InfoHub Logo

Memleket jáne qoǵam qaıratkeri Altynbek Sársenbaıulynyń ólimine kim tapsyrys bergeni týraly másele áli kúnge deıin qoǵamda qyzý talqylanyp keledi. Degenmen, bul qylmysqa burynǵy prezıdent Nursultan Nazarbaevtyń qatysy bar degen boljamdarǵa naqty dálel joq ekeni aıtylýda.

Bul týraly Infohub.kz aqparat agenttigi habarlaıdy.

Saıasattanýshy, Májilis depýtaty Aıdos Sarym "Sadaq media" arnasyna bergen suhbatynda Altynbek Sársenbaıulynyń ólimin burynǵy prezıdentke tikeleı baılanystyrýdyń negizsiz ekenin málimdedi. Onyń aıtýynsha, mundaı aıyptaýlarǵa eshqandaı naqty dálel keltirilmegen.

Nazarbaevqa qatysty aıyptaýlar negizsiz

«Kezinde Rysbek Sársenbaev aǵamyz emosıamen biraz dúnıeni aıtyp jiberdi. Áli de aıtyp júr. Biraq oǵan dálel joq qoı. Ol jerde Nazarbaevtyń qulaǵy kórinýi múmkin. Biraq ádilet degen bolýy tıis qoı, jobalap, ymdap bolsa da dáleldeı alǵan adam joq. Men óz basym Altynbektiń ólimin Rahat Álıevke jaqyndatam. Altynbekpen jyldap aralasqan, áli kúnge deıin sol ortada júrgen biraz azamatpen aralasam. Biraq olardyń eshqaısysy da tikeleı Nazarbaevtan kórip jatqan joq. Bul Rysbektiń óziniń ustanymy, óziniń jeke pikiri. Kezinde Altynbektiń janynda júrgen, qaǵazyn jazyp berip júrgen Rysbek emes, men bolatynmyn. Men ony jaqsy bilemin», – deıdi Aıdos Sarym.

Kekshildikten arylǵan tulǵa

Depýtat sonymen qatar, Altynbek Sársenbaıulynyń minezi týraly da aıtyp ótti. Onyń aıtýynsha, saıasatker alǵashqyda óte kekshil bolǵanymen, ýaqyt óte kele bul qasıetinen arylǵan.

«Altynbek óte kekshil adam boldy. Kóp adamdy jek kórdi. Solardyń biri – Serik Ábdrahmanov edi. Ekinshi bir adam boldy. Ol – Baltash Tursynbaev bolatyn. Biraq ýaqyt óte kele ózgerdi, sanaly ǵumyrynda óziniń jek kóretin adamdarmen tatýlasyp, solardyń deńgeıine túsip, sóıleskenin kórdim», – deıdi depýtat.