InfoHub Logo

12 tamyz kúni Almatydan Astanaǵa baǵyt alǵan Air Astana áýe kemesinde jolaýshylardyń záre-qutyn qashyrǵan jaǵdaı oryn aldy. Oqıǵaǵa kýá bolǵan jolaýshy Threads áleýmettik jelisinde jazǵanyndaı, ushaq Balqash mańynda ushyp bara jatqanda qatty týrbýlenttilikke tap bolyp, kenet tómen quldyraǵan.

Áleýmettik jelidegi jazba avtory sol sátte 7 aılyq sábıimen jáne kenje sińlisimen birge bolǵanyn, eń aldymen balasyn qalaı qorǵaıtynyn oılaǵanyn jetkizgen. Onyń aıtýynsha, bortserikter jolaýshylardan ústelshelerin jınap, oryndyqtaryn tikteýdi, sondaı-aq bıik óksheli aıaq kıim men áshekeı buıymdaryn sheshýdi suraǵan.

Ekıpaj qoný kezinde qatty soqqy bolýy múmkin ekenin eskertkennen keıin, jolaýshylardyń arasynda jylaǵandar, jaqyndaryna qoshtasý habarlamalaryn jazǵandar bolǵan. Alaıda ushaq Almaty áýejaıyna esh kedergisiz sátti qonǵan. Kompanıa tarapynan resmı túsinikteme ázirge berilgen joq.