InfoHub Logo

Bir shákirt ustazymen egin alqabyn aralap kele jatady. Kenet jol shetinde jatqan tozyǵy jetken bir aıaq kıimge ekeýiniń kózderi túsedi.

Shákirt ustazyna:

— Shamasy, mynaý eginshi sharýanyń aıaq kıimi sıaqty. Tyǵyp qoısaq qaıtedi? Sosyn bir jerge jasyrynyp qalaı abdyrap, sasqanyn qyzyqtaıyq, — deıdi.

Sonda ustazy:

— Kedeılerdi ábigerge salýdy qyzyq kórip, olardyń esebinen kóńil kótergenimiz adamgershilikke jatpaıdy. Ózińe baqyt pen shattyq syılaǵyń kele me? Onda ony mazaqa aınaldyrmaı, kerisinshe, aıaq kıimine aqsha salyp qoıaıyq. Sonan keıin ǵana ne qyzyq bolatynyn kóreıik, — deıdi.

Ustazynyń usynysy kóńiline birden qonǵan shákirt aıtqanyn oryndaıdy. Kóp uzamaı ekeýi jaqyn turǵan aǵashtyń artyna baryp jasyrynady. Sálden soń júzi kún kózine ábden tozyqqan, jupyny kıimdi bir sharýa keledi. Aıaǵyn aıaq kıimine suqqany sol edi, ishindegi zatty sezip, dereý qaıta sýyryp alady. Qolyn salyp edi, aqsha eken. Ekinshi syńarynan da sondaı aqsha shyqty. Aqshaǵa bir, jan-jaǵyna bir qarap, tań-tamasha bop turyp qaldy. Kóz jeter jerde eshkim baıqalmady. Aqshany ustap tizerlep otyra ketti. Jasaýraǵan júzin qolymen basyp otyryp daýystap sóıleı bastady: «Ia, Rabbym! Sen meniń hálimdi ózimnen artyq bilýshisiń. Áıelimniń aýrý ekenin, balalarymnyń ash-jalańash ekeninen habardar boldyń. Bárimizdi basqa túsken náýbetten qutqardyń. Shúkir, shúkir...». Osylaısha, uzaq ýaqyt jasyn tókken kúıi Jaratýshyǵa alǵys aıtyp, shúkirligin bildirip otyrdy.

Manadan beri odan kóz jazbaı qarap otyrǵan shákirttiń qos janary jasqa tolyp, qatty áserge bólendi. Ustazy shákirtine qarap:

— Qazir burynǵy hálińnen baqyttyraq ekenińdi sezip otyrǵan sıaqtysyń. Alǵashqy oıyńdy iske asyrǵanda qandaı kúıde bolar ediń?! — deıdi. Shákirti:

— Iá, ustaz! Ómir boıy umytpastaı dáris aldym. Sizge alǵysym sheksiz! «Bergen kezdegi qýanysh alǵan kezdegi qýanyshtan artyq bolady» degen sózdiń maǵynasyn endi túsindim, — dep jaýap qatty.

---