InfoHub Logo

Aqtóbede 18 jastaǵy Iaroslav Gorbýnovtyń óliminen keıin otbasy medısına qyzmetkerlerine qatysty tergeýdi talap etýde. Týystary dárigerlerdiń jas jigittiń qaterli isigin kesh anyqtap, uzaq ýaqyt boıy ony basqa aýrýlarǵa emdegenine senedi. Qyzmettik tekseristen keıin travmatolog pen ýchaskelik dáriger eskertý aldy, biraq Iaroslavtyń jaqyndary bul sheshimmen kelispeıdi.

Bul týraly Infohub.kz aqparat agenttigi habarlaıdy.

Aýyr dıagnozǵa deıingi jol

Ótken jyldyń jazynda Iaroslav aıaǵynyń qatty aýyrǵanyna shaǵymdana bastaǵan. Shildeniń 30-y kúni rentgende artroz anyqtaldy, al qalalyq emhanada jigittiń aıaǵyn shalys basqanyna sheshim qabyldandy. Keıin jeke klınıkada oǵan jazyq taban dıagnozy qoıylyp, massaj ben arnaıy stelka taǵaıyndaldy.

Jas jigittiń jaǵdaıy nasharlaı tústi – ol aqsańdaı bastady, keıin múldem biraq aıaǵyna súıenip júretin boldy. Iaroslavtyń anasy Svetlana Gorbýnovanyń aıtýynsha, dárigerler onyń shaǵymdaryn elemegen, tipti ol áskerden qashý úshin aýrýdy syltaýratty dep kúdiktengen.

Kútpegen dıagnoz

«Áskerge shaqyrý pýnktinde medısınalyq tekserýden ótý kezinde ulyma flúorografıa jasady. Nátıjeler bizdi tań qaldyrdy. Onyń ókpesiniń zaqymdalǵany anyqtalyp, «ehınokokkoz» degen boljam dıagnozy qoıyldy. Iaroslavty ftızıopýlmonologıalyq ortalyqqa operasıaǵa jatqyzdy. Hırýrgıalyq aralasý kezinde dárigerler ókpesiniń shirip bara jatqanyn kórdi», - deıdi Svetlana Gorbýnova.

Gıstologıa ekinshi satydaǵy jazyq jasýshaly ókpe obyryn kórsetti, biraq aıaqtaǵy aýyrsyný basylmady, keıinnen jigit múgedekter arbasyna otyrýǵa májbúr boldy. Tek qosymsha tekserýlerden keıin dárigerler tórtinshi satydaǵy sarkomany anyqtap, ókpeniń zaqymdanýy metastazdar ekeni belgili boldy.

Elordadaǵy em

Otbasyna Astanada emdelýdi jalǵastyrý usynyldy. Elordalyq ortalyqqa jatqyzý úshin qujattardy ata-analar ózderi resimdeýge májbúr boldy. Mashınamen myń jarym shaqyrym jol júrip, Iaroslavty Astanaǵa alyp keldi.

«Astanaǵa kelgende bizdi qabyldaǵysy kelmedi. Baǵyttamasyz jatqyzýǵa bolmaıtynyn aıtty. Aqtóbede bizge eshqandaı soprovodıtelnyı qujat bermegen. Iaroslavtyń jaǵdaıy óte aýyr edi. Ol múgedekter arbasynda otyrdy, aýyrsynýdan qınalyp júrdi», - dep eske alady Svetlana Gorbýnova.

Ulttyq ǵylymı onkologıalyq ortalyqta ony qabyldap, emdeýdi bastady.

«Dárigerler onyń aǵzasynyń, bas mıynan basqa, bári zaqymdalǵanyn aıtty. Hımıalyq emdeýge shydaı almaýy múmkin ekenin eskertti. Biraq men kem degende bir ret kórip kórýdi ótindim», - dep eske alady ana.

Iaroslav segiz kýrs hımıoterapıa jáne on seans sáýlelik terapıa aldy. Sońǵy aptalarynda ol Astanadaǵy kópsalaly medısınalyq ortalyqtyń pallıatıvti kómek bóliminde boldy. Sáýirdiń 28-i kúni jas jigit qaıtys boldy. Mamyr aıynda oǵan 19 jas tolar edi.

Otbasynyń talaby

Iaroslavtyń denesi ushaqpen Aqtóbege jetkizilip, sol jerge jerlendi. Svetlana Gorbýnova ulynyń qaterli isiginiń kesh anyqtalýy men tekserý kezindegi qatelikter saldarynan baǵa jetpes ýaqyt joǵaltqanyna senedi.

«Meniń qolymda Aqtóbede jasalǵan segiz MRT jáne KT bar. Barlyǵy durys oqylmaǵan. Tipti ehınokokkoz dıagnozyn qoıǵan. Astanada keıin: 18 jastaǵy jigitke mundaı dıagnozdy qalaı qoıýǵa bolady? Birden onkomarkerlerdi alý kerek edi», - deıdi Iaroslavtyń anasy.

Áıeldiń aıtýynsha, uly aýyr azap pen qatty aýyrsynýdy bastan keshken.

«Aýyrsynýdan uıyqtaı almaıtyn, biraq eshqashan shaǵymdanbady. Árdaıym: «Bári jaqsy» deıtin. Al sol ýaqytta dárigerler durys emes dıagnozdardy qoıa berdi», - deıdi Svetlana.

Aqtóbedegi onkologıalyq ortalyq jaǵdaıǵa qatysty pikir bildirip, jas pasıentterde sarkomanyń sırek kezdesetinin jáne onyń jaraqattarǵa nemese qabyný prosesterine uqsas bolýy múmkin ekenin atap ótti.

«Statısıka boıynsha, jumsaq tinder sarkomasy mıllıon adamnyń bireýinde kezdesedi. Mundaı isikter jaraqattyq nemese qabyný prosesteriniń betperdesimen jasyrynýy múmkin. Bolǵan jaǵdaı boıynsha tekserý júrgizilip, ishki aýdıt jáne táýelsiz sarapshy komısıasy uıymdastyryldy. Emhana qyzmetkerleriniń keıbirine tártiptik sharalar qoldanyldy», - dedi Marat Ospanov atyndaǵy ZQMÝ medısınalyq ortalyǵynyń dırektory Oljas Orazaev.

Iaroslav bekitilgen emhanada tekserý nátıjesi boıynsha ýchaskelik dáriger men travmatologqa sógis jarıalanǵany habarlandy. Alaıda, týystary mundaı sharalardy jetkiliksiz dep sanaıdy jáne medısına qyzmetkerleriniń áreketterine quqyqtyq baǵa berýge nıetti.

«Ókinishke oraı, biz shetelge kete almadyq – aýrýdyń tez ósýine baılanysty bizge ushýǵa kategorıcheskı tyıym salyndy. Táýekel tym joǵary boldy. Jáne taǵy da aıtamyn: Aqtóbede bizdiń qaterli isigimizdi asqyndyrdy», - dep qorytyndylady Svetlana Gorbýnova.

Qazir otbasy quqyq qorǵaý organdary men Densaýlyq saqtaý mınıstrligine ótinishter daıyndap jatyr. Iaroslavtyń týystary jan-jaqty tergeýge úmittenedi jáne bul oqıǵanyń óńirdegi onkologıalyq aýrýlardy dıagnostıkalaý sapasyna nazar aýdarýǵa sebep bolatynyna senedi.