InfoHub Logo

Abaı oblysynyń ákimi Berik Ýálı jumys saparymen Úrjar aýdanyna baryp, áleýmettik-ekonomıkalyq damý barysymen jáne sheshimin kútken máselelermen tanysty.

Áleýmettik-ekonomıkalyq damý jáne josparlar

Aldymen oblys ákimi aýdan turǵyndarymen kezdesip, esep berdi. Jıynda aýyl sharýashylyǵy, ınvestısıa, ınfraqurylym, bilim berý, densaýlyq saqtaý, mádenıet pen sport salalaryndaǵy jobalar sóz boldy.

Úrjar aýdany aýyl sharýashylyǵy alqaptarynyń kólemi boıynsha oblysta ekinshi orynda. Bıyl 113 myń gektar egistik ıgerilip, sharýalarǵa 1,9 mlrd teńge nesıe berildi. Sonymen qatar, 7,8 mlrd teńgege 9 ınvestısıalyq joba júzege asyrylýda.

Aýyz sýmen qamtý baǵytynda aýdandaǵy 5 aýylǵa sý tartylyp jatyr. Qyzyltý aýylyndaǵy sý júıesi aıaqtalýǵa jaqyn, jumys tolyq bitken soń 582 turǵyn taza aýyz sýmen qamtylady. Jalpy aýdan halqy kezeń-kezeńimen 100 paıyz sapaly aýyz sýmen qamtylmaq.

Bıyl oblysta 358 shaqyrym jol jóndelse, onyń ishinde Joǵarǵy Eginsý, Janaı, Aqjar, Jańa Tilek, Qaraqol aýyldarynyń kósheleri ortasha jóndeýden ótti. Aqjar aýylynda 3,9 shaqyrym jol jóndelip, sapasy tekserildi.

Bilim berý salasynda Úrjardaǵy Abaı atyndaǵy mektep-balabaqsha men Baýyrjan Momyshuly atyndaǵy mektepke kúrdeli jóndeý jasalýda. Jeti mektepke pándik kabınetter ornatylyp, 425 jańa parta men asqana jabdyqtary alyndy.

Mádenıet jáne sport salasynda Joǵarǵy Eginsý aýylynda 100 oryndyq klýb salyndy, Úrjarda Mádenıet úıiniń jobasy daıyndalýda. Aýdandyq aýrýhanaǵa jańa medısınalyq jabdyqtar alynyp, jyl sońyna deıin kúndizgi stasıonary bar ambýlatorıa paıdalanýǵa berilmek.

Turǵyndardyń ótinishteri

Kezdesý sońynda aýyl turǵyndary Mádenıet úıi, sport kesheni, balabaqsha, medısına qyzmetkerlerine jataqhana, jol jáne aýyz sý máselelerin kóterdi. Berik Ýálı barlyq usynystar kezeń-kezeńimen sheshiletinin aıtty.

«Úrjar – shejireli tarıhy men eńbekqor halqy bar qasıetti meken. Mundaǵy máselelerdi bilemin, ret-retimen sheshiletin bolady», – dedi oblys ákimi.

Jeke qabyldaý

Oblys ákimi turǵyndardy jeke máseleleri boıynsha da qabyldady. Kóterilgen túıtkilder qatarynda densaýlyq saqtaý, dári-dármekpen qamtý, áleýmettik kómek, turǵyn úı men ınfraqurylym jaıy boldy. Ákim árbir ótinish nazardan tys qalmaıtynyn, tıisti basqarmalarǵa tapsyrma berilgenin jetkizdi.

Arnaıy áleýmettik ortalyq

Berik Ýálı «Úrjar balalarǵa arnalǵan arnaıy áleýmettik qyzmet kórsetý ortalyǵyna» bardy. Munda 56 balaǵa áleýmettik qyzmet kórsetiledi. Qazirgi ýaqytta ortalyq janynan qosymsha ǵımarat salynyp jatyr. Nysan iske qosylǵan soń qamtylatyn balalar sany 70-ke jetpek.

Aımaq basshysy merdigerge qurylys qarqynyn arttyryp, jumysty sapaly aıaqtaýdy tapsyrdy.