«ياندەكس» كومپانياسىنىڭ ارتىقشىلىقتارى مەن كەمشىلىكتەرى
Atlassian كومپانياسىنىڭ باس باعدارلاماشىسى جانە «ياندەكستىڭ» بۇرىنعى قىزمەتكەرى دميتريي سورين رەسەيلىك ءىرى ىت-كورپوراسيا «ياندەكستەگى» جۇمىسى جونىندە جازدى. اۆتور كومپانياعا جۇمىسقا ورنالاسۋ، ونداعى جالاقى كولەمى، قىزمەتتىك مانساپ جونىندە جانە «ياندەكستەن» جۇمىستان كەتۋىنىڭ سەبەبىن اشىپ ايتتى.
مەن 2012 جىلدىڭ باسىندا «ياندەكس» كومپانياسىندا جۇمىس ىستەۋ ءۇشىن، سانكت-پەتەربۋرگتەن ماسكەۋگە قونىس اۋداردىم. مۇنان كەيىنگى 5 جىلدا Firefox-كە ارنالعان كەڭەيتۋلەر جاسايتىن مامان رەتىندە قىزمەت ەتتىم. ول عانا ەمەس، «ياندەكس.باردىڭ»، Firefox پەن Chrome-عا ارنالعان «ەلەمەنتتەر» مەن «ۆيزۋالدى بەلگىلەر» جاساۋعا اتسالىسىپ، «تەلەباعدارلامالار» (tv.yandex.ru) فرونتەندىنىڭ، «كينوپويسكتىڭ» (plus.kinopoisk.ru) جاڭا ءتۇرىنىڭ جانە ىشكى كينو جانە تۆ-جوبالاردىڭ جاسالۋىن باسقارىپ، تەست قۇرۋشىلاردى اۆتوتەست جازۋعا ۇيرەتتىم. 2017 جىلدىڭ قاڭتار ايىندا Atlassian-دە Senior Software Engineer قىزمەتىنە جۇمىسقا ورنالاسۋ ءۇشىن، «ياندەكس» كومپانياسىنداعى قىزمەتىمدى دوعارىپ، سيدنەيگە كوشتىم.
بۇل ماقالا – «ياندەكس» كومپانياسىندا 5 جىل اتقارعان ەڭبەك تاجىريبەمنىڭ مازمۇنى. كومپانيادا مەنى كوپ نارسەگە ۇيرەتكەن بىلىكتى ماماندارمەن تىزە قوسىپ، بىرگە جۇمىس ىستەگەندىكتەن، ەش ءشۇباسىز جولىم بولدى دەي الامىن. سونىمەن قاتار كەڭەيتۋلەر، جوبالار جاساۋشى رەتىندە عانا ەمەس، «people management» رەتىندە باسقارۋ قىزمەتىن اتقارعانىمدى ۇلكەن ب ا ق دەپ بىلەمىن.
مۇمكىن، مۇندا دا بىردەڭە جەتىسپەيتىن بولار. ءبىراق ول – كەيىننەن قايتىپ كەلىپ، ءوزىڭدى تەكسەرۋ ءۇشىن ساقتاۋعا تۇرارلىق ماڭىزدى دۇنيە.
«ياندەكس» كومپانياسىنا جۇمىسقا ورنالاسۋ قيىن با؟
ارينە، جۇمىسقا ورنالاسۋ قيىن، ءبىراق مۇمكىندىك بار. ءوز باسىم كومپانياعا قىزمەتكە كەلەر الدىندا 6 رەت سۇحباتتان ءوتتىم. العاشقى ەكەۋى ءساتسىز بولدى. مۇندا تەك ءبىر قاعيدا بار: بايقاپ كورىڭىز، سۇحباتتان وتە الماساڭىز، وسال تۇستارىڭىزدى جەتىلدىرىپ، قايتادان تالپىنىڭىز. «ياندەكس» كومپانياسىندا قىزمەت اتقارعان 5 جىل ىشىندە كوپتەگەن ۇمىتكەرمەن سۇحبات وتكىزدىم. ءبىراق ولاردىڭ قاتارىندا كەمشىلىكتەرىن تۇزەپ، قايتا باعىن سىنايتىندار از.
كومپانيادا ءپوزيتيۆتى كوڭىل-كۇيدىڭ ماڭىزى زور: ەگەر الدەنەنى بىلمەسەڭىز، ۋايىمداماڭىز. ءتىپتى، سىزبەن سۇحبات وتكىزىپ وتىرعان ماماننىڭ دا بارلىعىن ءبىلۋى مۇمكىن ەمەس. ەڭ ماڭىزدىسى – الدىڭىزعا قويىلعان مىندەتتى اتقارا ءبىلۋىڭىز، ۇيرەنۋگە قابىلەتتىلىگىڭىز، جاعىمدى كوڭىل-كۇي مەن تاباندىلىق.
مەن ءۇشىن سۇحباتتاعى ەڭ ماڭىزدى قاسيەت ۇمىتكەرلەردىڭ ءپوزيتيۆتى ءارى سىندارلى ويى بولعان ەدى. ارينە، بويىڭنان اتالعان قاسيەتتەر تابىلسا دا، سۇحباتقا دايىندالۋعا ءتيىسسىز.
كومپانيادا سىزبەن سالىستىرعاندا، بىلىكتىلىك دەڭگەيى اناعۇرلىم جوعارى ماماندار كوپ
باستاپقى كەزدە بۇعان سەنۋ وتە قيىن، سەبەبى ءوزىڭدى بىلىكتى، ءمىنسىز مامان سانايسىڭ. الايدا «كومپانيا ءۇشىن ەش پايدام جوق» دەگەن وي تۋىنداماۋى ءتيىس. ايتقىم كەلگەنى، بۇل جەردە ءسىزدىڭ جەتىلۋىڭىزگە كومەكتەسەتىن، بىلگەنىن ۇيرەتەتىن ماماندار كوپ. ياعني مۇندا ۇيرەنە الاسىز جانە كەمەلدەنۋگە مۇمكىندىك بار.
«ياندەكستەگى» جالاقى
«ياندەكس» كومپانياسىنداعى جالاقى نارىقتاعى ورتاشا جالاقى مولشەرى تومەن دەگەن پىكىر قالىپتاسقان. ءيا، جالاقى ءسال تومەن بولۋى مۇمكىن، ءبىراق بىزدەگى ىشكى قىزمەت كورسەتۋ جوعارى دەڭگەيدە، ال قىزمەتكەرلەر – ادام رەتىندە دە، مامان رەتىندە دە عاجاپ جاندار. سونىمەن قاتار تاماق ءۇشىن وتەماقى تولەنەدى. الەۋمەتتىك پاكەتكە ءمىن تاعا المايتىنىڭ تاعى بار. اتالعاندار جالاقى مولشەرى تومەندىگىنىڭ قارىمىن قايتارادى. الايدا، جالپى العاندا، رەسەي بويىنشا «ياندەكس» كومپانياسىنىڭ قىزمەتكەرلەرى جاقسى تابىس تابادى. ەگەر مەن Mail.Ru Group نەمەسە Jetbrains-كە جۇمىسقا ورنالاسسام، جالاقى مولشەرى ايتارلىقتاي ارتپايتىن ەدى.
جالپى «ياندەكستە» جالاقى ءار جارتى جىل نەمەسە جىل سايىن وزگەرىپ وتىرادى. ءبىراق ول جونىندە كومپانيادا قىزمەتىن جالعاستىرۋشىلار مەنەن ارتىق بىلەدى.
قىزمەتتەن كەتەردەن جارتى جىل بۇرىن مەن العاشقى شەكتەۋلى اكسيالار پاكەتىنە قول جەتكىزدىم. ۆەستينگتى (اكسيا الۋ قۇقىعىنا يەلەنۋ) كۇتپەستەن، اكسيالار پاكەتىنە قول جەتكىزدىم. ياعني ءبىرىنشى شيرەكتەگى ۆەستينگكە جارتى جىل قالعاندا جۇمىستان كەتتىم.
كومپانيادا قىزمەتكەرلەرگە ارنالعان اكسيالار قاراستىرىلعان. بەلگىلى ءبىر قىزمەتتىك دەڭگەيگە جەتكەن ماماندار ريەۆيۋ قورىتىندىسى بويىنشا اكسيالارعا يەلەنە الادى. ياعني شەكتەۋلى اكسيالار پاكەتىنە قول جەتكىزۋ ادبەن مۇمكىن. ول ءۇشىن بىلىكتى ءارى باسشىلىق باعالايتىن قىزمەتكەر بولۋ كەرەكسىڭ. وعان قوسا باسقارۋشى ءوز توبىنىڭ جەتىستىگىنە نەمقۇرايلى قاراماۋى ءتيىس. ەگەر سىزدە شەكتەۋلى اكسيالار پاكەتى بولماسا، ءبىراق ءوزىڭىزدى اكسيالارعا يەلەنۋگە لايىق ساناساڭىز، باسقارۋشىڭىزبەن سويلەسىپ كورۋىڭىزگە بولادى.
Work-life balance — «ياندەكس» كومپانياسىنا قاتىستى ەمەس
ەگەر «ياندەكس» كومپانياسىندا جۇمىس ىستەپ، جوعارى جالاقىعا يەلەنىپ، مانساپقا قول جەتكىزۋمەن قاتار جەكە ومىرىڭىزگە ۋاقىت ءبولىپ، جانۇياڭىزبەن دەمالۋدى ويلاساڭىز، قاتەلەسكەنىڭىز. مۇنداعى قىزمەتكەرلەر جۇمىسىنا شىنداپ بەرىلگەن. ولار تىنباي جۇمىس ىستەپ، ءتۇرلى جوبالاردىڭ ىسكە اسىرىلۋىنا اتسالىسىپ، تۇنىمەن نە دەمالىس كۇندەرى كود جازۋدان جالىقپايدى.
دەسە دە ماسكەۋدە تۇراتىن ارىپتەستەرىمنىڭ ىشىندە وتباسى مەن قىزمەتىن قاتار الىپ جۇرگەندەرى دە از ەمەس. سوندىقتان ول ءسىزدىڭ جۇمىسقا دەگەن قاتىناسىڭىزعا، توبىڭىز دايارلاپ جاتقان ونىمگە بايلانىستى.
كومپانيادا ءتۇرلى جوبالار كوپ
ءبىر جوبامەن اينالىسۋ جالىقتىرسا، باسقاسىنا اۋىسۋ مۇمكىندىگى بار. ماماندى دايىنداپ جاتقان ءونىمنىڭ جالىقتىرۋى، باسقارۋشىسىنىڭ قىساستىق جاساۋى نەمەسە تەحنولوگيالارعا كوڭىلى تولماۋى مۇمكىن. سوندىقتان ونىڭ وزگە جوباعا اۋىسۋىنا ەش نارازىلىق بولمايدى. تىپتەن، ول ءۇشىن بارلىق جاعداي قاراستىرىلعان: بىزدەگى HR قاشاندا كوڭىلىڭىزگە جاعىمدى جۇمىس تاۋىپ بەرە الادى. كەزىندە مەن دە مەديا قىزمەت سالاسىنا اۋىسىپ، مۇلدەم وزگە توپپەن قاۋىشقان ەدىم.
ءسىز «ياندەكس» كومپانياسىنا جۇمىس ىستەۋگە كەلگەندە، بولاشاق ارىپتەستەرىڭىزدەن قىزىقتىراتىن دۇنيەلەردىڭ بارلىعىن جاي-جاپسارىنا دەيىن سۇراپ الىڭىز: ونىمگە قاتىستى جوسپار قانداي، توپتار اراسىنداعى جوسپارلاۋ مەن ولاردىڭ ءوزارا ارەكەتتەستىگى قانداي نەگىزدە قۇرىلعان، ءسىزدىڭ بولاشاقتاعى توبىڭىز قانداي باعىتتى ۇستانادى. وسى ساۋالداردىڭ بارلىعىنا جاۋاپ العانىڭىز ءجون.
بۇل رەتتە بولاشاق باسقارۋشىڭىزبەن دە تىلدەسكەنىڭىز ابزال. «ياندەكس» - ۇلكەن كومپانيا. ونىڭ ءبىر بولىمىندەگى جوبا زاماناۋي ءارى بەلسەندى بولسا، كەلەسى بولىمدەگىسى ايتارلىقتاي ماڭىزسىز، قاجەتسىز بولۋى مۇمكىن.
مانساپ جولىندا ورلەۋ
باستاپقىدا مەن ءۇشىن كومپانياداعى مانساپ مۇلدەم تۇسىنىكسىز ەدى. تەك باسقارۋشى قىزمەتىن اتقارعاننان كەيىن عانا ول جونىندە تولىق تۇسىنىك قالىپاستى. سوندىقتان ءقازىر اۋىز تولتىرا ايتا الاتىنداي پىكىرىم بار. كومپانيادا جوسپار بويىنشا جۇمىس ىستەپ، ۇساق-تۇيەككە بولا باسقارۋشىمەن ءسوز تالاستىرماۋ كەرەك. سونىمەن قاتار ساتتىلىكتىڭ سەرىك بولعانى دا ارتىق ەتپەيدى.
- جوسپار بويىنشا جۇمىس ىستەۋ. سىزدەن تالاپ ەتىلەتىنىنى – تاپسىرىلعان مىندەتتى جىلدام ءارى ساپالى اتقارۋ. وعان قوسا جۇمىسىڭىزدىڭ اتقارىلۋىنداعى ءار قادامىڭىز انىق بولۋى ءتيىس. ول باسشىلىقتىڭ سىزگە جۇكتەلەتىن مىندەت پەن ونىڭ ىسكە اسىرىلۋ مەرزىمىن انىقتاۋى ءۇشىن قاجەت. ەگەر اعىمداعى جوبادان تىس وزگە مىندەتتەردى اتقارۋعا كوشسەڭىز، ونىمگە قاتىستى جوسپاردى بۇزاسىز.
- باسقارۋشىڭىزبەن داۋلاسۋ
- جوعارىدا ايتقانىمداي، سىزگە قىساستىق جاسايتىن، قولاستىنداعى قىزمەتكەرلەردىڭ ورلەۋىنە قىزىعۋشىلىق تانىتپايتىن نەمەسە جۇمىس تاجىريبەسى از باسقارۋشىعا تاپ بولۋىڭىز مۇمكىن.
دەسە دە، بۇل تەك مەنىڭ پىكىرىم. ول باسقارۋشى رەتىندە ماعان قاجەت بولعان ارەكەتتەر مەن ىستەرگە نەگىزدەلگەن. بالكىم، ءسىزدىڭ باسقارۋشىڭىز قابىلدانعان ءار شەشىم ءۇشىن داۋلاسقاندى ۇناتاتىن بولار. نەمەسە جولىڭىز بولماي، العا قاراي جىلجىمايتىن، ەش وزگەرىس ورىن المايتىن بولىمدە قىزمەت ەتەتىن بولارسىز. نە دە بولسا، باسشىلىقپەن تىلدەسىپ، سىزدەن تالاپ ەتىلەتىن قاسيەتتەر مەن مىندەتتەر تۋرالى ءبىلىپ العانىڭىز ءجون.
تۇرعىن ءۇي قارىزى
باسقا قالالاردا پاتەر ساتىپ الۋ ماسەلەسى قانداي ەكەنىن بىلمەيمىن، ءبىراق ماسكەۋدە پاتەر الۋ – قيىن. تۇرعىن ءۇي قۇنى – قىمبات، ال يپوتەكا – قولجەتىمسىز. كەي ادامدار ماسكەۋ ماڭىنان ءۇي الىپ، جۇمىسقا ەلەكتريچكامەن قاتىنايدى.
وسىعان بايلانىستى، «ياندەكستىك» تۇرعىن ءۇي قارىزى (ءۇش جىلعا بەرىلەتىن پايىزسىز قارىز) – پاتەر الۋدى ماقسات ەتكەن جاندار ءۇشىن ۇلكەن دەمەۋ. بەرىلەتىن قارىز مولشەرى جالاقىڭىزعا بايلانىستى، سوندىقتان جۇمىسقا ورنالاسقان بويدا قارىز الۋعا اسىقپاعانىڭىز ءجون. 2015 جىلى «ياندەكستىك» تۇرعىن ءۇي قارىزىنىڭ كومەگىمەن ەكى بولمەلى پاتەرگە يەلەندىم. كومپانيادان جۇمىستان شىققان كەزدە، قالعان قارىزدى بىردەن تولەۋ كەرەك.
كومپانيادا قىزمەت ەتەتىن ادامداردىڭ بارلىعى ءمىنسىز ەمەس
ۇزاق ۋاقىت بويى كومپانيادا تەك بىلىكتى ءارى ءمىنسىز ماماندار قىزمەت ەتەتىنىنە ءشۇباسىز سەنىپ كەلدىم. وكىنىشكە وراي، كەمشىلىكسىز دۇنيە بولمايدى.
«ياندەكس» كومپانياسىنداعى قىزمتكەرلەردىڭ باسىم كوپشىلىگى – ءوز ءىسىنىڭ مامان. ولارمەن بىرگە جۇمىس ىستەۋ جانعا جاعىمدى. الايدا بىلىكتىلىگى تومەن، بۇكىل الەمگە وكپە ارتاتىن نەمەسە مىنەزى ناشار ادامدار دا بار. ءبىر قۋانىشتىسى، مۇنداي ادامدار قاتارى از بولعاندىقتان، سيرەك كەزدەستىرەسىڭ.
كومپانياداعى ارىپتەستەرىڭىزدىڭ ىسىنە ءمىن تاعا المايتىنداي بىلىكتى، ادامگەرشىلىگى مول ادامدار بولاتىنى انىق. ءبىراق بەس ساۋساق بىردەي ەمەستىگىن ەستەن شىعارماعايسىز.
قورىتا كەلە، «ياندەكستىڭ» تاماشا جانە رەسەيدەگى ءىت قىزمەت ءۇشىن ەڭ ۇزدىك كومپانيا ەكەندىگىن اتاپ وتكىم كەلەدى.
«كينوىزدەۋ» مەديا قىزمەتىن قايتا ىسكە قوسۋ ءساتسىز بولعاندىقتان، كومپانيادا قىزىعۋشىلىعىمدى تۋدىراتىن ءىس قالمادى. ال جاڭا باسشىلىق سەرۆيستى تۇراقتاندىرۋمەن اينالىسىپ، بار نازاردى سوعان اۋدارعان ەدى.
ءدال وسى سەبەپتى 2016 جىلى شەت ەلدىك كومپانيالاردا سۇحباتتان وتە باستادىم. ولاردىڭ ىشىنەن Atlassian كومپانياسىن تاڭداپ، 2017 جىلى وسى جەرگە اۋىستىم. Atlassian كومپانياسىن تاڭداۋىما تۇرتكى بولعان دۇنيەلەر – كود جازۋ مۇكىندىگى مەن اعىلشىن ءتىلى بويىنشا ءبىلىمىمدى تاجىريبە جۇزىندە جەتىلدىرۋ.
You Might Also Like
-
اباي اتىنداعى رەسپۋبليكالىق مامانداندىرىلعان دارىندى بالالارعا ارنالعان قازاق ءتىلى مەن ادەبيەتىن تەرەڭدەتە وقىتاتىن ورتا مەكتەپ-ينتەرناتىنىڭ تاربيەشىسى ءاشىمجانوۆا اسەل ساداتبەك قىزى
-
ويلاۋ قابىلەتى ادامنىڭ تانىمدىق پروسەسستەرىنىڭ ەۆوليۋسيالىق جانە تاريحي دامۋىنىڭ ءتاجى. ۇعىمدىق ويلاۋدىڭ ارقاسىندا ادام سەزۋ، قابىلداۋ جانە ۇسىنۋ سياقتى تومەنگى دەڭگەيلى تانىمدىق پروسەسستەر مۇمكىندىك...
