InfoHub Logo

Almaty qalasynda jol erejesin buzýshylyqtar, ásirese, mas kúıde kólik júrgizý jáne asa qaýipti jyldamdyqpen júrý derekteri kóbeıip ketti. Osyǵan baılanysty polısıa joldardaǵy baqylaýdy kúsheıtip, arnaıy reıdter uıymdastyrdy.

Bul týraly Infohub.kz aqparat agenttigi habarlaıdy.

Sońǵy úsh kúnde 5 myńnan astam buzýshylyq

Polısıa málimetinshe, sońǵy úsh kúnde qalada 5 myńnan astam jol erejesin buzý faktisi tirkelgen. Onyń ishinde 43 júrgizýshi mas nemese esirtkiniń áserinen kólik basqarǵan. Olardyń barlyǵy kólik júrgizý quqyǵynan aıyryldy. Sondaı-aq, 369 adam qajetti qujatsyz kólik tizgindegeni anyqtaldy. 94 kólik arnaıy aıyppul turaǵyna qoıyldy. Jyldamdyqty asyrýdyń 2 myńnan astam jaǵdaıy tirkeldi.

Áleýmettik jelidegi "túngi jarystar"

Polısıa keıbir júrgizýshilerdiń áleýmettik jelilerde ereje buzýshylyqtaryn kórsetip, vıdeoǵa túsirip jarıalaıtynyn atap ótti. Vedomstvo mundaı árbir jaǵdaı tekserilip, kináliler jaýapqa tartylatynyn basa aıtty.

Saǵatyna 250 shaqyrym jyldamdyq

Aıta keteıik, Al-Farabı dańǵylynda bir júrgizýshi kóligin saǵatyna 250 shaqyrymǵa deıin údetken. Onyń tulǵasy anyqtalyp, birneshe fakti boıynsha ákimshilik is qozǵaldy. Sot sheshimimen ol 10 táýlikke qamaýǵa alyndy.

Polısıa úndeýi

Polısıa departamenti qaýipti júrgizý adamdardyń ómiri men densaýlyǵyna qater tóndiretinin eske saldy. Júrgizýshilerdi jol erejelerin qatań saqtaýǵa jáne ózderi men aınalasyndaǵylardy qaýipke dýshar etpeýge shaqyrdy.

Al-Farabıdegi ólimmen aıaqtalǵan jol apaty

Jeli qoldanýshylary 21 naýryzǵa qaraǵan túni Al-Farabı dańǵylynda bolǵan ólimmen aıaqtalǵan jol apatyn qyzý talqylaýda. Onda Zeekr elektromobıli joldyń qarsy baǵytyna shyǵyp, Mercedes kóligimen soqtyǵysqan. Mercedes kóliginiń júrgizýshisi men eki jolaýshysy (22 jáne 20 jastaǵy qyzdar) oqıǵa ornynda kóz jumdy. Zeekr kóliginiń júrgizýshisi aman qaldy.

Qazirgi ýaqytta polısıa bul isti QR Qylmystyq kodeksiniń 345-baby 4-bóligi boıynsha tergep jatyr. Bul bap boıynsha 10 jylǵa deıin bas bostandyǵynan aıyrý jazasy qarastyrylǵan.