InfoHub Logo

17 naýryzda Sybaılas jemqorlyqqa qarsy is-qımyl agenttiginiń tóraǵasy Asqat Jumaǵalıdiń basshylyǵymen jedel keńes ótti. Kezdesýde Ulttyq quryltaıdyń 4-shi otyrysynda Memleket basshysy bergen tapsyrmalardyń oryndalýy talqylandy.

Agenttik «Zań jáne Tártip» ıdeologıasyn engizýdi jalǵastyrýǵa basymdyq beredi. Bul qoǵamda quqyq buzýshylyqqa, ásirese sybaılas jemqorlyqqa tózbeýshilik qalyptastyrýǵa baǵyttalǵan. Sondaı-aq, «Adal azamat» tujyrymdamasy aıasynda azamattardy sybaılas jemqorlyqqa qarsy oqytý jáne patrıottyq tárbıege erekshe kóńil bólinedi.

Jemqorlyq táýekelderin azaıtý úshin sıfrlandyrý men jasandy ıntellekt engizý jumystary jalǵasady. «Sıfrlyq teńge» arqyly qarjy qozǵalysyn baqylaý, bilim salasynda «bultty býhgalterıa» engizý, «e-Sport» jáne «e-Qurylys» sekildi aqparattyq júıeler memlekettik qarajattyń maqsatsyz jumsalýyna tosqaýyl bolýǵa tıis.

Energetıka, agroónerkásip, kólik jáne týrızm salalaryndaǵy jemqorlyq táýekelderi erekshe nazarǵa alynýda. Bul salalar ekonomıkanyń turaqty damýyna úlken múmkindik beredi. Agenttik osy baǵyttar boıynsha taldaý júrgizip, anyqtalǵan táýekelderdi joıý jóninde usynymdar engizdi.

Prezıdent atap ótkendeı, jyl saıyn jańa ınvestısıalyq jobalar iske qosylyp, qomaqty búdjet qarajaty bólinedi. Sondyqtan Antıkor memlekettik qarajattyń tıimdi ári nysanaly paıdalanylýyn qamtamasyz etýge kúsh salmaq.