InfoHub Logo

Búgin Shymkent qalasynyń qylmystyq ister jónindegi mamandandyrylǵan aýdanaralyq sotynda qala ákiminiń orynbasary Rýslan Berdenovke qarsy qarýly shabýyl isi boıynsha tyńdalym jalǵasty. Sotta ákimdik ǵımaraty aldyndaǵy oqıǵaǵa qatysty beınebaqylaý jazbalary usynyldy.

Tergeý dereginshe, shabýyl 21 sáýir kúni keshki saǵat 21:00 shamasynda oryn alǵan. Kamera jazbalarynda Rýslan Berdenovtiń ákimdik ǵımaratynan shyǵyp, telefonyna úńilgen kúıi qyzmettik kólikke bet alǵany kórinedi. Dál osy sátte «Turǵyn úı Shymkent» JSHS-niń burynǵy dırektory, 31 jastaǵy Ernar Jıembaı kóliktiń janynan júgirip shyǵyp, birneshe ret oq atqan. Aıyptalýshy barlyǵy bes ret qarý qoldanǵan, alaıda kadrlardan oqtyń naqty tıgeni nemese tımegeni anyq baıqalmaıdy.

Vıdeoda Berdenovtiń kólikti aınalyp qashqany, al Jıembaıdyń sońynan qýyp oq atqany kórinedi. Birneshe sekýndtan keıin ákim orynbasarynyń júrgizýshisi kólikpen kelip, aıyptalýshyny qaǵyp ótken. Sol sátte Berdenov te jerge qulaǵan. Júrgizýshi Jıembaıdy ǵımarat jaqqa ıtergende onyń qolynda qarý bolmaǵany baıqalady. Keıin taǵy bir adam kelip, aıyptalýshyny jerge qulatyp, qolyn qaıyrady.

Oqıǵa ornyna ákimdik qyzmetkerleri júgirip shyqqan soń, Jıembaıdy polısıa ustap áketken. Ol Qylmystyq kodekstiń «Adam óltirý» jáne «Qylmysqa daıyndalý men qylmysqa oqtalý» baptary boıynsha aıyptalýda.

Bul is sot óndirisine 22 shildede qabyldanyp, basty tyńdalym 6 tamyzda bastalǵan. Búgingi — ekinshi sot otyrysynda kýágerlerden jaýap alynyp, beınejazbalar zerdelendi.