InfoHub Logo

Qyzylorda oblysynda 14 jyl buryn bolǵan jasóspirimniń ólimine qatysty qylmys isi jańa kýágerdiń paıda bolýymen qaıta ashyldy. Bul týraly İshki ister mınıstrligi habarlady.

Bul týraly Infohub.kz aqparat agenttigi habarlaıdy.

Oqıǵa 2012 jyly Qarmaqshy aýdanynyń Josaly kentinde jasóspirimder arasynda bolǵan jappaı tóbeles kezinde oryn alǵan. Tóbeles barysynda bir oqýshy pyshaq jaraqatyn alǵan. Ol aýrýhanaǵa jetkizilgenimen, esin jımastan kóz jumdy.

İs nege uzaq ýaqyt boıy ashylmaı keldi?

İshki ister mınıstrliginiń Krımınaldyq polısıa departamenti bastyǵynyń orynbasary Rýslan Nazarovtyń aıtýynsha, oqıǵa bolǵannan keıin polısıa janjalǵa qatysýshylardy anyqtaǵan. Alaıda, jetkilikti dálel men kýágerlerdiń joqtyǵynan is uzaq jyldar boıy ashylmaı keldi.

Bıyl jaǵdaı ózgerip, jedel-tergeý toby mańyzdy kýáni taýyp, oqıǵanyń tolyq mán-jaıyn anyqtady. Tergeý barysynda kúdikti retinde sol tóbeleske qatysqan, buǵan deıin basqa aýyr qylmys jasaǵany úshin jazasyn ótegen azamat anyqtaldy.

Kúdikti qamaýǵa alyndy

Kúdikti qazir Qyzylordadaǵy tergeý ızolátoryna toǵytylyp, tıisti tergeý áreketteri júrgizilýde. Jınaqtalǵan dáleldemelerdi usynǵannan keıin er adam kinásin moıyndaǵan.

Tergeý anyqtaǵandaı, qylmysqa jastar arasyndaǵy janjal jáne jeke óshpendilik sebep bolǵan. Qazirgi ýaqytta kúdikti qamaýda otyr, qylmystyq is sotqa joldandy.

İİM ótken jyldardaǵy qylmystardy tergeý jalǵasatynyn jáne kinálilerdiń «erte me, kesh pe zań aldynda jaýap beretinin» atap ótti.