InfoHub Logo

Abaı oblysynyń Besterek aýylynda turǵyndardyń qabyrǵasyn qaıystyrǵan qaıǵyly jaǵdaı boldy. Marqumdardyń týystarynyń aıtýynsha, 55 jastaǵy júrgizýshi tizgindegen kólik jol jıeginen shyǵyp, úıdiń qaqpasyn soǵyp, aýlada oınap júrgen alty balany basyp ótken.

Aldymen qaqpa janynda turǵan qyzdy qaǵyp ketken. Artynsha temir qaqpany soqqan kólik aýladaǵy balalardy qysyp qaldyrǵan. Eki bala dóńgelek pen qaqpa arasyna qystyrylyp, aýyr jaraqat alǵan. Júk tıegishtiń kómegimen ǵana olardy kóliktiń astynan alyp shyqqan.

Ókinishke qaraı, bir ul men qyz oqıǵa ornynda kóz jumdy, taǵy bir qyz jedel járdem kóliginde jan tapsyrdy. Qalǵandary túrli jaraqatpen aýrýhanaǵa jetkizildi.

Kórshiler zardap shekkenderge járdemdesip, balalardy aýrýhanaǵa jáne máıithanaǵa jetkizýge kómektesken.

Qaıǵyly oqıǵaǵa sebepker bolǵan júrgizýshi — osy aýyldyń turǵyny. Onyń balalary ákesiniń 20 jyldyq tájirıbesi bar avtobýs júrgizýshisi ekenin, ishimdik te, esirtki de paıdalanbaıtynyn aıtady.

Qazir júrgizýshi qamaýǵa alyndy. Polısıa qylmystyq is qozǵap, jol apatynyń sebep-saldaryn anyqtap jatyr.