InfoHub Logo

Búgin, 6 maýsym – musylman qaýymy úshin eń ulyq meıramdardyń biri – Qurban aıt bastaldy. Bul kún – kúlli ıslam álemi úshin rýhanı tazarý men baýyrmaldyqtyń, jomarttyq pen qurbandyqtyń tereń mánge ıe sımvoly.

Qurban aıt – zulhıjja aıynyń onynshy juldyzynda bastalyp, úsh kúnge sozylatyn qasıetti mereke. Islam tarıhynda Ibrahım paıǵambardyń uly Ismaıldy qurbandyqqa shalýǵa nıet etip, Allanyń synaǵynan ótkendigimen baılanystyrylatyn bul kún musylmandardyń senimi men sabyryn, qulshylyǵy men taqýalyǵyn aıqyndaıdy.

Bıyl elimiz boıynsha aıt namazy tańǵy saǵat 07:00-de oqyldy. Jer-jerdegi meshitterde jamaǵat kóp jınalyp, bir-birine izgi tilekterin arnap, qurbandyq shaldy. Qazaqstan musylmandary dinı basqarmasy (QMDB) qurban shalýdyń tártibi men sharıǵı sharttaryn aldyn ala túsindirip, Qurban2025.kz platformasy arqyly onlaın tapsyrys qabyldaýdy uıymdastyrdy.

Qurban aıt – tek dinı rásim ǵana emes, áleýmettik mańyzy zor mereke. Bul kúnderi jaǵdaıy tómen otbasylarǵa, jetim-jesirlerge, muqtaj jandarǵa kómek kórsetilip, qurban eti úlestiriledi. Musylman balasy osy arqyly óz qoǵamyna janashyrlyq tanytyp, birlik pen yntymaqty nyǵaıtady.

Aıt meıramy – otbasy men aǵaıyn-týystyń aralasýyn, kórshi-qolańmen qarym-qatynasty jaqsartatyn rýhanı baılanys. Qazaq halqy ejelden Qurban aıtty erekshe qurmet tutyp, ata-babalar rýhyna Quran baǵyshtap, dastarqan jaıyp, el amandyǵyn tilegen.

Infohub.kz redaksıasy barsha musylman qaýymyn Qurban aıt merekesimen shyn júrekten quttyqtaıdy! Berekeli mereke ár otbasyǵa qýanysh pen molshylyq ákelsin!