حالىقارالىق ستۋدەنتتەر كۇنى قالاي پايدا بولدى
17 قاراشا - حالىقارالىق ستۋدەنتتەر كۇنى. كۇنتىزبەدە بەلگىلەنگەن وسى ءبىر مەرەكەنىڭ شىعۋ تاريحى ايتارلىقتاي قىزىقتى دا ەمەس. ول - قاندى، ءارى قايعىلى وقيعاعا بايلانىستى پايدا بولعانىن ەكىنىڭ ءبىرى بىلە بەرمەيدى.
1939 جىلى 28 قازان كۇنى فاشيستەر باسىپ العان چەحوسلوۆاكيانىڭ ستۋدەنتتەرى مەن ۇستازدارى چەحوسلوۆاكيا مەملەكەتىنىڭ قۇرىلعانىنا جيىرما ءبىر جىل بولعانىن اتاپ ءوتۋ ءۇشىن شەرۋگە شىقتى (28.10.1918). باسقىنشى بولىمدەر شەرۋدى كۇشپەن باسىپ، سونىمەن بىرگە مەديسينا فاكۋلتەتىنىڭ ستۋدەنتى يان وپلەتالدى اتىپ تاستايدى.
1939 جىلى 15 قاراشاداعى يانا وپلەتالدى جەرلەۋ ءراسىمى قايتادان نارازىلىققا ۇلاسادى. شەرۋگە شىققانداردىڭ كوبى قاماۋعا الىنعان. 17 قاراشادا گەستاپوشىلار مەن ەسەستەر ستۋدەنتتىك جاتاقحانالاردى قورشاۋعا الىپ، 1200-دەن استام ستۋدەنت ۇستالىپ، زاكسەنحاۋزەندەگى كونسلاگەرلەرگە قامالدى. ستۋدەنتتىك قوزعالىستىڭ توعىز بەلسەندى ستۋدەنتى پراگانىڭ رۋزينا اۋدانىندا تۇرمە قابىرعاسىندا سوتسىز دارعا اسىلدى. گيتلەردىڭ بۇيرىعىمەن چەحياداعى بارلىق وقۋ ورىندارى سوعىس اياقتالعانعا دەيىن جابىلدى.
1946 جىلى 17 قاراشادا پراگادا وتكەن چەحيالىق ستۋدەنت-پاتريوتتاردىڭ قۇرمەتىنە بولعان بۇكىلالەمدىك ستۋدەنتتەر كونگرەسىندە حالىقارالىق ستۋدەنتتەر كۇنى بەلگىلەندى.
مىنە، جالىندى جاستىق شاقتىڭ مەرەكەسى - ستۋدەنتتەر كۇنىنىڭ شىعۋ تاريحى ەكىنشى دۇنيەجۇزىلىك سوعىس كەزىندە چەحوسلوۆاكيادا وسىلاي باستالعان. ودان بەرى تالاي جىلدىڭ ءجۇزى بولدى. تاريحى قاندى وقيعامەن باستاۋ العان وسى ءبىر مەيرام قازىردە الەمنىڭ تۇپكىر-تۇپكىرىندە بار سان-سالتاناتىمەن اتالىپ وتىلەدى.
ستۋدەنتتىك ءومىر ادامنىڭ جاستىق قۋاتى تاسىپ، شارشاۋ مەن ۋايىمدى بىلمەي، ىزدەنۋمەن، ۇيرەنۋمەن، تانىسۋمەن، تابىسۋمەن وتەتىن ەرەكشە شاعى. بۇل كەزدە ءبىلىم كەڭىستىگىڭ، كوڭىل كوكجيەگىڭ كەڭىپ، ماحاببات پەن عاشىقتىق وتىنىڭ دا ىستىعىنا كۇيىپ، جالىنىنا شارپىلىپ جۇرەتىنىڭ جاسىرىن ەمەس. وقۋ ورداسىندا تالاي دوس تاۋىپ، ءازىلىڭ جاراسىپ، قۇربى-قۇرداسپەن كۇلىپ-ويناپ وتەتىن كۇندەرىڭ دە كوپ. ستۋدەنت دەيتىن «حالىقتىڭ» وزىنە ءتان، وزدەرى عانا تۇسىنەتىن «تىلدەرى» دە بولادى. البەتتە، ونى ءار جەردىڭ ستۋدەنتتەرى ءار ءتۇرلى تاسىلمەن «قالىپتاستىرعان». ونى تەك «ستۋدەنت سوزدىگى» ارقىلى عانا ۇعۋعا بولادى. وقىرمان نازارىنا سول «تەرميندەردىڭ» ءبىر پاراسىن ۇسىنامىز.
ستۋدەنت سوزدىگى
ستۋدەنتتىك ءومىر - سوعىس پەن بەيبىتشىلىك
ەكىلىك - قىرسىزعا قامشى
ۇشتىك - ءۇمىت شوعى
تورتتىك - ءتاڭىر سىيى
بەستىك - باقىت قۇسى
كۋراتور - ستۋدەنتتىڭ وگەي شەشەسى
رەكتور - كۇن قۇدايى
دەكان - ءپىر
پارا - ۇزاق ۋاقىت قاڭتارىلۋ
اۋديتوريا - ۇيىقتايتىن ورىن
زاچەت - ۇيىقتاماي وتەتىن تۇندەر
ەمتيحاندا وتىرعان ستۋدەنت - جانتالاسا قارۋلانعان مەملەكەت
ەمتيحان تاپسىرۋ - تابادا تىرىدەي شىجعىرىلۋ
سەسسيا - قيامەتتىڭ قىل كوپىرى نەمەسە قاتەرلى كەزەڭ
كۋرستىق جۇمىس - جان بەرىپ، جان الىسۋ
اۋديتورياعا كەشىگىپ كىرىپ تۇرعان ستۋدەنت - قىرىق وتىرىكشى
سالەمدەمە - اڭقىلداپ جەتكەن اق جارما
شپارگالكا - جەدەل جاردەم
وقۋ ورنى - جاستاردىڭ ءسان ءۇيى
لەكسيا - وتتى جىلدار شەجىرەسى
ءۇزىلىس - بارمىسىڭ باۋىرىم، ىزدەۋدەگى جان قۇربىم
كىتاپحانا - ءبىلىم كافەسى
وقۋ زالى - تاپقانىڭدى كەمىرۋ
ابانومەنت - ءبىلىم بيۋروسى نەمەسە لومبارد.
قوڭىراۋ - سۇيكىمدى سيمفونيا
سوكۋرسنيك - ۇيالاستار
ستيپەنديا - اشتىق اراشاسى
ديپلوم - تىرشىلىك تىرەگى نەمەسە ومىرلىك نانىڭ
ءتۇن - سەرگەكتىگىڭ تاسيتىن ۋاقىت
تاڭەرتەڭ - تۇنىمەن ىزدەگەن ۇيقىڭنىڭ تابىلاتىن ۋاقىتى
اۋىلعا بارۋ - كىشى قاجىلىق
اناڭنىڭ قوڭىراۋى - وتباسىڭدى ساعىنعانىڭدى بىلدىرەتىن ءسات
سمس - «كۋراتور ىزدەپ جاتىر ما» دەگەن قورقىنىش جىلت ەتە قالاتىن ءسات
ۇيقىاشار (بۋديلنيك) - ەڭ جاعىمسىز اۋەن
كەسە - شاي ىشەر كەزدە عانا جۋىلاتىن ىدىس
جاتاقحانا - ءوز ءۇيىڭ، ولەڭ توسەگىڭ
You Might Also Like
-
بايانداما قازاق تىلىندە بولسىن دەگەندەرگە مەنىڭ الدىمداعى بايانداماشى ورىس تىلىندە بولسىن، ۇيتكەنى جۇرتتى ۇگىتتەۋ، ءۇيىرۋ ءۇشىن جاسا- لىپ جاتقان ءماجىلىس، ورىس جولداستاردىڭ دا قاتىسۋى كەرەك دەپ ەدى، ءۇ...
-
ونەركاسىپ، بايلانىس جانە كوممۋنيكاسيالار، سەرۆيس جانە قىزمەت كورسەتۋ، مەديسينا جانە ءبىلىم سالالارىندا كادرلاردىڭ جەتىسپەۋشىلىگىنە بايلانىستى كەلەسى جىلدان باستاپ كوللەدجدەردە التى جاڭا ماماندىق اشى...
