InfoHub Logo

Tárbıe saǵatynyń taqyryby: «Ana – ómir tiregi»
Maqsaty:
1. Analardy, qyzdardy jáne ustaz - analardy mereke kúnimen quttyqtaý
2. Ata - babadan kele jatqan saltymyz anany qurmetteý, qyz balany syılaýǵa úıretý
3. Oqýshylar boıynda meıirimdilik, ınabattylyq, sypaıylyq jáne basqa da adamgershiliktiń jaqsy qasıetterdi qalyptastyrýǵa tárbıeleý.
Merekelik zal sáıkes bezendiriledi, slaıd - shoý júrip turady, sharlar, gúlder, ana týraly jazylǵan qanatty sózder:
Aq shashty ana: "jastyǵym — balam" deıdi.
Aqyldy bala: "aı - kúnim — anam" deıdi.
Ananyń alaqany balaǵa aıdyndy qonys.
Balanyń bilegi aýyrsa, ananyń júregi aýyrady.

Saıystyń jospary:
İ. Analar ózderin tanystyrýy
İİ. Jaǵdaıattardy sheshý joldary
İİİ. Óner kórsetý Ana men balasy
VI. Dastarhan máziri

1 - júrgizýshi:
«Ana» degende tolqymaıtyn júrek, tolǵanbaıtyn jan joq. Osy úsh qana áripten turatyn «ana» sóziniń astarynda ushan teńiz oı jatyr. Ana — árbir adam balasy úshin eń ystyq, janǵa jaqyn, maǵynaly da qasterli sóz. Adamzat balasy alǵash dúnıe esigin ashqanda ananyń aq sútimen boıyna nár alady, ana qushaǵyna enip, ana meıirimine bólenedi. Adamnyń aýzynan shyǵatyn eń alǵash sózi de – «ana». Mirjaqyp Dýlatov aǵamyz aıtqandaı, bizdi súıetuǵyn, kúıetuǵyn, árqashan qamymyzdy oılap júretuǵyn abzal jandy adam, bul – ana. Endeshe búgingi erteńgiligimizdi ómir tiregi – ANA degen ardaqty jannyń qurmetterine arnalady.

2 - júrgizýshi:
Armysyzdar, arý qyzdar, abzal ana,
Anaǵa teń keletin bar ma dana?
Merekeń búgingi kún qutty bolsyn,
Qýanyshpen qushaqtarǵa gúlder tolsyn.

Qurmetti analar, ustaz - analar jáne arý qyzdarymyz, qosh keldińizder! Mereke qarsańynda ótkeli otyrǵan «Ana - ómir tiregi» atty analar saıysyna qatysýshy analarymyzdy balalarymen ortaǵa shaqyramyz.
(Mýzyka oınalyp ortaǵa analar shyǵady)

1 - júrgizýshi:
Dúnıeniń nury, ómirdiń gúli, qyzyqtyń qyzyǵy – ananyń qolynda. Ana bir qolymen besik terbetse, ekinshi qolymen álemdi terbetedi.
Qarsy alaıyq búgingi analardy,
Ustaǵan qazaǵymnyń ata - saltyn.

2 - júrgizýshi:
Qurmetti saıysqa qatysýshylar, saıysty bastamas buryn sizderdi saıystyń baǵasyn beretin ádil qazylar alqasymen tanystyryp óteıin.
(Qazylar alqasy tanystyrylady )

1 - júrgizýshi:
Óner qýyp saıyskerler óter deımiz,
Bir basyna óneri jeter deısiz.
Saıysqa kelgen analar kezektesip,
Tanystyryp ózderin ótse deımiz!
Siz bilesiz be, tanystyra bilý de – óner. Bul «ónerdiń» qyr - syryn meńgerip úlgermegen bolsańyz, "eshten kesh jaqsy". Sonymen, tanystyrý kezegi analarda.
2 - júrgizýshi:
Qyz erkem kestesimen kórkem,
Ul erkem ónerimen kórkem, - dep analarymyzdyń ónerine kezek beremiz;

1 - júrgizýshi:
Ómirdiń ıesi sen, ǵazız Ana,
Keltirgen dúnıege neler dana.
Anasyz batyr da joq, aqyn da joq,
Ómirdiń altyn kilti sonda ǵana, (Analar sıtýasıalyq suraqtarǵa jaýap beredi)

Sıtýasıalyq suraqtar:
1. Balańyz sporttyq jattyǵýdan kelip sabaqqa daıyndalmaı uıyqtaımyn dedi, Sizdiń isińiz....
2. Sizdiń súıikti fılmińiz ben balanyń jaqsy kóretin múltfılmi bir ýaqytta bolatyn boldy,
Sizdiń áreketińiz... teledıdardy kim kóredi?
3. Dúkende sútke jetetin ǵana aqshańyz qaldy, al balańyz alma áperýińizdi surady, Siz ne alasyz? Nege?
4. Sizdiń balańyz bir balamen tóbeleske túsken eken, sebebin qalaı anyqtaısyz?
2 - júrgizýshi:
Ananyń kózinen nur tógilip, jan - jaǵyna shýaǵyn tógedi. Osy shýaqpen jylynyp, asyl ananyń qushaǵynda meıir alyp júrgen biz – altyn anany máńgi qasterlep, eńbegin baǵalap óteıikshi!
1 - júrgizýshi:
As adamnyń arqaýy – dep analarymyz ázirlep ákelgen dastarhan mázirine nazar salaıyq.
(Ádil qazylar alqasy qorytyndysyn shyǵarady. Marapattaý rásimi.)
2 - júrgizýshi:
Anany aspandaǵy aı men kúnge, jaryq juldyzǵa, baǵa jetpes asyl zattarǵa teńeý dástúri de óz tilimizde berik qalyptasqan. Olaı bolsa sóz – sózdiń eń tóresi: anańdy qalaı syılasań, óz balańnyń anasyn da solaı syıla, barlyq áıel zatyna, tipti jas náreste qyzyna da qurmet kórset, olarǵa qoldan kelgenshe qamqorlyq jasańdar.
1 - júrgizýshi:
Qoryta aıtqanda, barlyq adam ana aldyndaǵy paryzyn ótep, aq sútin aqtap, ananyń shashyna aq túsirmeı, tek osy kıeli jandardyń baqytty bolýyn oılaý kerek. Sebebi eń baqytty adam – anasy bar adam. Jer betine jaqsylyq nuryn sebetin analarymyz aman bolsyn! dep merekemizdi aıaqtaımyz.
Saý bolyńyzdar!
(Saıystar arasynda mýzykalyq óner kórsetiledi)