InfoHub Logo

Astanada Saltanat Núkenovanyń aǵasy Aıtbek Amangeldi men Qýandyq Bıshimbaevtyń ápkesi Arýjan Bıshimbaeva arasyndaǵy daý sotqa jetip, talap aryz ishinara qanaǵattandyryldy.

Bul týraly Infohub.kz aqparat agenttigi habarlaıdy.

Kitap pen áleýmettik jelidegi daý

Esterińizge sala keteıik, 2024 jyldyń mamyrynda burynǵy ulttyq ekonomıka mınıstri Qýandyq Bıshimbaev azamattyq jubaıy Saltanat Núkenovany óltirgeni úshin 24 jylǵa bas bostandyǵynan aıyrylǵan bolatyn. Alaıda, bul tragedıadan keıin eki taraptyń týystary arasyndaǵy pikirtalas tolastamady.

Ótken jyldyń kúzinde Aıtbek Amangeldi "Ee zvalı Saltanat" atty estelik kitabyn jaryqqa shyǵardy. Keıin Arýjan Bıshimbaeva áleýmettik jelide bul kitapqa qatysty syn aıtyp, avtordy tragedıany jeke paıda úshin qoldandy dep aıyptady.

Arýjan Bıshimbaevanyń málimdemeleri

Ol Instagram paraqshasynda Aıtbek Amangeldige qatysty birneshe aýyr málimdeme jasap, ony haıp qýyp júrgenin, áleýmettik jelilerde bottardy qoldanatynyn jáne halyqtyń janashyrlyǵyn qarjylyq maqsatta paıdalanyp otyrǵanyn jazdy.

Buǵan jaýap retinde Aıtbek Amangeldi atalǵan jazbalardy notarıýs arqyly rásimdep, sotqa júgindi. Ol jarıalanǵan aqparattyń jalǵan ekenin jáne óziniń ar-namysyna nuqsan keltirgenin aıtty.

Sot sheshimi

İs aıasynda eki saraptama júrgizilip, onda Bıshimbaeva jarıalaǵan keıbir pikirlerdiń talapkerdiń bedeline keri áser etýi múmkin ekeni anyqtaldy. Al jaýapker tarapy bul jazbalardyń sýbektıvti pikir ekenin alǵa tartty.

Qosymsha saraptama nátıjesinde Arýjan Bıshimbaevanyń keıbir málimdemelerinde naqty negatıvti mazmun bar ekeni belgili boldy. Sot Instagram jelisinde jarıalanǵan birneshe málimdemeni shyndyqqa sáıkes kelmeıdi dep tanyp, olardy teriske shyǵarýdy mindettedi.

Sonymen qatar, Arýjan Bıshimbaevadan saraptamalar men ókildik shyǵyndary úshin 1 mıllıon teńgeden astam qarajat jáne moraldyq zıan retinde 100 teńge óndiriletin boldy. Alaıda, sot sheshimi ázirge zańdy kúshine engen joq.