InfoHub Logo

15 jastaǵy qazaqstandyq fýtbolshy Karım Mendıkanov Ispanıanyń ataqty "Barselona" klýbymen kelisimshartqa otyryp, el tarıhyndaǵy tuńǵysh qazaqstandyq oıynshy atandy. Oraldan shyqqan jas talanttyń ómirinde bul jańalyq úlken ózgerister ákelip, tipti Qazaqstannyń U-16 quramasyna shaqyrtý alýyna da sebep boldy.

Bul týraly Infohub.kz aqparat agenttigi habarlaıdy.

"Barselonamen" kelisimshart: alǵashqy sezimder

Mendıkanovtyń "Barselonamen" kelisimshartqa otyrǵany týraly jańalyq 1 sáýirde, aldymen ıspandyq BAQ-ta jarıalandy. Fýtbolshynyń ózi bul jańalyqty birden qabyldaı almaǵanyn aıtty. "La Masia" (Barselonanyń jastar akademıasy) akkaýnty meniń paraqshama jazylyp, keıin meniń "Barsamen" kelisimshartqa otyrǵanym týraly post shyǵardy. Sodan keıin ákemniń janyna baryp kórsettim, ol qýandy, sodan bári bastaldy", - dedi Karım.

Kelissózderdiń qalaı bastalǵany týraly suraǵanda, ol agentiniń bul jańalyqty ózine jáne ákesine birge habarlaǵanyn aıtty. "Barselona" senimen qyzyǵady" degen sózderdi estigende, Karımniń ózine sený qıyn bolǵan. "Árıne, bala kúnnen "Barsany" qoldap keldim. Biraq sol kúni, maǵan habarlaǵanda, tipti sengim kelmedi. Mundaı úlken klýbqa qabyldanǵanymdy keıin ǵana túsindim", - dep bólisti jas fýtbolshy.

Ákesi Rýslannyń aıtýynsha, katalondyq klýbtyń skaýttary Karımdi birneshe aı boıy baqylap júrgen. "Barselonanyń" bizdi synaqqa shaqyrýy kútpegen jaǵdaı boldy. Olar bizdi eki aı boıy baqylapty. "Barselonaǵa" deıin basqa klýbtar da usynys jasaǵan: "Real Betıs", "Sevılá", "Valensıa", "Jırona". Biraq keıin "La Masıadan" kelip, bizdi komandada kórgisi keletinin aıtty. Shynymdy aıtsam, ózim de senbedim, sebebi Qazaqstannan, tipti Reseıden de mundaı jaǵdaı bolmaǵan. Kelisimshartqa otyrǵanda ǵana senýge týra keldi", - dedi Mendıkanov-starshıı.

Qurama shaqyrtýy: "Úlken jaýapkershilik"

Sáýir aıynda Karım Mendıkanov Qazaqstannyń 16 jasqa deıingi quramasyna shaqyrtý aldy. Shymkentte ótken joldastyq kezdesýlerde ol ár oıynnyń sońynda alańǵa shyqty. Alaıda, jasy men dene bitimi jaǵynan ózge oıynshylardan kishi bolǵandyqtan, negizgi quramda oınaý qıyndaý boldy.

Quramaǵa shaqyrtý alǵany týraly habardy dosynan estigenin aıtty. Alǵashynda senbegenimen, keıin agenti men ákesi arqyly rastalypty. "Ushaqpen kelgende, jigitter meni jaqsy qarsy aldy. Barlyǵy óte jaqsy adamdar", - dedi Karım.

Ulttyq quramanyń jeıdesin kıý – úlken jaýapkershilik ekenin atap ótti. "Árıne, qurama úshin oınaý – úlken jaýapkershilik, eń úzdik oıynymdy kórsetýge tyrysýym kerek", - dedi ol.

Oraldaǵy balalyq shaq jáne jeke bapker

Karım Mendıkanov Oral qalasynda týyp-ósken. Fýtbolmen alty jasynan bastap aınalysady. Alǵashqyda ony jattyqtyrýshy Sergeı Kondakov baıqap, ata-anasyna jeke daıarlaýdy usynǵan. Keıin 10 jyldan soń, Karım alǵashqy bapkerine alǵysyn bildirdi.

Jeke jattyǵýlardan keıin komandaǵa aýysqan. Ondaǵy bapkeri Daýren Karlovıchpen birge kóptegen týrnırlerge qatysyp, júldeler men jeke marapattarǵa ıe bolǵan. Alǵashqy týrnıri Astanada ótken, keıin Almatyǵa, Túrkıaǵa da saparlaǵan.

Kásipqoı fýtbolshy bolatynyn sezingen sáti týraly suraǵanda, Karım bala kúnnen fýtboldan rahat alǵanyn, áli de sol qalpynda ekenin jáne kásipqoı bolýǵa tyrysatynyn aıtty.

"Astana" almady, biraq "Barselona" aldy

Karımniń ákesiniń aıtýynsha, Ispanıaǵa kóshpes buryn ulyn "Astana" fýtbol klýbyna qaraýǵa alǵan, biraq kelisimshartqa otyrý máselesi sheshilmegen. "Bir aı boıy qaraýda boldy, biraq almady. Nege almaǵanyn eshkim túsindirmedi, keri baılanys bolmady", - dedi ákesi.

Karımniń ózi de bul jaǵdaıdy esine aldy. "Naqty esimde joq, biraq birneshe jattyǵý ótkizgenimdi bilemin. Keıin habarlasamyz dedi, biraq habarlasqan joq", - dep bólisti fýtbolshy.

Ispanıaǵa kóshý

2022 jyly ákesimen birge Karım Ispanıaǵa kóship barady. Áýelde bul fýtbolmen baılanysty bolmaǵan. Bala til úırenip, jańa elge beıimdele bastaǵan. 2022 jyly bir aılyq fýtbol lagerine Valensıaǵa barǵan. Oralǵan soń, Karım sol jaqta oqyǵysy keletinin aıtqan. Olar Ispanıaǵa oqý, ıspan tilin úırený úshin barǵan. Bir jyl boıy esh jerde jattyqpaǵan. Ekinshi jyly Barselonaǵa kóship, mektepte oqyp, tek ózi úshin jattyqqan. Úshinshi jyly ony bir ıspanıalyq baıqap, komandaǵa shaqyrǵan, sodan keıin "Sant Kýgat" komandasynyń skaýttary ony kóredi.

Ispanıaǵa kóshkende 11 jasta bolǵanyn aıtty. Ata-anasy oqý, ıspan tilin úırený úshin kóshýdi usynǵan. Qazaqstanda fýtbolmen aınalysý sál qıyndaý bolǵandyqtan, oqýǵa basymdyq berilgen.

Alańdaǵy pozısıasy jáne Messıdiń syılyǵy

Qazaqstan quramasynda Karım oń qanattaǵy shabýylshy retinde óner kórsetken. Biraq ózi kez kelgen pozısıada oınaı alatynyn aıtty. Onyń súıikti pozısıasy – flań, ıaǵnı oń nemese sol qanattaǵy vınger. Ol pas berýdi jón kóredi, sebebi oń aıaqpen oınaıdy.

Ózine unaıtyn fýtbolshylar retinde Levandovskı, Harrı Keındi atady. Al bala kezinen Ronaldýǵa eliktegeni týraly suraqqa, eki oıynshyny da unatatynyn, biraq Messıdi kóbirek jaqsy kóretinin aıtty.

Ákesiniń aıtýynsha, Karımde Messıdiń avtografy bar fýtbolka bar. Bul syılyqty agenti Jańa jyl qarsańynda syılaǵan.

Lamın Iamal jáne eń úzdik mach

Ispanıada fýtbolmen shuǵyldanyp júrgende, Lamın Iamal, Gavı, Mark Bernal sıaqty juldyzdy oıynshylardy kórgenin aıtty. Olarǵa úlgi tutatynyn jetkizdi.

Óziniń eń úzdik machy retinde "Barselona" men "Real" arasyndaǵy kezdesýdi atady. Ol oıynda "Barsa" 4:3 esebimen jeńiske jetken.

Dastan Satpaev jáne álemniń úzdik oıynshylary

Qazaqstandyq fýtbolshylar arasynan Dastan Satpaevty erekshe atap ótti. Ol - Qazaqstannan Eýropaǵa jol tartqan oıynshylardyń biri. Karım "Kaırattyń" Chempıondar lıgasy oıyndaryn da tamashalaǵan.

Bolashaqta fýtbol agenti bolǵysy keletinin aıtty. Qazirgi tańdaǵy úzdik úsh fýtbolshy retinde Olıse, Kılıan Mbappe jáne Lamın Iamaldi atady.

Chempıondar lıgasynyń "Kaıratynda" oınaý nemese "Barselonanyń" qosalqy quramynda otyrý týraly suraqqa, ol árıne "Barselonany" tańdaıtynyn aıtty.