ۇستازدان ۇستازعا قۇرمەت!
ءار ساباعى بولىپ ءوتىپ تاعىلىم،
ءار شاكىرتتىڭ وياتاتىن تانىمىن.
مەيلى، ەسەيىپ كەتسە دە سول ۇل-قىزى،
ساناسىندا جۇرە بەرەر ءالى كۇن،
ۇستاز دەگەن – مارتەبەلى ءبىر ەسىم.
ءومىرىنىڭ ماعىنالى شاقتارى
مەكتەپ بولىپ، سودان باقتى تاپقانى.
ۇستاز دەگەن – سول ۇيانىڭ جۇرەگى،
ۇستاز دەگەن – سول ۇجىمنىڭ ماقتانى.
(ۇستازدىق قىزمەتتەن قۇرمەتتى دەمالىسىنا شىعىپ جاتقان ۇستازعا كەيىنگى بۋىن ارىپتەسىنىڭ قۇتتىقتاۋ ءسوزى)
قۇرمەتتى ۇستاز!
ءوزىڭىز دە ءبىر كەزدەگى ءومىر جولىڭىزدا وسىناۋ مەكتەپتىڭ تابالدىرىعىنان جاس ۇستاز بولىپ اتتاعان ەدىڭىز. وسى ءبىر كەزدەرىڭىز تۋرالى سان رەت ويلانعانىمىزدا وزىڭىزدەن كەيىن كەلگەن ارىپتەستەرىڭىز – بىزدەر ءۇشىن وسىنىڭ ءوزى قىزىقتى، وسىنىڭ ءوزى تاعىلىم بولىپ كورىنگەن ەدى. سەبەبى ەشقانداي ۇستاز بۇگىنىمەن عانا ءومىر سۇرەتىن شاكىرت تاربيەلەمەيدى، كەشە مەن بۇگىننىڭ، بۇگىن مەن ەرتەڭنىڭ شاكىرت بويىندا ادەمى ۇيلەسىمدىلىك تاۋىپ وتىرۋى – ۇستازدىق قىزمەتتىڭ ەڭ باستى ولشەمدەرىنىڭ ءبىرى.
ءسىز ومىرلىك تاجىريبەڭىزدى دە، ۇستازدىق تاجىريبەڭىزدى دە وسىناۋ مەكتەبىڭىزدە ۇستاز بوپ ءجۇرىپ جينادىڭىز. ۇلگىلى اتا-انا، ۇلاعاتتى ءمۇعالىم بولدىڭىز. شاكىرت جۇرەگىنە جول تاپتىڭىز. مەكتەپ ءبىتىرىپ كەتكەن قانشاما تۇلەكتەردىڭ ونەگەسىندە ءسىزدىڭ ۇستازدىق قىزمەتىڭىزدىڭ قولتاڭباسى جاتىر دەسەڭىزشى!
وسىناۋ ءبىلىم ورداسىنا سىزدەن كەيىن كەلىپ، ءقازىر ۇستازدىق قىزمەتتىڭ ۇجىمىنداعى ورتا بۋىندى قۇرايتىن ءبىزدىڭ ءوزىمىز سىزدەردەن ءتالىم العانىمىز، سىزدەردەن ۇيرەنگەنىمىز كۇنى كەشە عانا سياقتى ەدى، ەندى ءبىزدىڭ ءوزىمىزدىڭ دە ىزىمىزگە جاس ۇستازدار ەرە باستاپتى. ءداستۇر وسىلاي جالعاسادى.
سىزدەر شاكىرت تاربيەلەپ قانا قويعان جوقسىزدار، وزدەرىڭىزدەن كەيىن كەلگەن ارىپتەستەرىڭىزگە دە جول كورسەتتىڭىزدەر، ۇلگى-ونەگە بولا الدىڭىزدار. بۇل ءار ۋاقىتتا اعا بۋىن ءۇشىن زور مىندەت ءارى ابىرويلى ماقتانىش ەدى.
ەگەر ءدال وسى كەزەڭدە ۇستازدىق قىزمەتتىڭ بەل ورتاسىندا جۇرگەن بىزدەر ءۇشىن دە ءوز بويىمىزدا ۇستازعا ءتان قاسيەتتەردىڭ باي جيىنتىعى قالىپتاسقان بولسا، وندا مۇنىڭ ار جاعىندا سىزدەردەن ۇيرەنگەن ءتالىمنىڭ دە ۇشتىعى جاتىر. ەگەر ءبىز بويىمىزدا قالىپتاسقان وسىناۋ قاسيەتتەردىڭ اسىل لەگىن وزىمىزدەن كەيىن كەلگەن بۋىن مەن ءوز شاكىرتتەرىمىزدىڭ بويىنا سىڭىرە الساق، وندا مۇنىڭ دا ءون بويىندا سىزدەردەن ۇيرەنگەن تاجىريبەنىڭ ءتالىمى بار.
ەندى، مىنە، الدىڭعى بۋىن – سىزدەر دە ءوز ۇجىمدارىڭىزدان قۇرمەتتى دەمالىسقا شىعىپ بارا جاتىرسىزدار.
قۇرمەتتى ۇستاز!
ءسىزدى ارىپتەستەرىڭىز وسىناۋ مەرەكەلى ساتپەن قۇتتىقتاي وتىرىپ، ءوزىڭىز بەن وتباسىڭىزعا بەرەكە-بىرلىك، مىقتى دەنساۋلىق تىلەيدى.
يگى تىلەكپەن: ۇجىمىڭىز، ارىپتەستەرىڭىز
You Might Also Like
-
شىمكەنت اگرارلىق كوللەدجىنىڭ تك9-162 توبىنىڭ ستۋدەنتى ديداربەكوۆا دينارا عىلىمي جەتەكشىسى - جاقىپ س.د.
