InfoHub Logo

İle aýdanynda «Nurly jol» baǵdarlamasymen eki mektep salynýda. Jápek batyr aýyly men Boraldaı kentindegi bul zamanaýı bilim nysandary atalǵan eldi mekenderdegi úsh aýysymmen oqý máselesin sheshýge yqpal etpek.

Oblys ákimdiginiń baspasóz qyzmetiniń habarlaýynsha, Boraldaı kentindegi mektep 600 orynǵa laıyqtalǵan, búgingi kúnge ǵımarat aıaqtalýǵa jaqyn. Jumys kestege saı júrgizilýde, mektep ǵımaratyn jańa oqý jylyna deıin bitirý josparlanyp otyr.

Jápek batyr aýylynda salynyp jatqan mektep te 600 oryndy. Munda da qurylysshylar belgilengen merzimge jumysty aıaqtaımyz dep otyr.

İle aýdandyq qurylys bóliminiń basshysy Shyńǵys Nurjanovtyń aıtýynsha, jalpy aýdan boıynsha 7 mekteptiń qurylysy josparlanǵan. Olardyń qurylysy bıylǵy jyldyń maýsym aıynda bastalady. Sóıtip, mektep jetispeýshiliginiń qıyndyǵyn kórip otyrǵan taǵy jeti eldi mekenniń balalary úshin kelesi jyly jańa mektep esigin aıqara ashpaq. Sonymen qatar bilim salasy nysandarymen birge «Nurly jol» baǵdarlamasymen aýdanda eki 50 páterlik jalǵa beriletin úı salynýda.

Jalpy, Almaty oblysynda 43 jańa mekteptiń qurylysyn júrgizýdiń nátıjesinde 2016-2017 jyldary úsh aýysymmen oqytatyn jáne apatty mektepterdiń máselesi tolyǵymen sheshiletin bolady. 

---