Álıfdek aı ıúzińe ǵıbrat1 ettim,
Bı, báláı2 dártińa3 nısbát4 ettim.
Tı, tilimnán shyǵaryp túrli ábıat5,
Sı, sánaı6 mádhıa7 húrmát ettim.

Jem, jamalyń8 qandaı aq rýzı9 maǵan,
Ha, hálıllık10 tappadym, janym, sánan.
Hı, halaıyq, men emes, bári yntızar,
Dál, darıǵa ǵıshyq oty bermes aman.

Zál, zálıllik11 kórgen soń, saıraı ber, til,
Re, rıza qylmaǵyńdy, ıar12, óziń bil.
Zı, záhárdaı13 kúıdirdi ǵıshqyń qatty,
Syn, sálámat qalmaǵym boldy múshkil.

Shyn shıkár láb14 esime túsken saıyn,
Sat, sabyrym qalmady, men ne áıláıin.
Zat, zaıǵ15 ómirim ótti meniń beker,
Taı, talaptan áıteýir qur qalmaıyn.

Zaı, zalym kóp qylysh bop janǵa oqtaldy,
Ǵaıin, ǵaqylymdy basymnan tartyp aldy.
Ǵaıyn, ǵarıblik basyma túskennen soń,
Fı, faıdań tıe me dep jaza saldy.

Qaf, qabyl bolar ma eken jazǵan hatym,
Káf, kámıl16 aqylyń, asyl zatym.
Lám, lábińnen em qylsań men derttige,
Men, mehrińnen qalmas ed bar apatym.

Non, nalá ǵyp qaıǵyńmen kúıdirdiń kóp,
Ýaý, ýáılana17 ǵıshqyń ýaıym jep,
hı, hesh faıdań tımese óldi oılańyz,
Lám álıf, lá ıláha ılalla18 dep.

Ia, ıarym, qalaı bolar jaýap sóziń,
Mát – qasyń, táshtıt – kirpik, sákin – kóziń19.
Útirmen asty-ústili jazýda bar,
Bolýǵa asty-ústili kónseń óziń.

1 Ǵıbrat (arabsha) – úlgi, ónege, naqyl, maǵyna.
2 Báláı (arabsha) – pále, qıynshylyq.
3 Dártińa (dárd) – túp maǵynasy aýrý, azap shegý; óleńdegi maǵynasy – ǵashyq bolyp derttený.
4 Nısbát (arabsha) – baılanys, bir nársemen baılanysta bolý. Bul arada em taptym degen degen maǵynada.
5 Ábıat (arabsha) – óleń, jyr; báıt sóziniń kópshe túri.
6 Sánaı (arabsha) – sulý, ádemi, sheber.
7 Mádáh, mádhıa (arabsha) – maqtaý, óleń, oda.
8 Jamal (arabsha) – kórik, sulýlyq.
9 Rýzı (parsysha) – kún, kúndeı.
10 Hálıl (arabsha) – shyn dos, súıgen jar.
11 Zálıl (arabsha) – azǵyn, jeksuryn, qorlanǵan.
12 Iar (parsysha) – dos, súıikti maǵynasynda.
13 Záhár (parsysha) – ý.
14 Shıkár láb (parsysha) – tátti erin.
15 Zaıǵ (arabsha) – joldan taıý.
16 Kámıl (arabsha) – tolyq.
17 Ýáılana (arabsha) – baqytsyzdyq, qaıǵy.
18 Lá ıláha ılalla (arabsha) – Alladan basqa eshbir táńiri joq.
19 Bul bir jolda arab jazýyndaǵy sózderdi durys oqý úshin
qoıylatyn belgilerdi keltiredi.

---