InfoHub Logo

Qazir álemde geosaıası turaqsyzdyq kúsheıip, kóptegen elder ishki naryǵyna ǵana súıenýge májbúr bolyp otyr. Saýda soǵystary, sanksıalar, logıstıkalyq tizbekterdiń úzilýi — bul jaǵdaılar jahandyq ekonomıkaǵa eleýli soqqy berip, birqatar elderdiń "jabyq rejımge" kóshýine alyp keldi. Alaıda Qazaqstan bul baǵytty emes, ashyqtyq pen seriktestikke negizdelgen pragmatıkalyq saıasatty tańdady. Bul — ýaqyt talabyna saı ári durys sheshim.

Bul jaıynda Qazposhta basshysy Ásel Janasova da pikir bildirip, elimizdiń turaqtylyǵy dál osy ashyq saıasatqa súıenetinin aıtty. Onyń aıtýynsha, Qazaqstannyń geografıalyq ornalasýy — basty artyqshylyqtardyń biri. Eýrazıanyń qaq ortasynda ornalasqan el Qytaı men Eýropa arasyndaǵy "altyn kópirge" aınalýǵa qaýqarly. Bul tek tranzıttik áleýet emes, logıstıkalyq hab retinde jańa deńgeıge kóterilý múmkindigi.

Kólik dálizderin damytý — júk tasymalymen ǵana shektelmeıdi. Bul jańa jumys oryndary, ınvestısıa aǵyny, aımaqaralyq jáne halyqaralyq baılanystardyń nyǵaıýy degen sóz. Búginde Transkaspıı halyqaralyq kólik marshrýty arqyly elimiz iri jobalardy júzege asyrýda. Bul Qazaqstannyń strategıalyq bolashaǵyn aıqyndaıtyn mańyzdy baǵyttardyń biri.

Álem jabylyp jatqanda, Qazaqstan kerisinshe dıalog pen áriptestikke jol ashyp otyr. Bul sheteldik ınvestorlarǵa: «Qazaqstanǵa senýge bolady, munda turaqtylyq pen ashyqtyq bar» degen naqty belgi. Ásel Janasovanyń oı-pikiri el Prezıdentiniń baǵytymen úndes: Qazaqstan aımaqtyq baılanystardy damytyp, halyqaralyq bızneske senimdi seriktes bolýǵa umtylyp keledi.

Basty mindet — osy baǵyttan taımaı, ashyqtyqty eldiń basty artyqshylyǵyna aınaldyrý.

Aıbar Oljaev