InfoHub Logo

زيمەم — زيممەت ءسوزىنىڭ كوپشە ءتۇرى. زيممەت ءسوزىنىڭ بۇل جەردەگى ماعىناسى قارىز دەگەندى بىلدىرەدى. زيمەم داپتەرى قارىزدار جازىلاتىن داپتەر دەگەن ءسوز. باياعىدا وسمان مەملەكەتىندە ازىق-تۇلىك دۇكەندەرىندە قارىزعا العان تۇرعىنداردىڭ ءتىزىمى، قارىزدارىنىڭ مولشەرى جازىلاتىن داپتەر. وسمان ەلىنىڭ بايلارى كەدەيلەردىڭ قارىزىن قۇتىلۋعا كومەكشى بولىپ ساۋاپ جيناۋعا تىرىساتىن. سونداي-اق ءوز ەسىمدەرىنىڭ بەلگىسىز قالۋىنا قاتتى ءمان بەرەتىن، ياعني بۇل قايىرىمدىلىقتى جاسىرىن جاسايتىن. جاعدايى ناشار بولعان كەدەيلەردى، قارىزىن تولەي الماي قينالىپ جۇرگەن ادامداردى انىقتاپ قارىزدارىن تولەپ كەتەتىن. ەگەر قينالىپ جۇرگەن ادامدى تابا الماسا كەزدەيسوق بىرنەشە بەتتەگى قارىزداردى ەسەپتەتىپ، تولەپ، سول بەتتەردى جىرتقىزىپ نەمەسە وشىرگىزىپ كەتەتىن. مۇنداي قايىرىمدىلىق كوبىنە رامازان ايىنىڭ الدىندا جاسالاتىن. رامازان ايىنىڭ الدىندا دۇكەنگە قارىزدار بولعاندىقتان ونى تولەۋگە شاماسى جەتپەي، تاعى قارىزعا ازىق-تۇلىك الۋعا قىسىلىپ، ورازاعا ءجوندى قامدانا المايتىندار بولاتىن. وسىنداي قيىن قىستاۋ جاعدايداعى بۇل كومەكتىڭ قانشالىقتى ۇلكەن سىي ەكەنىن بۇل جاعدايعا تاپ بولعاندار جاقسى تۇسىنسە كەرەك. 

سونداي-اق بۇل قايىرىمدىلىقتىڭ جاسىرىن بولۋىنا ءمان بەرگەنى سونشالىق، بايلار كەيدە بوگدە اۋىلدارعا، ءوزىن تانىمايتىن ەلدى-مەكەندەردەگى دۇكەنگە كەلىپ قارىز داپتەرىن سۇراپ، قارىزداردى تولەپ كەتەتىن. قايىرىمدىلىق ەتكەن ادام كىمنىڭ قارىزىن تولەگەنىن بىلمەيدى. ياعني ەرتەڭ كەزدەسكەندە وعان ىستەگەن جاقسىلىعى ەسىنە ءتۇسىپ، ماڭعازدانا، تاكاپپارلانا المايتىن بولادى. كەدەي دە قارىزىن كىم تولەگەنىن بىلمەيدى، ياعني ەرتەڭ ونى كورگەندە ۇيالىپ، قىسىلىپ جۇرمەيدى. دۇكەنشىلەردىڭ ادالدىعى دا مىقتى بولعان، قارىزى تولەنگەن كەدەيلەردى دەرەۋ حاباردار ەتەتىن.   

---