InfoHub Logo

ءابىلحان بالا جاسىنان سۋرەت سالۋعا قۇمار بولدى. توڭىرەككە كوز تاستاپ، جاپادان جالعىز ۇزاق وتىراتىن. تابيعات كورىنىستەرى ونىڭ قيالىن قوزعايتىن. كورگەندەرىن ارنەگە ۇقساتادى. اسپاندا كوشىپ بارا جاتقان بۇلت تۇيەلى كەرۋەن سەكىلدى. يرەلەڭدەگەن قيسىق بۇتاق جىلان ءتارىزدى. تاستاردىڭ، اعاشتاردىڭ بەدەرىنەن جان-جانۋارلاردىڭ ءمۇسىنىن تانيدى.

سۋرەت سالايىن دەسە قاعاز-قارىنداشى جوق. اكە-شەشەسى ءولىپ، جەتىم قالعان. جالدانىپ، بىرەۋلەردىڭ قويىن باعادى. اۋىلدا ەشكىم دە سۋرەت سالۋدى بىلمەيدى. ۇيرەتەتىن ەشكىم جوق.

بالا قوي باعىپ ءجۇرىپ قاراپ وتىرمادى. اعاش ويىپ، تاس قاشاپ، ءتۇرلى مۇسىندەر جاسادى. بىرەۋى قويعا، بىرەۋى جىلقىعا، بىرەۋى دوڭگەلەك كيىز ۇيگە ۇقسادى. قولى ەپتى ەكەن. اعاشتان ءتۇيىن تۇيەدى. جاساعان بۇيىمدارى جۇرتتىڭ كوزىن قىزىقتىردى.

بالانىڭ شەبەرلىگىن تانىعان تۇيمەباي ۇستا بۇعان ادەيىلەپ كەزدىك، وتكىر ءبىز جاساپ بەردى. «سەنەن تۇبىندە بىردەڭە شىعادى» دەپ، ارقاسىنان قاقتى. بالا ماقتاۋ سوزگە قاناتتانىپ، تالپىنىپ، ءوز بەتىنشە ىزدەنە ءتۇستى. «اتتەڭ، قاعاز، قارىنداش، بوياۋ بولسا» دەپ، ارماندادى. سوندا كورگەندەرىن قاعازعا تۇسىرەر ەدى.

بالانىڭ سۋرەت سالۋعا بەيىمدىلىگىن اڭعارعان ساعىمباي اقساقال وعان اقىل ايتتى. «قويدى تاستا دا قالاعا بارىپ وقى. سەن ونەرلىسىڭ،» – دەدى. ءابىلحان بالا بۇل سوزگە سەندى.

تۋعان اۋىلى شەجىندى قيماسا دا، جاركەنت قالاسىنا اتتاندى. وقۋ باستالىپ كەتىپتى. كەشىگىپ قالىپتى. بىرەۋلەردىڭ كومەگىمەن ءوز بەتىنشە وقىدى. بىلۋگە قۇمارتتى. تىم زەرەك بولدى. ءبىر ەستىگەنىن ۇمىتپايدى. ولەڭ-جىرلاردى تەز جاتتاپ الادى.

قاتارعا قوسىلىپ، ءوزىن-وزى اسىراۋى كەرەك. سول ءۇشىن ول تۇركسىب تەمىر جولى قۇرىلىسىنا جۇمىسقا ورنالاستى. ناعىز بوزبالا شاعى. قۇرىلىستا تاس تاسيدى، جەر قازادى. قولى بوستا قارا مايمەن جارتاستىڭ بەتىنە سۋرەت سالادى. تاپقان اقشاسىنا قاعاز، قارىنداش، ءتۇرلى-تۇستى بوياۋلار ساتىپ الدى. ەندى جۇمىستان كەيىن وتىرا قالىپ سۋرەت سالۋدى عانا بىلەدى. ەرىنبەيدى. كوزىنە كورىنگەندەردى قاعاز بەتىنە تۇسىرەدى. قيالىمەن جىرداعى باتىرلاردى كوز الدىنا ەلەستەتەدى. سولاردىڭ جەكپە-جەك ۇرىستارىن سالعىسى كەلەدى. قايتا تۇزەپ، قايتا سالادى.

جاناشىر بىرەۋلەر بۇنىڭ سۋرەتتەرىن الماتىعا جىبەرىپ، كورمەگە قويعىزدى. قازاقتان شىققان تۇڭعىش سۋرەتشىنى الماتىعا شاقىرتتى. ءابىلحان قاستەيەۆ وسىلايشا سۋرەت ونەرىنە ءبىرجولا بەرىلدى. بار ءومىرىن سۋرەت سالۋعا ارنادى. «مەنىڭ قولىمنان كەلەتىنى – سۋرەت سالۋ دەپ ءبىلدى.

ءار نارسەگە قىزىعۋمەن، قۇمارتۋمەن بولدى. تاڭىرقاپ، تاڭدانۋ، جاقسىنى تاماشالاۋ – ونىڭ ادەتىنە اينالدى. ءوزى دە جاقسى سۋرەتىمەن ەلدى تاڭداندىرعىسى كەلدى.

ءابىلحان قاستەيەۆتىڭ سالعان سۋرەتتەرى كوگەن توپتاما سۋرەتتەرى ءۇشىن وعان مەملەكەتتىك سىيلىق بەرىلدى. ول قازاقستاننىڭ حالىق سۋرەتشىسى اتاندى. ەلىنىڭ قۇرمەتىنە بولەندى. ولە-ولگەنشە سۋرەت سالۋمەن بولدى. الماتىداعى مەملەكەتتىك ونەر مۇراجايىنا ءابىلحان قاستەيەۆتىڭ ەسىمى بەرىلدى.

---