InfoHub Logo

ءۇش جولاۋشى كەلە جاتسا، الدىنان ءبىر ادام قارسى شىعىپ:

— بەيمەزگىل جۇرگەن تۇيە كوزدەرىڭە تۇسپەدى مە؟ – دەپ سۇرادى.

جولاۋشىنىڭ بىرەۋى:

— تۇيەڭنىڭ وڭ كوزى سوقىر ما ەدى؟ – دەيدى.

جوقشى:

— ءيا،– دەپ باسىن يزەيدى. ەكىنشى جولاۋشى:

— تۇيەڭنىڭ وڭ جاق ارتقى اياعى اقساق پا ەدى؟ – دەپ سۇرايدى.

— دۇرىس! سول جاق ارتقى اياعىنىڭ سىلتىعى بار ەدى،– دەيدى. سونان سوڭ، ءۇشىنشى جولاۋشى:

— تۇيەڭنىڭ قۇيرىعى شولاق پا، ەدى؟ – دەپ سۇرايدى. جوقشى:

— ءيا،  قۇيرىعى شولاق، – دەپ، اسىعىپ جاۋاپ بەرەدى دە: – ول تۇيەنى قايدان كوردىڭىزدەر؟ – دەپ سۇراي باستايدى. جولاۋشىلار:

— كورگەنىمىز جوق، – دەيدى.

— كورمەسەڭدەر، تۇيەمنىڭ بەلگىسىن قايدان بىلدىڭدەر؟ تۇيەمدى سەندەر ۇرلادىڭدار! – دەپ جوقشى جابىسا كەتەدى. جولاۋشىلار:

— اۋ، جانىم، دەنىڭ ساۋ ما؟ تۇيەڭدى ۇرلاماق تۇگىل كورگەنىمىز دە جوق، – دەيدى.

جوقشى بۇل جاۋاپقا قاناعاتتانبايدى. تورتەۋى ءبىر بيگە كەلىپ، جۇگىنەدى. بي سۇراستىرا كەلە:

— ۇرلاماساڭدار، كورمەسەڭدەر، ول تۇيەنىڭ بەينە-بەلگىسىن، كورگەن كىسىدەي انىقتاپ، بايقاپ، قايدان بىلدىڭدەر؟ – دەيدى. جولاۋشىلار:

— ءبىز ۇرى ەمەسپىز، مال باققان، مالمەن كوزىمىزدى اشقان شارۋانىڭ بالالارىمىز، سوندىقتان بىلدىك. ءبىز توعىشار ەمەسپىز، – دەپ، جاۋاپ بەرەدى.

— قالاي بىلدىڭدەر؟ – دەپ، بي قايتا سۇرايدى.

جولاۋشىلار:

— «تۇيەنىڭ وڭ كوزى سوقىر ما ەدى؟» دەگەنىمىز: تۇيە بارا جاتىپ، ىلعي جولدىڭ سول جاعىنداعى ءشوپتى جەپتى، وڭ جاقتاعى ءشوپتى جەمەپتى. اياعىنىڭ اقساعىن  بىلگەنىمىز: تۇرعان جەرىندە، تۇيە ارتقى سول اياعىن  كوتەرىپ  تۇرىپتى. تۇيەنىڭ قۇيرىعى شولاق ەكەنىن بىلگەنىمىز: قۇمالاق تاستاعاندا، الىسقا جىبەرىپتى. شولاق تۇيەنىڭ قۇمالاعى الىسقا تۇسەدى، قۇيرىقتى تۇيە قۇمالاعىن الىسقا تاستاي المايدى، – دەپتى.

---