InfoHub Logo

Páter alamyn dep san soǵyp qalmańyz. Almaty ákimdigi men «Qazaqstan Turǵyn úı Kompanıasy» (QJK) úleskerlerden qarajat tartýǵa resmı ruqsaty bar turǵyn úı keshenderiniń jańartylǵan tizimin usyndy. Qazirgi tańda megapolıstegi 28 nysan ǵana zańdy túrde jumys istep tur.

Bul tizim ásirese ıpoteka nemese bólip tóleý arqyly baspanaly bolǵysy keletinder úshin óte mańyzdy. Qujattary túgel 28 nysannyń tolyq tizimin myna silteme arqyly kóre alasyzdar.

Zań qataıdy: Endi jarnamaǵa da shekteý bar

Esterińizde bolsa, bıylǵy maýsym aıynda «Turǵyn úı qurylysyna úlestik qatysý týraly» zańǵa mańyzdy ózgerister engizilgen edi. Endi qurylys kompanıalaryna qatysty talap kúsheıdi. Eger zańsyz salynǵan úı bolsa, ony jarnamalaýdyń ózi qylmys bolyp sanalýy múmkin.

Zań boıynsha, tómendegideı jaǵdaılarda qurylys salýshyǵa kópqabatty nemese jeke úılerdi jarnamalaýǵa tyıym salynady:

• Úleskerlerden aqsha tartýǵa ruqsaty bolmasa;

• Biryńǵaı operatormen kepildik sharty jasalmasa;

• Ekinshi deńgeıli bank arqyly jobalyq qarjylandyrý joq bolsa.

Buryn tek jobalyq qujattama bekitilse boldy, jarnama bere beretin «tesik» zańnamadan alynyp tastaldy. Bul — «kotlovan» kezinde halyqtan aqsha jınap alyp, izin sýytatyn alaıaq kompanıalardyń jolyn kesý úshin jasalǵan qadam.

Sonymen qatar, zańǵa «jeke turǵyn úıler kesheni» degen jańa uǵym engizildi. Endi mundaı kotej qalashyqtary da úlestik qatysý zańyna tolyq baǵynýy tıis.

Qurylys kompanıasyn qalaı tekserýge bolady?

Úı almas buryn, "jeti ret ólshep, bir ret kesken" jón. Ákimdik ókilderi kez kelgen turǵyn úı keshenine aqsha quımas buryn, onyń qujattaryn muqıat tekserýge keńes beredi.

Ol úshin arnaıy senim telefondary men resmı portaldar iske qosylǵan:

1. Qurylysqa ruqsat qaǵazdary bar-joǵyn bilý úshin: Qala qurylysyn baqylaý basqarmasynyń anyqtamalyq call-ortalyǵyna habarlasyńyz: +7 (705) 896-6000.

2. Úleskerlerden aqsha jınaýǵa ruqsaty bar-joǵyn bilý úshin: Almaty qalalyq josparlaý jáne ýrbanıstıka basqarmasyna qońyraý shalyńyz: +7 (727) 240-80-00.

3. Onlaın tekserý: «QJK» AQ-nyń turǵyn úı portaly — homeportal.kz saıtynda barlyq aqparat ashyq kórsetilgen.