InfoHub Logo

Uly Otan soǵysy aıaqtalǵan soń dúıim jurt jeńispen birge Abaıdyń 100 jyldyq mereı toıyn respýblıka kóleminde birge atap ótkeni belgili. Negizgi toı Semeıde ótedi. Toıdyń bas palýanyna taǵaıyndalǵan báıgeni tartysqa túspeı-aq Qajymuqan atamyz alady. Jasy 74-ke aıaq basqan Qajekeńdi halqy qurmettep, kúrestirmeı-aq bas báıgeni bergen. Sodan balýan atamyz eline baryp úlken toı jasaıdy. Sebebi, Qajymuqan balýan Abaıdyń balasy Turaǵulmen dám-tuzy aralasqan dos bolyp, Kókbaı Janataıulyn aqylshy tutqan adam.

Joǵarydaǵy balýannyń toıyn kórip kýá bolǵan jergilikti jerdiń qalamgeri Ádiham Shilterhanov kólemdi áńgime jazǵan. Osynda mynadaı bir oqyrmandy eleń eterlik epızod bar. Oqıǵa Qajymuqan balýannyń óziniń aıtýy boıynsha berilipti. Uzyn-yrǵasy bylaı: Ońtústik óńirde, Arystan bab kesenesiniń Syr jaq betinde Qanyttoǵaı deıtin nýly-sýly, qamys-quraqty jer bar. Osy ólkede alyp kúsh ıesi Baqtıar deıtin balýan ómir súrgen. Bul kisini Qajekeń kózimen kórgen, baryp sálem bergen. Qajekeń aıtady eken: «Baqtıar balýan qıyn zamanda týyp, beınettiń astynda ótken adam eken. Ár qabyrǵasynyń úlkendigi úsh eli. Aıaq-qolynyń iriligi menen bes ese. Kúshi de artyq. Átteń baǵy janbaǵan adam».

El aýzynda Baqtıar balýannyń jolbarysqa qylysh siltep qaq aıyryp tastaǵany jaıynda aıtylatyn áńgimeniń anyq-qanyǵyn bilmekke qumartqan Qajekeń osy oqıǵa jaıynda balýan aǵasynan suraıdy. Sondaǵy Baqtıar balýannyń aıtqany: Qanyttoǵaıda meniń jas kezimde jolbarys bolǵan. Ań patshasynyń jymyn biletin bylaıǵy jurt toǵaı arasyndaǵy jolmen ólse de júrmeıdi. Tek meniń ákem ǵana qoryqpaı jolbarystyń jymyn kesip óte beretin. Azamat jasyna jetken soń men de sol jolmen júrip kórmekke bekindim. Júrdim, maǵan jolbarys shapty. Qylyshymdy sýyryp aldym da shaýyp tastadym. Sodan úıge kelip ákeme aıtym.

— Áke, men jolbarysqa tap boldym.

— Balam, ony ne istediń?

— Qaq bólip shaýyp tastadym.

Ákem bir túrli kúńirenip ketti. Sóıtti de: «Iapyrym-aı, bul ne sumdyq. Adamǵa mysyq shaba ma eken? Men ótip júrgende basyn eki aıaǵynyń arasyna qysyp alyp qybyr etpeı bajyldap jatatyn. Onyń shapqanyna qaraǵanda meniń urpaǵym usaqtalyp ketken eken ǵoı. Ańnyń aıbaryn qaıtaratyn mysyń joq eken seniń», — dep renjip jatyp qaldy.

Berdihan Qusaıynov

---