InfoHub Logo

Pekındi alapat nóserden ondaǵan adam qaza taýyp,80 myńnan astam turǵyn evakýasıalandy,-dep habarlaıdy Infohab.kz.

Qytaı astanasy Pekınde sońǵy onjyldyqtaǵy eń kúshti nóser jaýyn saldarynan keminde 30 adam qaza tapty. Eń kóp shyǵyn Mıýn taýly aýdanynda tirkeldi — munda 28 adamnyń máıiti tabylǵan. Taǵy eki turǵyn Iansın aýdanynda qaza tapty, dep habarlady Qytaıdyń memlekettik "Sınhýa" agenttigi.

Qatty jaýyn tek Pekınmen shektelmeı, eldiń basqa óńirlerine de zardabyn tıgizdi. Hebeı provınsıasynda jaýǵan jaýyn men taý kóshkinderi saldarynan segiz adam qaza taýyp, tórt turǵyn iz-tússiz joǵalyp ketken. Qutqarý jumystary jalǵasyp jatyr.

Apatty jaǵdaıǵa baılanysty Pekın, Tánszın jáne Hebeı aımaǵynan 80 myńnan astam adam evakýasıalandy. Kósheler men aýyldardy sý basyp, kólik qozǵalysy toqtady. Júzdegen ushaq pen poıyz reısi keıinge shegerildi nemese múldem toqtatyldy. Tánszın qalasynda tutas aýyldar sý astynda qaldy, bir qabatty úılerdiń tek shatyrlary ǵana kórinetin jaǵdaıǵa jetken.

Qytaı meteorologtarynyń málimetinshe, 23 shildeden beri aımaqqa 573 mm jaýyn-shashyn túsken — bul kórsetkish búkil jyldyń ortasha mólsherine teń. 26 shilde kúni Hýaıchjoý sekildi taýly aımaqtarda tek bir saǵattyń ishinde 95 mm-den astam jaýyn jaýǵan. Bul — ár sharshy metr jerge 95 lıtr sý tústi degen sóz.

Meteorologtar jaýyn-shashynnyń mundaı kólemi ádetten tys ekenin atap ótti. Sarapshylar bul jaǵdaıdy jahandyq klımat ózgerisiniń áserimen baılanystyrýda. Qytaı bıligi zardap shekken óńirlerge kómek jetkizýdi uıymdastyryp, tasqyn qaýpi saqtalyp otyrǵan aýdandarda saqtyq sharalaryn kúsheıtti.

Qazirgi tańda izdestirý-qutqarý toptary joǵalǵan adamdardy izdestirýde, al ınjenerlik qyzmetter qulaǵan kópirler men búlingen joldardy qalpyna keltirýge kirisken. Sýǵa batyp qalǵan aýyl-aımaqtarda indet taralýynyń aldyn alý úshin sanıtarlyq-dezınfeksıalaý sharalary bastaldy.

Jaǵdaı baqylaýda bolǵanymen, jergilikti bılik turǵyndardy asa saq bolýǵa jáne tótenshe jaǵdaı týraly aqparatty únemi baqylap otyrýǵa shaqyrýda.