InfoHub Logo

Bul oqıǵa jaı ǵana mal urlyǵy emes, aýyldyq jerdegi qaýipsizdik máselesin qaıta kóterdi. Zardap shekken fermer quzyrly organdardyń jumysyna kóńili tolmaıtynyn ashyq aıtyp otyr.

Oqıǵa Eńbekshiqazaq aýdany, Báıdibek bı aýylynyń mańynda oryn alǵan. Qaskóıler jaı ǵana urlyq jasap qoımaı, qoldaryna qarý alyp, eki úıir jylqyny nysanaǵa alǵan. Onyń tórteýi oqıǵa ornynda til tartpaı ketse, qalǵan tórteýi aýyr jaralanyp, qansyrap qalǵan.

Qaraqshylardyń áreketi tym qatygez bolǵan. Olar atyp óltirgen jylqylardy túnimen soıyp, tek etin sylyp alyp ketken. Oqıǵa ornynda terisi men basy ǵana qalǵan.

Zardap shekken sharýa qojalyǵynyń ıesi Qızattyń aıtýynsha, ol 4 qańtar kúni keshkisin maldaryn túgendep, qojalyq mańyna jınaǵan. Alaıda, tún jamylǵan urylar maldy Almaty-Qorǵas kúrejoly aýmaǵyna ıirip ákelip, oq atqan.

«Túnde urylar jylqyǵa oq jaýdyrǵan. 4 bas jylqyny soıyp, etin alyp ketken. Taǵy 4 jylqyǵa oq tıip, qazir qorada qansyrap tur», — deıdi kúıingen sharýa.

«Aıǵaq zattar bar, biraq nátıje joq»

Eń ókinishtisi, aýyl turǵyndary polısıanyń jedeldigine kúmánmen qarap otyr. Turǵyndar tártip saqshylaryn kúndizgi saǵat 11:00-de shaqyrǵanymen, jedel tergeý toby oqıǵa ornyna tek qarańǵy túskende, saǵat 18:00 shamasynda jetken.

Fermerdiń sózine qaraǵanda, oqıǵa ornynda qylmyskerlerden qalǵan temeki tuqyly, sýdyń qutysy jáne atylmaı qalǵan oqtar tabylǵan. Alaıda, jábirlenýshi polısıanyń isti ashýǵa degen qulshynysyn baıqamaǵanyn aıtady.

«Zań men tártip ústemdik quratyn eldegi áreket osy ma? Polısıa tek formaldy túrde jumys istegendeı bolady. Ádettegideı sylbyr, únsiz», — dep ashyndy qojalyq ıesi.

Qazirgi tańda aýyl turǵyndary úreı qushaǵynda otyr. Qarýly urylardyń erkindikte júrgeni halyqty qoldaǵy azǵantaı malyn jaıylymǵa shyǵarýdan qorqýǵa májbúrledi.