InfoHub Logo

Almaty qalasy Bostandyq aýdanyndaǵy kóshelerdi jasandy ıntellekt (II) arqyly tazartqan degen daý jalǵasyn tapty. Qala ákimdigi qyzmettik tergeý bastap, qoqysqa tolǵan ýrnalar men las aýmaqtar úshin jaýapty tulǵalarǵa aıyppul saldy.

Bul týraly Infohub.kz aqparat agenttigi habarlaıdy.

Ne boldy?

Aýdan ákimdiginiń málimetinshe, áleýmettik jelide jarıalanǵan, II tehnologıalary qoldanylǵan bolýy múmkin degen kúdik týdyrǵan sýretterge qatysty tekserý bastaldy. Levıtan kóshesindegi, №125 mekteptiń dál aldyndaǵy aýmaqtyń «buryn» jáne «keıin» túsirilgen sýretterindegi sáıkessizdikterdi jeli qoldanýshylary baıqaǵan. Bul sýretterdi áleýmettik jeli II arqyly jasalǵan nemese óńdelgen kontent retinde belgilegen.

Tekserý nátıjesi qandaı boldy?

Ákimdik aýmaqtyń aýdandyq mańyzy bar ekenin jáne oǵan «Jasyl Jer Almaty» JSHS merdigerlik uıymy qyzmet kórsetetinin habarlady. Keste boıynsha ýrnalar kúnine eki ret tazartylýy tıis. Alaıda, adam kóp júretin jáne kólik qatynasy qarqyndy bolǵandyqtan, keıbir ýaqyttarda ýrnalardyń tolyp qalýyna jol berilgen. Bul jaǵdaı aýmaqtyń sanıtarlyq jaǵdaıyn nasharlatqan. Bostandyq aýdany ákimi apparaty men aýdandyq tabıǵat qorǵaý polısıasy bóliminiń birlesken tekserýi nátıjesinde jaýapty tulǵalarǵa ákimshilik yqpal etý sharalary qoldanyldy.

Merdiger Ákimshilik quqyq buzýshylyq týraly kodekstiń 505-babynyń 1-bóligi boıynsha – abattandyrý erejelerin buzǵany úshin jaýapqa tartyldy. Aıyppul mólsheri buzýshynyń sanatyna baılanysty: jeke tulǵalarǵa – 20 AEK, shaǵyn bızneske – 30 AEK, orta bızneske – 40 AEK, iri bızneske – 100 AEK bolady. Bir jyl ishinde qaıta buzǵan jaǵdaıda aıyppul somasy artady.

Qazirgi tańda merdigerler aýmaqty retke keltirip, barlyq qoqys tazartylǵanyna ákimdik sendirdi.

Buǵan deıin ne bolǵan edi?

Buǵan deıin, mamyr aıynyń ortasynda, Almaty turǵyny Bostandyq aýdany ákimdiginiń kóshelerdi tazartý úshin II qoldandy degen kúdigin alǵa tartqan bolatyn. Bul jazba jelide tez taralyp, 100 myńǵa jýyq qaralym jınady. Qoldanýshylar sýretterdegi sáıkessizdikterdi, sonyń ishinde birdeı kóleńkeler men rakýrstardy baıqaǵan.