتيگە كوشۋ تۋرالى شەشىم شىعارادى. وسى كوشۋ ۋولتتىڭ ومىرىنە ايرىقشا اسەر ەتەدى. كانزاس سيتيدە ەرەكشە باي، بيىك قورشاۋعا جاسىرىنعان جانە باۋ-باقشامەن كومكەرىلگەن ءزاۋلىم ءۇي بولادى. ءزاۋلىم ءۇيدىڭ جەكە يەسى بولدى جانە جەرگىلىكتى بالالاردىڭ قۇمارتىپ تۇراتىن ورنى بولدى. بالالاردىڭ بارلىعى قۇپيا تەسىكتەر ارقىلى باققا كىرىپ، باقشادا ويناپ، كەيدە ءتىپتى جەكەجايدىڭ وزىنە كىرىپ، اسەم انفيلادالاردا جۇگىرىپ، ەسكى پورترەتتەردى تاماشالاعىسى كەلەتىن.

ۋولت تا  تالاي رەت جەكەمەنشىك مەكەنگە كىرگىسى كەلگەن، ونىڭ ءار تالپىنىسى ساتسىزدىكتەرمەن اياقتالۋشى ەدى. سول كەزدە ول وسكەن سوڭ بالالارعا ارنالعان الاڭقايلارىمەن، ويناۋعا ارنالعان اۋقىمدى باقشالى ءزاۋلىم ءۇي سالامىن دەپ وزىنە انت بەرەدى. وسىلايشا، قىرىق جىل وتكەن سوڭ ارمان ديسنەيلەندتە ورىندالدى.

ديسنەيدىڭ ەڭ العاشقى جاقىن دوسى ۋولت پفايففەر بولدى. بالالار قالتالارىنداعى بار اقشاعا كينوعا باراتىن. ولاردىڭ كۋميرى چارلي چاپلين بولدى. كينوتەاتردان شىققان سوڭ، ولار كوشە بويىندا كەزەكتەسىپ ءچارليدىڭ ءجۇرىسىن سالىپ، ونىڭ تريۋكتەرىن قايتالاپ جۇرەتىن. سول كەزەڭدە-اق ۋولتتىڭ دوستارى دا، ۇستازدارى دا، ءتىپتى ۋولتتىڭ ءوزى دە اكتەرلىك ونەرگە بارۋ كەرەك دەپ سانايتىن.

1918 جىلدىڭ كۇزىندە جاس جىگىت اسكەري قىزمەتكە بارۋعا تىرىسىپ كوردى. الايدا ۋولتتىڭ جاسى جەتپەگەندىكتەن، ونى المادى. وسى سەبەپتى ۋولت قىزىل كرەستكە ەرىكتى بولىپ تىركەلىپ، مۇحيت اسىپ، جىل بويى جەدەل جاردەم ماشيناسىندا جۇرگىزۋشى بولىپ جۇمىس ىستەيدى. بۇل ماشينا جەرگىلىكتى جەردىڭ ەرەكشە نازارىندا، ياعني ۋولت قىزىقتى سۋرەتتەرمەن كومكەرگەن ماشينا بولدى.

ۋولت ەلىنە ورالعان سوڭ، چيكاگوداعى ونەر ينستيتۋتىنا تۇسەدى، مۇندا ول ءوز تالانتىنىڭ قىرى جوبالاردى پايىمداۋ مەن ۇيلەستىرۋ سالاسىندا ەكەنىن ۇعىنادى. ول سول عيماراتتان تەزىرەك قۇتىلعانشا اسىعىپ، ءوز جۇمىسىن باستاۋدى قالايدى. ول ءوزىنىڭ بار بولمىسىن سۋرەت سالۋعا ارناۋ ءۇشىن، وسى وقۋ ورنىن جىلدام اياقتاۋدى ارماندايدى.

اقىر اياعىندا ول وقۋ ورنىن ءتامامدايدى. بىردەن جاس سۋرەتشى  ديسنەيدىڭ الدىندا قايدا بارىپ جۇمىس ىستەۋ كەرەك دەگەن قيىن سۇراق تۋىندايدى. ول الدىمەن كوڭىلدى جارنامالىق سۋرەتتەردى ماڭدايشا جازۋعا سالاتىن رەستوراندىق فيرمالاردىڭ بىرىنە جۇمىسقا تۇرادى. ونىڭ ديرەكتورى ديسنەيدى ارەڭ دەگەندە جۇمىسقا الادى دا، اپتاسىنا بار بولعانى 50 دوللار عانا تولەپ وتىرادى.  

«Walt Disney Company» قۇرىلۋى

مۋلتيپليكاسياعا ەرەكشە قىزىققان ۋولت ديسنەي ءوزىنىڭ كانزاسىنان كەتۋدى ۇيعارادى. ءسويتىپ 1923 جىلى بىرنەشە سۋرەتى، ءبىر دايىن انيماسيالىق-ويىندىق ءفيلمى جانە قالتاسىنداعى 40 دوللارى بار ول، گولليۆۋدقا جول تارتتى.

مۋلتفيلم جاساۋ تۋرالى يدەيا وعان تىنىم بەرمەدى. «مەن ءبىر ستۋديادان ءبىر ستۋدياعا، ونداعى بار كابينەتتەردى تۇگەلدەي دەرلىك، كادرلار بولىمىنەن باستاپ، ءتۇسىرۋ الاڭدارىنا دەيىن ارالاپ شىقتىم. مەن يە بولعان جالعىز جۇمىس ءستاتيستتىڭ جۇمىسى بولدى. مەن اتتىڭ ۇستىندە بىرنەشە مەتر جەردى وزگە دە ستاتيستتەرمەن بىرگە ءجۇرىپ ءوتۋىم كەرەك بولدى. الايدا، قاتتى جاڭبىر بولدى دا، ءتۇسىرۋدى باسقا كۇنگە قالدىردى، ودان سوڭ ءبىزدىڭ ساحنالىق كورىنىسىمىزدى سەنارييدەن مۇلدەم الىپ تاستادى. بۇل مەنىڭ اكتەرلىك مانسابىمنىڭ سوڭى بولدى» — دەپ ديسنەي ءوزىنىڭ ەستەلىكتەرىندە جازادى.

گولليۆۋدتان جۇمىس تابۋدان ءۇمىتى ۇزىلگەن ۋولت ءوزىنىڭ روبەرت اعاتايىنىڭ گاراجىن جالعا الادى. نەگىزىندە جالعا الۋ — اسىرا سىلتەۋ. ايتەۋىر گاراجدى پايدالانعانى ءۇشىن ءساتى تۇسكەن كەزدە اقشا تولەيتىنىنە ۋادەسىن بەرەدى. گاراجعا اعاسى رويدان قارىزعا العان اقشاعا ساتىپ العان قاجەتتى بوياۋلار، قىلقالامدار، پروجەكتورلارىن مۋلتفيلم ءوندىرىسىنىڭ قۇرالدارىن ورنالاستىرادى. روي ۋولتتىڭ سەرىكتەسى بولادى (رويدىڭ ۇلەسى $250 قۇرايدى، تاعى قارىزعا الىنعان $500 بار) جانە ولار مۋلتفيلم ستۋدياسىن قۇرىپ، ونى «ديسنەي برازەرز كارتۋن ستۋديو» («Disney Brothers Cartoon Studio») دەپ اتايدى.

بەرتىن كەلە، رويدىڭ الدىندا اۋقىمدى ماسەلە تۋىندايدى: جۇمىسقا جان-تانىمەن كىرىسكەن باۋىرىن قالاي جانە نەمەن تاماقتاندىرامىن دەپ باسى قاتادى. ادەتتە، روي گاراجدان كەتىپ، باۋىرى ەكەۋىنە ارنالعان تۇسكى اس دايىندايتىن كىشكەنتاي بولمەگە باراتىن. كەنەتتەن، تۇرمىستىق قيىندىققا باس قاتىرمايتىن ۋولت، ۇرىس شىعارىپ، ابدىراپ قالعان رويعا ءدامسىز دايارلانعان تاماعى ءۇشىن ايقاي سالادى. سول كەزدە روي «شەشۋشى قادامدى» جاسايدى: ول ءوزىنىڭ سۇيىكتى قىزى ەدنە فرەنسيسكە ۇسىنىس جاسايدى، ول ءساتسىز تاماق ءپىسىرۋشى رويدىڭ ايەلى اتانىپ، اعايىندىلاردىڭ قاسىنا كوشىپ كەلەدى دە، ۇزاق ايلار بويى ولارعا تاماق ءپىسىرۋشى بولادى.

بۇل كەزدە ۋولتتىڭ ءوزى دە ۇيلەنۋ تۋرالى ويلانىپ جۇرگەن بولاتىن. ولاردىڭ ستۋدياسىنا قوسىمشا جۇمىسقا ليلليان باۋندس ەسىمدى تاماشا قىز تۇردى. ول كوبىندە بوياۋلاردى قۇيۋمەن اينالىساتىن، ياعني ۋولتتىڭ قالامىنان شىققان پەرسوناجداردى بويايتىن. ۋولت ليلليان ءۇشىن كوپ تەر توككەن جوق، سەبەبى ول قىز بىردەن ءوزىنىڭ «باستىعىنا» عاشىق بولىپ ۇلگەرگەن ەدى. باستىعى ءبىر تيىنسىز قالعان كەزدەرى ءوزىنىڭ ادال جولمەن تاباتىن 15 دوللارىنان دا ستۋديانىڭ پايداسىنا قالسىن دەپ باس تارتاتىن.

ۋولت العاشقى ءمۋلتفيلمىنىڭ يدەياسىن ماكس فلەيشەردىڭ مۋلتيپليكاسيالىق كارتينالارىنان الدى. فلەيشەردىڭ قىزىقتى تاسىلدەر قولداناتىنىن ياعني، مۋلتيپليكاسيالاردى شىنايى تۇردە تۇسىرۋمەن ۇشتاستىراتىنىن كوردى. ناقتىراق ايتقاندا، مۋلتيپليكاسيالىق باتىر شىنايى ومىرگە تۇسكەندەي بولادى. الايدا، ديسنەي فلەيشەردىڭ جاڭاشىل باعىتىن كوشىرمەدى. ول بارلىعىن باسقاشا جاسادى — ول شىنايى باتىردى مۋلتيپليكاسيالىق الەمگە جەتەلەپ، ودان دا قيىنىن جاسادى. الدىمەن سيۋجەت تاڭداۋ كەرەك بولدى (سەناريي ويلاپ تابۋ). ۋولت بالا كەزىنەن «اليسا عاجاپتار الەمىندە» كىتابىن جاقسى كوردى، سول سەبەپتى دە وسى پەرسوناجدىڭ كىشكەنتاي اليسا قىزدىڭ قاتىسۋىمەن مۋلتفيلم قويۋدى شەشتى.

بۇل مۋلتفيلممەن جۇمىس جاساۋ ءۇشىن ءبىرشاما شىدامدىلىق قاجەت بولدى. ۋولت ۇزاق ۋاقىت بويى تۇندەلەتىپ ۇيىقتاۋعا دا مۇرشاسى بولماي، جاڭادان باستاۋشى ەكى سۋرەتشى جالدايدى. ولار ديسنەيمەن بىرگە ونەر مەكتەبىندە بىرگە ءبىلىم العان ەكى دوسى — رۋدولف ايزينگ جانە حيۋ حارمان، «بوسكونىڭ قىزىقتارى»، «ايۋ بارني» جانە «قۋانىشتى ۇيلەسىم» اتتى مۋلتيپليكاسيالىق سەريالاردىڭ بولاشاق اۆتورلارى بولاتىن. ديسنەي بۇل ەكى جىگىتكە ءوزىنىڭ مۋلتيپليكاسيالىق فيلمگە دەگەن تالاپتارىن ءتۇسىندىرىپ، سوڭىندا جۇمىسى شىنىمەن قىزا باستايدى.

وسى مۋلتفيلم ءۇشىن ءبىرشاما اقشا العان سوڭ، ۋولت پەن روي ستۋديا اتاۋىن وزگەرتۋدى شەشتى. 1923 جىلدىڭ 16 قازانىندا ۋولت ديسنەي نيۋ-يوركتىق ديستريبۋتور مارگارەت ۋينكلەرمەن كەلىسىمگە قول قويادى. وسى كۇن قازىرگى Walt Disney Company-سىنىڭ نەگىزى قالانعان كۇن بولىپ سانالادى. بۇل اتاۋ اعايىندىلار ءۇشىن ءساتتى بولدى.

ستۋديا اليسا تۋرالى فيلمدەردى ءتورت جىل بويى شىعاردى، بەرتىن كەلە ۋولت انيماسيالىق فيلمدەر شىعارۋعا كوشۋدى ۇيعارادى. جاڭا سەريانىڭ جۇلدىزى ۋولت ديسنەي ويلاپ تاپقان جانە سۋرەتىن سالعان وسۆالد اتتى قىزىقتى قويان بولادى. بار بولعانى ءبىر جىل ىشىندە قويان تۋرالى قىزىقتى 26 سەريا شىعارىپ، جاڭا ماۋسىمىن باستايتىن كەزدە، ۋولت پىسىق مارگارەت ۋينكلەردىڭ ستۋدياداعى ءتورت سۋرەتشىنى ارباپ العانىن، ياعني وسۆالد تۋرالى ءمۋلتفيلمدى ونىڭ قۇرۋشىسىسىز ءتۇسىرۋدى جوسپارلاپ وتىرعانىن بىلەدى. وكىنىشتىسى سول، جاسالعان كەلىسىم بويىنشا مۋلتيپليكاسيالىق كەيىپكەر تۋرالى قۇقىققا اۆتور ەمەس، ديستريبۋتور يە بولاتىن. بۇل ديسنەي ءۇشىن اششى ءارى پايدالى ساباق بولدى، سالدارىنان ءوزى جاساعان دۇنيەنىڭ بارلىعىنا اۆتورلىق قۇقىقتىڭ تەك وزىنە تيەسىلى بولۋىنا ىجداھاتتىلىقپەن قارايتىن بولدى.

ميككي ماۋس ءداۋىرىنىڭ باستاۋى

ديسنەي وسۆالدتان ايىرىلىپ قالعان سوڭ، ءوزىنىڭ مۋلتفيلمدەرى ءۇشىن جاڭا جۇلدىز ويلاپ تابۋدان باسقا امالى قالمادى. وسىلايشا ومىرگە ءوزىنىڭ قويان اعاسىنا قاتتى ۇقسايتىن اتاقتى ميككي ماۋس اتتى تىشقان («ونى العاشىندا مورتيمەر ماۋس دەپ اتاعانبىز، ءبىراق بۇل اتاۋ مەنىڭ ايەلىم ليلليانعا ۇناماي، ونى جاي عانا ميككي دەپ اتاۋدى ۇسىندى. مۇنداي ۇساق-تۇيەككە بولا وعان قارسىلىق بىلدىرگىم كەلمەدى — وسىدان سوڭ مەنىڭ كومپانياما بۇكىل الەمدىك اتاقتى اكەلگەن ميككي ماۋس دۇنيەگە كەلدى» — دەپ ەسكە الادى ديسنەي.) دۇنيەگە كەلدى. ونى جاساۋعا ديسنەيدىڭ ءوزى مەن ونىڭ ستۋدياسىنىڭ باس سۋرەتشىسى اب يۆەركس قاتىستى.

دەگەنمەن، ستۋديا ميككي ماۋستىڭ قاتىسۋمەن تۇسىرىلگەن ەكى ءمۋلتفيلمدى ساتا المادى: ول مۋلتفيلمدەر دىبىسسىز بولاتىن، ال كينوتەاترلارعا ول كەزدە دىبىس كەلىپ قويعان ەدى. ول كەزدە ستۋديالار مۋلتفيلدەردى جىلدام-اق جاساپ شىعاراتىن، ونىڭ ۇستىنە ديسنەيدىڭ ستۋدياسى ءالى تولىق كاسىبي بولا قويماعان ەدى. 1927 جىلى دىبىستى كينو شىعا سالىسىمەن، ۋولت كينەموتوگراف ارىپتەستەرىنىڭ تاجىريبەسىن ءوزى قولدانا باستاپ، مۋلتفيلمدەرىن دىبىستادى. وسى سەريانىڭ ءۇشىنشى ءفيلمى (دىبىستالعان) ەكراندارعا 1928 جىلعى قاراشانىڭ 18-دە شىقتى، ءدال سول كۇن ميككي ماۋس ءداۋىرىنىڭ باستالعان ءساتى بولدى.

ونىمەن بىرگە ۋولت ديسنەي وندىرىسكە اقىماق سيمفونيالاردىڭ جاڭا سەرياسىن ۇسىندى. ول باسقا پرينسيپتەرگە نەگىزدەلگەن: ءاربىر فيلمدە ستۋدياداعى سۋرەتشى-مۋلتيپليكاتورلاردى شىعارماشىلىق تۇرعىدا قاناتتاندىرىپ وتىراتىن جاڭا پەرسوناجدار پايدا بولىپ وتىردى. بۇل سەريا ديسنەيدىڭ سۋرەتشىلەرى ءۇشىن اۋقىمدى جوبالاردا مۋلتيپليكاسيانىڭ جاڭا تەحنيكالارىن پايدالانۋ الدىنداعى جاتتىعۋ الاڭى بولعان سياقتى. سوعان قاراماستان ءدال وسى ءمۋلتفيلمنىڭ سەرياسى 1932 جىلى ستۋديانىڭ العاشقى وسكارىن ۇزدىك سالىنعان فيلم رەتىندە الدى. وسى ساتتەن باستاپ سوعىسقا دەيىنگى ونجىلدىقتار بويى ديسنەيدىڭ مۋلتفيلمدەرى جىل سايىن وسكار سىيلىعىن الىپ وتىردى. ول ءوزىنىڭ جۇمىستارى ءۇشىن وسىنداي 29 جۇلدە العان.

ديسنەيدىڭ بار شىعارماشىلىعىنىڭ تاقىرىبى — زۇلىمدىقپەن كۇرەس. ديسنەي باقىتتى فينالداردى جاقسى كوردى جانە بارلىق پەرسوناجدارىنا ءوزىنىڭ دۇنيەتانىمىنىڭ كەڭىستىگىن مەكەندەتتى. وسىلايشا ول ءوزىنىڭ ءيميدجىن ونەگەلى تازا ادام رەتىندە كورسەتە ءبىلدى. ال باسىندا ول كانىگى شىلىمقور، ءتىپتى ماسكۇنەمدىكە جاقىن بولاتىن. گولليۆۋدتا ونىڭ دولورەس دەل ريو اتتى اكتريسامەن بولعان ماحاببات حيكاياسى بارشاعا ءمالىم ەدى. الايدا بىردە ءبىر رەپورتەر ونىڭ بەدەلىنە نۇقسان كەلتىرە المادى. نەلىكتەن؟ ديسنەي ءبىز ءۇشىن باقىتتى الەمدى قۇرىپ بەردى، سۇمدىقتان ادا شىنايىلىقتى كورسەتتى، ال ونى بۇزۋ اقىماقتىق بولاتىن. «انا، الما پيروگى جانە ديسنەي» بۇل ۇشەۋى امەريكالىق كيەلى «ۇشتىك» دەپ ەسەپتەلدى. ال كيەلىنى قورلاۋعا بولمايدى.

ديسنەي كومپانياسى ءۇشىن مۋلتفيلمدىك پەرسوناجدار قوسىمشا تابىستىڭ جاقسى كوزى بولا الاتىنى انىقتالدى. بىردە نيۋ-يوركتىك بيزنەسمەن ديسنەيگە اۆتوقالامدارعا ميككي ماۋستىڭ سۋرەتىن ورنالاستىرۋ ءۇشىن رۇقساتقا $300 ۇسىنادى. ۋولت ديسنەيگە تاپ سول ساتتە قارجى وتە كەرەك بولاتىن، سوندىقتان ول تىشقان وبرازىنىڭ تارالىمىنا ءوز كەلىسىمىن بەرەدى.

وسىدان سوڭ ميككي ماۋستىڭ جانە ديسنەيلىك وزگە دە كەيىپكەرلەردىڭ پورترەتتەرى بارلىق جەردە كورىنە باستادى: تاباقتاردا، ءتىس شوتكەلەرىندە، ورامالداردا جانە مەكتەپ داپتەرلەرىندە، كامپيت قاعازدارىندا جانە بالالار بولمەلەرىنىڭ ءتۇسقاعازدارىندا كورىنىس تاپتى. 1930 جىلى ميككي ماۋس تۋرالى كوميكستىڭ العاشقى سەرياسى شىقتى. مۇنىڭ بارلىعى جاقسى تابىس اكەلدى، باستىسى، مۋلتفيلم باتىرلارىن تانىتۋعا اتسالىستى جانە ناتيجەسىندە ولاردىڭ كوبىسى امەريكانىڭ ۇلتتىق اڭىزدارىنا اينالىپ كەتۋىنە سەپتىگىن تيگىزدى.

1927 جىلى ۋولت ديسنەي جانە ونىڭ ايەلى ليلليان وزدەرىنىڭ كەڭ پاتەرلەرىنە كوشەدى. ۋولت روجدەستۆوعا سىيلىق رەتىندە ليلليانعا كۇشىك سىيلايدى. ولاردىڭ بالاسى بولماعاندىقتان، كۇشىك ليللياننىڭ سۇيىكتى بالاسىنىڭ ءرولىن وينادى. ديسنەيلىكتەردىڭ ەكى رەت بالالى بولۋعا تالپىنىستارى ساتسىزدىككە ۇشىرادى، ەكەۋىندە دە ليللياندا تۇسىك بولدى. ول ءۇشىنشى رەت جۇكتى بولعاندا مۇراگەرى بولعانىن قالاعان ديسنەيدىڭ ايەلىنە دەگەن قىزىعۋشىلىعى كەنەتتەن جوعالىپ كەتەدى. ۋولتتىڭ اعايىندى اپكەسىنە جازعان ءبىر حاتىندا: «مەنىڭ ايەلىم بار، مەنىڭ بار ماقتانىشىم — مەنىڭ سۇيكىمدى كىشكەنتاي عانا ايەلىم جانە cۇيكىمدى چاۋ-چاۋىم» دەپ جازادى.

1933 جىلى ۋولت پەن ليلياننىڭ قىزى دايانا دۇنيەگە كەلەدى. ۋولت قىزى تۋار الدىندا اناسىنا شاعىمدانعان حات جولدايدى: «ليللي قىز كۇتىپ ءجۇر. مەن وعان ەشقانداي كوڭىل اۋدارمايمىن. تاعى دا كوڭىلىمنىڭ تۇسكەنىن قالامايمىن. ءبىزدىڭ بولمەمىز بالالار بولمەسىنە ۇقساپ كەتتى، ءار جەردە قىزعىلت جانە كوك جورگەكتەر جاتىر… ال مەن بۇل تۋرالى ەشتەڭە ەستىگىم دە كەلمەيدى. مەنىڭشە، الەمدەگى ەڭ ناشار اكە مەن بولاتىن سەكىلدىمىن...» قىزىعى سول، سول ۋاقىتتا 1933 جىلدىڭ سوڭىندا ۋولتتى «پەرەنتس» (اتا-انالار) جۋرنالى امەريكالىق وسكەلەڭ ۇرپاقتى تاربيەلەۋگە قوسقان ۇلەسى ءۇشىن ماراپاتتايدى.

ديسنەي سول 1933 جىلى ءوزىنىڭ العاشقى ءتۇرلى ءتۇستى «ءۇش توراي» اتتى ءمۋلتفيلمىن شىعارادى. ول جەردە ورىندالعان  «ءبىز كوكجالدان قورىقپايمىز» اتتى ءان ۇلتتىق حيت بولادى.

ستۋديا كۇن ساناپ وسەدى. تاعى دا بىرنەشە مۋلتفيلمدەر تۇسىرىلەدى. ميككي ماۋس ميلليونداعان جۇرەكتەردى جاۋلاپ، سونىڭ ىشىندە تەك امەريكالىقتاردى عانا ەمەس، سونىمەن بىرگە ەۆروپالىقتاردى دا باۋراپ الادى. «كوڭىلدى اۋەندەر» تۇسىرىلەدى، ەكرانداردا بارىلداعان دونالد داك، ۇلىعان كۇشىك پلۋتو جانە كولشىكتەن سۋدى كەپسەرمەن ءىلىپ الۋعا تىرىسقان ميعۇلا گۋفي پايدا بولادى. ديسنەي «كولۋمبيا پيكچەرزپەن»، سوسىن «يۋنايتەد ارتيستسپەن» كەلىسىم-شارتقا تۇرادى.

1934 جىلى ۋولت ديسنەي ءوزىنىڭ قىزمەتكەرلەرىنە اقشاقار جانە جەتى گنوم تۋرالى تولىقمەتراجدى مۋلتيپليكاسيالىق فيلم تۇسىرگىسى كەلەتىنىن حابارلايدى. باستاپقىدا بۇل يدەياعا كوبىسى كۇمانمەن قارادى: تىرىدەي اكتەرى بولماعان كارتينانىڭ ۇلكەن كينو سەكىلدى كورەرمەندى قىزىقتىرا الاتىنىنا سەنۋشىلەر از بولدى. الايدا ديسنەيدىڭ ويى قۇر قيال ەمەس ەكەنىنە سەنىپ، جۇمىس قايناپ كەتەدى.

ءفيلمنىڭ ءتۇسىرىلىمى ءۇش جىلعا سوزىلادى جانە سول كەزەڭدەگى باس اينالدىرارلىقتاي $1،499 ملن جۇمسالادى. ديسنەيدى تاقىرعا وتىرعىزباي امان الىپ قالعان «Bank of America» نەسيەسى بولدى، ونىڭ باسشىسى — امادەو دجاننيني ميككي ماۋستى وتە قاتتى جاقسى كورەتىن ەدى. ءفيلمنىڭ ناتيجەسى كەتكەن شىعىندى اقتادى، ويتكەنى اقشاقار ۇزاق ۋاقىت بويى بارلىق كەزەڭنىڭ ەڭ جوعارى كاسسالىق ءفيلمى بولدى (ونىڭ رەكوردىن تەك قانا جەلمەن عايىپ بولعاندار جاپتى). ال 1939 جىلى ۋولت ديسنەي وسى تولىقمەتراجدى ءفيلمى ءۇشىن سانى بويىنشا توعىزىنشى «وسكار» جۇلدەسىنە يە بولدى. ديسنەيدى وسى ماراپاتتاۋ بارىسىندا، ول تولىققاندى مۇسىننەن بولەك تاعى دا گنومدار سانى بويىنشا سيمۆوليكالىق كىشكەنتاي جەتى «وسكار» العانىن ەسكەرۋ كەرەك. سودان بەرى ديسنەيدىڭ ستۋدياسى باستى ءارى الەۋەتتى تابىس اكەلەتىن وسى تولىقمەتراجدى مۋلتفيلمدەر دەپ سانايدى.

ستۋديامەن بىرگە ديسنەيدىڭ دە وتباسى ۇلعايا باستايدى. انا بولۋدا تاعى دا ساتسىزدىككە ۇشىراعان ليلليان بالا اسىراپ الۋ تۋرالى شەشىم قابىلدايدى. 1937 جىلى ۋولت پەن ليلليان وزدەرىنە كىشكەنتاي قىزدى الىپ، ونىڭ اتىن شەرون مەي ديسنەي دەپ قويادى.

قارجى ۇلعايا تۇسەدى. ديسنەيدىڭ جۇمىسىنا «ۇلى دەپرەسسيا» ەشقانداي دا اسەر ەتپەدى. ستۋديادا سول ساتتە ءبىرشاما ەرەۋىلدەر بولىپ وتكەن ەدى، ستۋدياداعى سۋرەتشىلەر وزدەرىنەن ناشار سالاتىن سۋرەتشى جانە ماردىمسىز ءبىلىمى بار (كوللەدجدىڭ ءبىر جىلى)، سولاي بولا تۇرا ءوزىن رەجيسسەرمىن دەپ سانايتىن باستىقتىڭ قاراماعىندا جۇمىس ىستەگىسى كەلمەيدى. ەرەۋىل تەز ارادا تاراپ كەتتى، شىندىعىنا كەلگەندە ەرەۋىلدىڭ باستى سەبەبى ديسنەيمەن بىرگە رەسمي تۇردە قوسىمشا اۆتور بولۋعا تالاسقان ۋولتتىڭ پروديۋسەرلەرمەن ارازدىعى بولاتىن.

بايلىعى ارتقان ۋولت اتا-اناسىنا ءزاۋلىم ءۇي ساتىپ اپەرەدى. جەكەجايدىڭ كەمشىلىگى سول، بىرنەشە زياندى تۇسى تابىلادى، ياعني گازبەن جىلىتۋ جۇيەسى ءقاۋىپ توندىرەتىن جاعدايدا تۇرعان ەكەن. 1938 جىلدىڭ قاراشا ايىنىڭ تاڭىندا تۇرعىن ءۇيدىڭ ىشىندەگى قۇبىردان ءيىس شىعىپ، ءبىزدىڭ باتىرىمىزدىڭ اناسى فلورا ديسنەي ەستەن تانىپ، ەدەنگە قۇلايدى، ەلياس ديسنەي ونى تۇرعىزباقشى بولىپ جۇرگەنىندە ءوزى دە گازدىڭ ءقاۋىپتى مولشەرىمەن ۋلانادى. ەلياس امان قالادى دا، ال فلورانى قۇتقارۋ مۇمكىن بولمايدى. اناسىنىڭ ولىمىنەن سوڭ، ۋولت ۇزاق ۋاقىت بويى ءوزىن ايىپتاپ جۇرەدى، ول ويتكەنى جىلىتۋ جۇيەسىنىڭ بۇزىلىپ تۇرعانىن بىلە تۇرىپ، بۇل ماسەلەنى شەشۋدى كەيىنگە قالدىرا بەرگەن بولاتىن.

ەكىنشى دۇنيەجۇزىلىك سوعىس كەزىندە تۇسىرىلگەن اقشاقار سەكىلدى تابىس اكەلەتىن مۇمكىندىگى بار پينوككيو، فانتازيا، دامبو مەن بەمبي ديسنەي كۇتكەن تابىستى اكەلمەدى. ستۋدياعا سوعىس كەزىندە اقش مەملەكەتتىك دەپارتامەنتىنىڭ تاپسىرىسى بويىنشا اسكەريلەر ءۇشىن ۇگىت-ناسيعاتتىق جانە وقىتۋ فيلمدەرىن تۇسىرۋگە تۋرا كەلدى.

الايدا، جامان نارسەنىڭ ءبارى ءبىر كەزدە اياقتالاتىنى انىق قوي. 50ء-شى جىلداردىڭ باسىندا Disney Company سوعىس جىلدارى سەبەبىنەن جوعالتىپ العان شەتەلدىك نارىققا قايتا كىرىپ، تولىقمەتراجدى فيلمدەردى ءتۇسىرىپ، شىعارا باستايدى، ءتىپتى ءتىرى اكتەرلەر قاتىسقانىن دا.

1954 جىلى Disney Company اقش-تا تەلەباعدارلامالاردى العاشقىلاردىڭ ءبىرى بولىپ شىعارا باستايدى دا، مۇندا الدىمەن اق-قارالى، بەرتىن كەلە ءتۇرلى ءتۇستى تەليەۆيدەنيەنى وركەندەتەدى. ديسنەيدىڭ تەليەۆيزيالىق العاشقى ءحيتى ديسنەيلەند سەريالى بولدى، ول بىرنەشە رەت اتاۋىن وزگەرتە وتىرىپ، امەريكا ەكراندارىندا 29 جىل بويى كورەرمەنگە تەك ەڭ ىعايلى ۋاقىتتا كورسەتىلەدى. جىل وتكەن سوڭ اتاقتى ميككي ماۋس كلۋبىنىڭ باعدارلاماسىنىڭ دەبيۋتى وتەدى، مۇندا كوپتەگەن امەريكالىق شوۋ-بيزنەس وكىلدەرىنىڭ تۇساۋى كەسىلدى.

ديسنەيلەند — كەز-كەلگەن جاستاعى بالالار ءۇشىن ارماندار ەلى

ۋولت ديسنەيدىڭ تالانتى كينو جانە تەلەبيزنەس اياسى شەڭبەرىنەن اسىپ جاتتى. وعان كەلەسىدەي قىزىعۋشىلىقتى اكەلىك تاجىريبەسى ۇيرەتتى. ول قىزدارىمەن جانۋارلار باعىنا، كارناۆالدارعا جانە ساۋىق-سايراندىق ورىندارعا ءجيى باراتىن. بالالارى اتكەنشەكتەردە ويناپ جۇرگەندە، اكەسى ساكىدە وتىرىپ، قىزدارىنىڭ اسىر سالىپ ويناپ بىتكەنىن كۇتەتىن. وسىنداي وتىرىستاردىڭ بىرىندە امەريكادا ۇلكەندەر دە، كىشكەنتاي بالالار دا كوڭىلدى ۋاقىت وتكىزەتىن جەردىڭ جوق ەكەنىنە كوزى جەتەدى. سول كەزدە ديسنەي وسىنداي جەردى ءوزى سالۋدى ۇيعارادى.

العاشقى ديسنەيلەند 1955 جىلدىڭ 17 شىلدەسىندە لوس-اندجەلەستىڭ وڭتۇستىگىندەگى اناحايم قالاسىندا (كاليفورنيا شتاتى) اشىلدى. ونىڭ قۇرىلىسىنا $17 ملن جۇمسالىپ، سالىنعان قارجىسى تەز ارادا ون ەسە مولشەردە قايتارىلدى. پارك اشىلعان سوڭ 25 جىلدىڭ ىشىندە 200 ملن-نان استام ادام كەلدى. 1983 جىلى ديسنەيلەند توكيودا جانە 1992 جىلى پاريجدە ءوز ديسنەيلەندتەرى اشىلدى.

پاركتىڭ اشىلۋىنا 28 مىڭ ادام كەلدى. سونىمەن قاتار وسى اتى شۋلى مەرەكەنى توقسان ميلليوننان استام تەلەكورەرمەن تىكەلەي ەفيردەن تاماشالايدى. العاشقى ديسنەيلەندتىڭ اشىلۋ سالتاناتىن اقش-تىڭ بولاشاق پرەزيدەنتى اكتەر رونالد رەيگان جۇرگىزگەن.

بۇل ءوزى سونى ءارى ەشتەڭەگە ۇكسامايتىن، نەگىزگى ءتورت قاعيدات بويىنشا سالىنعان ساياباق ەدى.

— جالپى يدەياسى — ۋولت ديسنەي مۋلتفيلدەرىنىڭ سىيقىرلى پاتشالىعىن بۇرىنعى قالپىنا كەلتىرۋ.

— بۇعان ساياباققا كەلگەندەر، مىسالى، دجۋنگلي ىشىندە ءجۇزىپ بارا جاتقانداي، نەمەسە الدارىنان ءارۋاقتار شىققانداي، نەمەسە تەڭىز تۇبىندەگى سۇڭگۋىر قايىقتىڭ ىشىندە وتىرعانداي اسەردە بولاتىن ءار الۋان جانە جاڭا تەحنيكالىق تريۋكتەردى قوسۋ.

— ارنايى تاقىرىپتىق جوسپار بويىنشا قۇرىلعان توڭىرەككە قىزىقتى سەرۋەندەر قۇرۋ.

— ساۋىق-سايراندىق ساياباق بارلىق وتباسى ءۇشىن دەمالاتىن ورىن بولۋى شارت بولدى، مۇندا باستى نازار قاۋىپسىزدىككە، سىپايىلىققا جانە تازالىققا اۋدارىلدى.

«وسى باقىتتى مەكەنگە كەلگەندەردىڭ بارلىعىنا — قوش كەلدىڭىزدەر دەيمىز. ديسنەيلەند بۇل سىزدەردىڭ ەلدەرىڭىز. مۇندا قارتتاردىڭ ەستەلىكتەرى جاندانادى، مۇندا جاستار بولاشاق سىندارىن جانە ۋادەسىن يگىلىگىنە جاراتا الادى. ديسنەيلەند بۇكىل الەم ءۇشىن قۋانىش پەن شاتتىقتىڭ قاينار كوزى بولادى دەگەن ۇمىتپەن امەريكانى قۇرعان يدەالدارعا، ارماندارعا جانە شىنايى وقيعالارعا ارنالادى…» ۋولتەر ديسنەي، 17 شىلدە، 1955 جىل.

ديسنەيدىڭ كەلەسى ماڭىزدى جوباسى لوس-اندجەلەسكە جاقىن ماڭداعى 1961 جىلى نەگىزى قالانعان كاليفورنيا ونەر ينستيتۋتى بولدى. مۇندا مۋزىكا، بەينەلەۋ ونەرى، تەاتر، ءمۇسىن ونەرى، كينەماتوگرافيا، ءسان ونەرى وقىتىلدى.

ديسنەي 1963 جىلى ح جوباسى اتتى ءورشىل يدەياسىن جۇزەگە اسىرۋعا كىرىستى. ءوز ادامدارىنىڭ كومەگىمەن وزىنە قاجەتتى جەر تەلىمىن ىزدەستىرىپ، ويدان شىعارىلعان كومپانيالار اتىنان جەردى (جەر تەلىمدەرىنىڭ يەلەرى جەر قۇنىن كوتەرمەۋى ءۇشىن وسىنداي شارا قولدانعان) بولشەكتەپ ساتىپ الادى. وسىلايشا، Walt Disney Companۋ يەلىگىندە ەكى مانحەتتەن سىيىپ كەتەتىندەي جەر تەلىمى پايدا بولدى. وسى جەردە كەيىننەن The Walt Disney World اتاۋىن العان جاڭا پاركتىڭ قۇرىلىسى باستالدى. ول 1971 جىلدىڭ قازان ايىندا اشىلدى.

ازدى-كوپتى جۇزەگە اسىرىلعان يدەيالارىمەن، «بولاشاقتىڭ قالاسىن» جانە ۋولت ديسنەي اتىنداعى «شىعارماشىل جاستارعا ارنالعان ۋنيۆەرسيتەتىن» سوڭىندا قالدىرعان ۋولت ديسنەي 1966 جىلدىڭ 15 جەلتوقسانىندا وكپەنىڭ قاتەرلى ىسىگىنەن قايتىس بولدى. ونىڭ ورنىندا اعاسى روي قالادى دا، ول Walt Disney Company 1971 جىلعا دەيىن باسقاردى. روي قازا تاپقان سوڭ، كومپانيانى ءۇش ادام، ياعني اعايىندى ديسنەيلىكتەر الدىن الا باسشىلىققا دايىنداعان — كارد ۋوكەر، دونن تەيتۋم جانە  رون ميللەر باسقاردى. ۋولت ديسنەي مۇراگەرلەرىنە ءوزى جۇزەگە اسىرىپ ۇلگەرمەگەن كوپتەگەن جوبالار مەن يدەيالار قالدىرادى. كومپانيا ولاردى بىرتىندەپ ىسكە اسىرا وتىرىپ، الداعى جيىرما جىل بويى ۋولت نەگىزىن قالاعان كومپانيانىڭ ەشبىر كەدەرگىسىز الەمدىك ويىن-ساۋىق وندىرىسىندەگى جەتەكشى ورىننان تۇسپەۋىنە ىقپال جاسادى.

ۋولت ديسنەيدىڭ جەكە قاسيەتى مەن ونىڭ جەتىستىگىنىڭ قۇپيالارى

ۋولت ديسنەي جەتىستىگىنىڭ قۇپياسى — ونىڭ ەرىك-جىگەرىندە، وراسان باتىرلىعى مەن قايسارلىعىندا جاتىر. ول جەڭىلىس تاباتىنىن ءبىلىپ تۇرسا دا بەرىلمەۋشى ەدى. ول ءوزىنىڭ يدەيالارىنا سەندى جانە دۇرىس شەشىمدەر قابىلداي ءبىلدى. ديسنەي ەرتە باستان-اق وزگەلەردىڭ پىكىرىمەن ساناسپاۋدى ۇيرەندى. ديسنەيدىڭ بيلىگى وعان ساراپشىلاردىڭ پىكىرىمەن كەلىسپەۋگە مۇمكىندىك بەرەتىن ءوزىن سىيلاۋشىلىعىمەن اجىراماستاي بايلانىستى.  ونىڭ تۋىندىلارى ءاردايىم تابىستى بولا بەرمەدى، ءبىراق تابىستى بولىپ جاتسا، الەمدى ءدۇر سىلكىندىرەتىن تابىس بولىپ وتىردى.

ۋولت ديسنەي Walt Disney Company جەتىستىگىنىڭ كۇپيالارىمەن قۋانا ءبولىسىپ جۇرەدى:

1. ءوز ارماندارىڭىز جۇزەگە اسۋى ءۇشىن ءوز ۇيىمىڭىزدىڭ ءاربىر مۇشەسىنە ارمانداۋعا جانە شىعارماشىلىق تۇرعىدا جەتىلۋگە مۇمكىندىك بەرىڭىز.  

2. ءوز كليەنتتەرىڭىزدى قوناقتارىڭىزداي كورىڭىز.  

3. ءوز پىكىر-پايىمدارىڭىز بەن قاعيداتتارىڭىزدان تايماڭىز.  

4. قىزمەتكەرلەرىڭىزدى قولداپ وتىرىڭىز، ولارعا قۇزىرەت بەرىپ، سىياقى تولەڭىز.

5. نەگىزگى جەتكىزۋشىلەرمەن جانە سەرىكتەستەرمەن ۇزاقمەرزىمدى قارىم-قاتىناس قۇرىڭىز.  

6. جوسپارلاۋ جانە كوممۋنيكاسيا پروبلەمالارىنىڭ ءتۇيىنىن اعىتۋ ءۇشىن كادرعا ءبولۋ (story-boarding) تەحنيكاسىن قولدانىڭىز.  

7. ۇنەمى وتكىزىلىپ تۇراتىن قارقىندى ترەنينگتەر كورپوراتيۆتىك ادەپتى نىعايتادى.  

8. ۇساق-تۇيەكتەرگە مۇقيات بولىڭىز.  

9. جاڭا يدەيالاردى ىسكە اسىرۋ ءۇشىن جاقسى ويلاستىرىلعان تاۋەكەلگە بارۋدان قاشپاڭىز.  

10. ۇزاقمەرزىمدى جوسپاردى قىسقامەرزىمدى اتقارۋمەن ۇيلەستىرىپ وتىرىڭىز.  

ديسنەي گيگانتومانياعا شالدىققان پرومەتەي تۇرپاتتى ادامدار قاتارىنا جاتادى. ونىڭ بۇل قاسيەتتەرى كەز كەلگەن مۇمكىندىكتى اسقان قۇلشىنىسپەن پايدالانىپ قالۋعا مۇمكىندىك بەردى. كەلەشەك ءۇشىن ديسنەي، وسى شاقتى تارك ەتۋگە جانە جاڭا نارسەلەردى ويلاپ تابۋعا، اسىرەسە بۇنداي مۇمكىندىك تۋىپ تۇرعان كەزدە، بەيىم بولدى. جانە دە ونىڭ تۋىندىلارىنا اقشا قايدان شىعارىنا ول باس قاتىرمايتىن. مىنەزىنىڭ وسى ەرەكشەلىكتەرىنىڭ ارقاسىندا ديسنەي مۋلتيپليكاسيا جاۋھارلارىن جاساپ شىقتى، ولاردىڭ كەيبىرى ءوز ءداۋىرىنىڭ ەڭ قۇندى فيلمدەرىنە اينالدى. ءبىراق بۇل ستۋديانى جىلدار بويى بانكروت بولۋدىڭ ءسال الدىندا ۇستاپ تۇردى. بۇل كەزەڭدە فيرما شوت بويىنشا اقىسىن تولەي الماي قالۋى ءۇشىن ءبىر جارىم جىل دا وتپەيتىن. ديسنەيگە كاسسالىق فيلمدەر ءتۇسىرۋ قىزىق بولعان جوق، ول ءوز فيلمدەرىنىڭ شىعارماشىلىق تۇرعىدا تابىستى بولۋىنا مۇددەلى بولدى. سوندىقتان، ونىڭ ءبىر لەنتاسى حيتقا اينالىپ، ەكىنشى بىرەۋى بىت-شىتى شىعىپ ساتسىدىككە ۇشىراپ وتىردى.  

ۋولت ديسنەيدىڭ بۇكىل ءومىرى امەريكالىق توبەشىكتەرگە ۇقساس بولدى — ەڭ ءبىر ءونىمدى كەزەڭدەردەن سوڭ، ادەتتە تراگەدياعا تولى قۇلدىراۋلار بولدى. ءومىرىنىڭ جارقىن كەزەڭدەرىندە ديسنەي كۇنى بويى ءۇزىلىسسىز جۇمىس ىستەپ، تۇندە دە توقتامايتىن. جوبا سوڭىنا تاقاعان كەزدە ۋولت ستۋدياسىندا قونىپ قالا بەرەتىن. ءبىراق ونىڭ جوبالارى ءساتسىز شىققان نەمەسە اياقتالا باستاعان كەزدە ديسنەي دەپرەسسياعا ۇشىرايتىن نەمەسە جۇيكەسى سىر بەرەتىن. ءوز مانسابىندا ول سەگىز رەت جۇيكەسىن جۇقارتتى.   

ۋولت ديسنەي — امەريكانىڭ اڭىزى ءارى ۇلتتىق قاھارمانى. ول ادامدارعا قۋانىش پەن باقىت سىيلادى، ونىڭ ءتىلىن بارلىق حالىقتار تۇسىنەدى.

وقۋعا كەڭەس بەرەمىز:

كونوسۋكە ماسۋسيتانىڭ ءومىرى مەن جەتىستىككە جەتۋ تاريحى

نەمىس ءدارىحاناسىنان الەمدىك كوسمەتيكا يمپەرياسىنا دەيىن: Schwarzkopf تاريحى

Honda ماركاسىنىڭ تاريحى

ۇرەي پاتشاسى – الفرەد حيچكوك

ناپولەون بوناپارت — بۇكىل ەۋروپا يمپەراتورى

بالىق اۋلاۋعا دەگەن قىزىعۋشىلىق HARLEY-DAVIDSON كومپانياسىن قۇرۋعا سەبەپ بولعان

دجەك ما: ەگەر 35 جاسىڭىزدا ءسىز ءالى دە كەدەي بولساڭىز – وندا ءسىز بۇعان لايىقتىسىز

ازيانىڭ ەڭ باي ادامدارىنىڭ ءبىرى دجەك مانىڭ جەتىستىككە جەتۋ تاريحى

الەمدەگى ەڭ جانى ءسىرى اكتەر — دجەكي چاننىڭ ءومىرى مەن تاعدىرى

يلون ماسك دەگەن كىم جانە الەمنىڭ وزگەرۋىنە قانداي ىقپالى بار؟

دين كارنازەس — شارشامايتىن جەلاياق

ۋوررەن باففەتت: تابىستى ينۆەستور

ميللياردەر اتانعان 5 بەيباق

ءديناميتتىڭ اتاسى: نوبەل

توماس ەديسون: 19 عاسىردىڭ تالانتتى بيزنەسمەنى

Samsung كومپانياسىنىڭ تاريحى: كورەيا تەحنيكاسى

30 جاستاعى ميلليونەر سەم التماننان كەڭەستەر

ماحمۇد عازناۋي

ستيۆەن ۆوزنياك

---