InfoHub Logo

Tanymal ánshi ári aktrısa Aıgúl Imanbaeva ushaqta bortseriktermen bolǵan jaǵymsyz jaǵdaı týraly aıtyp berdi.

Bul týraly Infohub.kz aqparat agenttigi habarlaıdy.

Ushaq keshigip, sý da tabylmady

Óner ıesi Almatydan Astanaǵa baǵyt alǵan 953-reıspen eki nemeresi jáne kelinimen birge ushqan. Onyń aıtýynsha, ushaq aýa raıyna baılanysty shamamen eki saǵat keshigip ushypty.

Aıgúl Imanbaeva oraza ustaǵandyqtan tamaqtan bas tartyp, tek bir bótelke sý suraǵan. Alaıda bortserik bótelkedegi sý joq ekenin aıtqan. Sol kezde aktrısa aýyzashar ýaqyty jaqyndaǵanda bir staqan sý ákelip berýin ótingen.

Bortserikterdiń salǵyrttyǵy

Ánshiniń sózinshe, aýyzasharǵa 20 mınýt qalǵanda bortserikti shaqyrǵanymen, eshkim kelmegen. Qyzyl shaqyrý batyrmasy janyp turǵanyna qaramastan, qyzmetkerler jaýap bermepti. Keıin taǵy bir bortserik janynan ótip bara jatqanda sý suraǵan.

“Qolymda jylap otyrǵan nemerem bar edi. Bir staqan sý suradym. Biraq ol “Ushaq qonǵanda ózińiz kelip iship ketesiz” dep ketip qaldy”, – deıdi aktrısa.

Áýe kompanıasynyń bedeline nuqsan

Aıgúl Imanbaeva bul jaǵdaıǵa qatty ashýlanǵanyn jasyrmady. Onyń pikirinshe, mundaı áreket áýe kompanıasynyń bedeline nuqsan keltiredi.

“Qazir Ramazan aıy. Aýyzasharǵa sanaýly mınýt qalǵanda bir staqan sý surap ala almadym. Qolymda kishkentaı nemerem jylap otyr. Osyndaı jaǵdaıdan keıin ashýlanǵandyqtan jelige jazýǵa májbúr boldym”, – dep jazdy ol.

Aktrısanyń aıtýynsha, ushaq qonǵannan keıin ol orazasyn jaqyndarynyń úıine baryp ashqan.