InfoHub Logo

Astanadan Shymkentke ushqan FlyArystan áýekompanıasynyń jolaýshysy ushaqtan túskennen keıin sómkesiniń joǵalǵanyn málimdedi. Onyń aıtýynsha, sómkede qujattary men altyn buıymdary bolǵan.

Bul týraly Infohub.kz aqparat agenttigi habarlaıdy.

Oqıǵa 7 mamyrda bolǵan reıste oryn aldy. Jolaýshynyń aıtýynsha, ushaqqa otyrǵan kezde qol júgin qoıatyn oryn bolmaǵan. Sol sebepti bortserik onyń sómkelerin jolaýshy otyrǵan orynnan (4C) artqa, 5B oryndyǵynyń janyna qoıǵan.

Qonýdan keıin jolaýshy sómkesiniń turǵan jerindegi pakettiń jyrtylǵanyn baıqaǵan. Keıin úıine jetkende, ishinde qujattary men altyn áshekeıleri bar kishkentaı qyzǵylt sómkesiniń joǵalǵanyn anyqtaǵan.

Jolaýshynyń talaby

Jolaýshy oqıǵa boıynsha tekserý júrgizýdi, 5A jáne 5C oryndarynda otyrǵan jolaýshylardy anyqtaýdy jáne ushaqtaǵy, áýejaıdaǵy, otyrǵyzý jáne ushyp-qoný aımaqtaryndaǵy beınekamera jazbalaryn tekserýdi surady.

Polısıanyń jaýaby

FlyArystan baspasóz qyzmetine habarlasqanymyzda, jaýap ala almadyq. Alaıda, Kóliktegi polısıa departamentiniń baspasóz qyzmeti aryz boıynsha tergeý bastalǵanyn habarlady.

«Astana áýejaıyndaǵy Kóliktegi polısıa basqarmasy urlyq faktisi boıynsha qylmystyq is qozǵady. Qazirgi ýaqytta oqıǵanyń mán-jaıyn anyqtaýǵa baǵyttalǵan barlyq qajetti tergeý áreketteri júrgizilýde. QR QPK-niń 201-babyna sáıkes, basqa aqparat jarıa etilmeıdi», - dep habarlady vedomstvo.

Oqıǵanyń basqa da mán-jaılary ázirge resmı túrde naqtylanbady.