InfoHub Logo

"Ózderińmen birge bolsyn, - dedi ájesi áke-sheshesine. - Endi mektepke baratyn ýaqyty da jaqyndap keledi. Aqyry qalanyń mektebine oqytamyz dep otyrsyńdar ǵoı. Úırenise bersin. Ózderińniń balalaryń ǵoı".

Qalaǵa kelgeli sodan beri jaqpaǵany, áýeli, áke-sheshesi turatyn úı boldy. Aıadaı ǵana bir bólme edi. Bylaı shapqylasa da, bylaı shapqylasa da sheshesinen eskertý alyp qala beredi. Biraq ony ońaılyqpen moıyndaýǵa joq. Keıde otyryp alyp ursysady. Al tym qatty ketip bara jatsa, kánigi ádisine kóshedi. Óziniń qorǵaný tásili bar. Jylaıdy. Jylap otyryp "senderdi ájeme aıtamyn" dep qorqytady.

Keıde anasy uıaly telefonyn ala salyp, ájesine qońyraý shalatyny bar. Ondaıda anasy ájesine "bizdi ájeme aıtamyn dep qorqytyp jatyr" dep kúledi.

Sodan keıin-aq ájesi bar sharýasyn tastap, osynda artynyp-tartynyp jeter edi. Nemeresin aınalyp-tolǵanady. Ájesi ákelgen tátti, dámdilerdi jep, sonyń aldynda mereıi ósip, meıirlenip otyrady.

Keıde osy úıdegi úp-úlken eki adamnyń qalaısha ózin ájesi sıaqty túsinbeıtindigine tańǵalady. Ákesi áýelde jyly ushyrap qaraýshy edi. Qazir ol da salqyn. Ózi isteıtin qara jumystan silesi qatyp, sharshap keledi. Sońǵy ýaqytta daýys kóteretin de bolyp júr. Mundaıda óziniń qorǵaný tásiline kóshedi. Kúshimdi sarqyp almaıyn degendeı, áýelde jaı bastaıdy. Beride toqtata qoısa, sol jerden tyıyla qoımaq. Biraq keıde erli-zaıypty ekeýi bir-birimen ýádelesip alǵandaı, tyrs etip úndemeıdi. Mundaıda daýys údeı túsedi. Ákesi de, sheshesi de júzderi qýqyl tartyp, qulaqtaryn qatarlasa tars basar edi. "Qoıa qoıshy endi, - deıdi ekeýi de jarysa, - sen jaqsysyń, qoıa ǵoı".

"Baǵanadan beri solaı demeısińder me?"

Sonda da tym uzap kettim, kilt toqtaýǵa bolmaıdy degendeı, aqyryn-aqyryn baryp báseńdeıtini bar.

Keıde anasymen birge bópesin oınatyp otyrady. Bul ózine unaıdy. Máz bola kúledi. Al keıde táltıip turǵan bópesin ıyǵynan qushaqtap, baýyrsynyp ózine qaraı tartady. Mundaıda mamasy shar ete túsedi: "Óltiresiń be balany?! Qystyń ǵoı moınynan!" Jaýap ornyna syqylyqtap turyp kúledi. Onysy kózin jypylyqtatyp, osyǵan qarsy kelmeıinshi degendeı, ıleýine kóne beredi.

Keıde túsinde de mamasymen ursysyp jatady, al keıde uıyqtap jatyp ta syqylyqtap kúledi.

Endi birshama ýaqyttan keıin mektepke barady. Bálkim, mektepte erkeligine baıyppen qaraıtyn ádemi bir muǵalıma táteı kútip otyrǵan shyǵar.

---