InfoHub Logo

Atyraýda bir otbasynyń músheleri qaza tapqan qylmystyq is boıynsha sot otyrysy jalǵasýda. Bul joly marqum Násip Óteshqalıevanyń týǵan inisi Tilekqabyl Óteshqalıev kýálik etti.

Bul týraly Infohub.kz aqparat agenttigi habarlaıdy.

Alǵashqy tanystyq pen sottaǵy kezdesý

Kýágerdiń aıtýynsha, ol kúdikti Sultan Sársemalıevti alǵash ret jıeni Aqbaıandy alyp qashqan kezde kórgen. Keıin olar ózderi úıge kelgende ǵana taǵy bir ret kezdesken. «Men ony sotta ekinshi ret kórip otyrmyn. Eshqandaı janjal bolǵan joq. Men ony tanymaımyn, sotqa deıin tek bir-aq ret kórdim, onyń ata-anasyn ǵana bilemin», – dedi Tilekqabyl Óteshqalıev.

Sońǵy baılanys jáne kúdikti aýdıohabarlama

Sotta kýáger sońǵy ret týystarymen qarym-qatynas týraly da aıtyp berdi. Onyń sózinshe, qyrkúıek aıynda Maqsot Qarabalınmen WhatsApp arqyly jáne telefonmen sóılesip turǵan, alaıda keıin baılanys úzilgen. Týystary sońǵy ret 2025 jyldyń 19 qyrkúıeginde Atyraýǵa barǵan. Al Maqsot Qarabalın sol kezde aýylda qalyp, sharýashylyqtaǵy malǵa qaraǵan.

Erekshe nazar aýdarylǵan jaıt – 7 qarasha kúni Násip Óteshqalıevanyń atynan jiberilgen aýdıohabarlama. Buǵan deıin sotta marqum áıeldiń 4 qarashada kóz jumǵany aıtylǵan bolatyn. «Men onymen sońǵy ret aýdıohabarlama arqyly sóılestim. 1 qarashada ol habarlasyp, hal-jaǵdaıymyzdy surady. Keıin 7 qarasha, juma kúni odan daýystyq habarlama keldi. Ol jylap turyp, jaǵdaıymyzdyń qalaı ekenin surady. Osydan keıin sóılespedik», – dedi kýáger.

Daýystyq habarlamanyń qupıasy

Sotta kýágerden Násip Óteshqalıeva 4 qarashada qaıtys bolǵan bolsa, 7 qarashada onyń atynan aýdıohabarlamany kim jibergeni suraldy. «Naýryzdyń telefonynan ápkem Násiptiń daýystyq habarlamasy keldi. Bizdiń oıymyzsha, telefondardy bir-birine jaqyndatyp, aldyn ala jazylǵan aýdıony jibergen bolýy múmkin», – dep túsindirdi ol.

Kýágerdiń aıtýynsha, osydan keıin otbasy múshelerimen baılanys tolyq úzilgen. Al olardyń maly satylyp jatqany týraly aqparat taraǵan soń týystary izdeý jumystaryn bastaǵan.