InfoHub Logo

Almatydaǵy jańa «Qalqaman» metro stansıasynyń ishki kórinisi men aınalasyndaǵy abattandyrý jumystarynyń barysy belgili boldy. Qala ákimi Darhan Satybaldy qurylys alańyna baryp, jumystardyń qalaı júrip jatqanyn kózbe-kóz tekserdi.

Bul týraly Infohub.kz aqparat agenttigi habarlaıdy.

Jumystardyń aıaqtalý kezeńi

Ákimniń aıtýynsha, stansıadaǵy árleý jumystary aıaqtalýǵa jaqyn. Eskalatorlar men lıftiler ornatylyp, jeldetý, beınebaqylaý, poıyz qozǵalysyn basqarý jáne órt qaýipsizdigi júıeleri sıaqty ınjenerlik komýnıkasıalardy montajdaý jumystary júrgizilýde. Qurylys-montaj jumystaryn 2026 jyldyń birinshi jartyjyldyǵynyń sońyna deıin aıaqtaý josparlanǵan.

Aınalasyn abattandyrý

Stansıa mańyndaǵy 7 gektar aýmaqta aýqymdy kógaldandyrý jumystary qarastyrylǵan. Munda aǵashtar men myńnan astam butalar otyrǵyzylyp, jaıaý júrginshiler aımaqtary, jaryqtandyrý, avtoturaqtar, avtobýs aıaldamalary jáne qoǵamdyq kólikterge arnalǵan oryndar jasalady.

Jańa tonneldiń mańyzy

Aıta keteıik, aqpan aıynyń ortasynda «Qalqaman» stansıasy Almatynyń qoldanystaǵy metro jelisine qosyldy. «Baýyrjan Momyshuly» men «Qalqaman» stansıalary arasyndaǵy uzyndyǵy 1 593 metrlik oń jaq tonneldi qurylysshylar burǵylap ótken bolatyn. Qala bıliginiń málimetinshe, tonnelde relster men janasý relsi tóselip, barlyq ınjenerlik komýnıkasıalar ornatyldy.