InfoHub Logo

Bolashaqtyń ájesi nemere qyzdaryna áńgime aıtyp otyr.

- Osy kúni jaıaý júrý degendi qoıdyńdar. Bárińde bir-bir ushatyn tabaqsha. Baıaǵynyń qyzdary jaıaý júrýshi edi. Jumysqa barý úshin úıdiń janyndaǵy aıaldamaǵa deıin jaıaý júrip baratyn. Ol soqa basy bolsa da jaqsy ǵoı, janynda sómkesi, qolynda uıaly telefony bolady. Sol júkpen sonda jaıaý júrip barady. Áne, sondaı qıyndyqtardy da kórip júrgenbiz.

Ol kezde jańbyr jaýsa, qyzdar qýanyp jatatyn, mahabbat keldi, mahabbat keldi, qolshatyr ustap shyǵamyz dep. Ol ýaqytta jigitter ádemi jigit, ádemi emes jigit dep bólinip jatady. Qazir bárińniń de júzińnen qan tamyp tur ǵoı. Sonda ádemi emes jigit kele jatsa, qyz dereý qolshatyryn jıyp ala qoıatyn, malmandaı sý bolyp turady. Sóıtip, mahabbat úshin qurbandyqqa da baryp jatqan qyzdardy kórdik. Al ádemi jigit kele jatsa, qyz jymıyp qana qolshatyrynyń astyna kirgizip ala qoıady. Bar ýaqıǵanyń bári sol qolshatyrdyń astynda ótip jatatyn. Áne, sóıtip júrip úılenip ketedi.

Ol zamanda jumystan kelip, bel sheship otyryp as ishý degen qaıda? Kúndiz jumystan keldim ǵoı dep, kishkene qısaıaıyn deseń, brıgadır terezeni qamshysymen qaǵyp turady: "áleýmettik jelige shyq, áleýmettik jelige shyq" dep. Ókil keledi zirkildep: "qansha dos jınadyń, esebin ber, joǵary jaq aqpar suratyp jatyr" dep. Sonda telefonmen alysyp otyryp, kınosyn, serıalyn kórip úlgere beredi. Úkimet sony talap etip otyr. Adam degenniń ózi bir qıyndyqqa moıymaıtyn, ıtjandy bolatynyn sonda kórgenmin.

Ol ýaqytta qyzdar oqyǵan qyz, oqymaǵan qyz dep bólinip jatady. Bári de oqyǵan qyz bolǵysy keledi. Oqyǵan qyz oqymaǵan qyzdy dúkenge jumsaǵysy kelip turatyn ýaqyt qoı. Kádimgi áleýmettik teńsizdiktiń bar kezi. Sol oqyǵan qyzdardyń ózi bólinip jatady: bir dıplomy bar oqyǵan qyz, eki dıplomy bar oqyǵan qyz, úsh dıplomy bar oqyǵan qyz dep. Ara salmaqtary da soǵan qaraı aıqyndalatyn.

Ol kezde bir ulttyń qyzy ekinshi ulttyń balasyna tıip jatsa, sony namys kóredi. "Qudaı-aı, ony nesine namys kóredi eken, aralarynda mahabbat bolsa boldy emes pe?" dep jatýshy edi. Osy kúni ózge planetanyń jigitterine ǵashyq bolyp júrsińder. Onyń uıat ekenimen de, basqa ekenimen de sharýalaryń joq. Jersúıgishtik qasıetteriń kemip bara jatyr...

- Áne, bularǵa birdeńe aıtsa boldy, ushatyn tabaqshalaryna minip alyp, dóńgelenip-dóńgelenip ketedi de qalady. Úlken aıtyp otyr-aý, áje aıtyp otyr-aý degenmen sharýalary joq. Óıbýı, namazymdy oqıyn, qaı zamanda da namazyń qalmaıdy eken ǵoı. Áýp, pirim, qudaı, o, qudaı, ornymnan úsh umtylyp ázer turdym ǵoı, baıaǵyda meni urshyqsha úıirilip "Qyzyl órikke" bılep júrgen qyz dep kim aıtady qazir.

---