InfoHub Logo

Azattyq radıosy qyzmetin toqtasa, elde zań men tártip dıktatýrasy kúsheıedi - saıasattanýshy

AQSH úkimetiniń «Azattyq» radıosyn (Radio Free Europe/Radio Liberty) qarjylandyrýdy toqtatýy múmkin ekeni týraly aqparat qoǵamda qyzý talqylanyp jatyr. Bul jańalyqqa baılanysty pikir ekige bólindi: bir tarap radıostansıany táýelsiz aqparat kóziniń biri dep sanasa, endi bireýler ony sheteldik yqpal quraly retinde kóredi.

Qazirgi ýaqytta AQSH «Azattyq» radıosyn qarjylandyrýdy resmı túrde toqtatty degen naqty derek joq. Biraq 2025 jyldyń aqpanynda AQSH Úkimetiniń tıimdilik departamentiniń basshysy Ilon Mask «Azattyq radıosy» men «Amerıka daýysy» radıostansıalaryn jabýdy usyndy. Ol bul uıymdardy «radıkaldy solshyldar» dep atap, salyq tóleýshilerdiń qarajatyn durys paıdalanbaı otyrǵanyn málimdedi. Bul usynysty Qyrǵyzstan prezıdenti Sadyr Japarov ta qoldap, «Azattyqtyń» dáýreni bitkenin aıtqan bolatyn.

Qazaqstanda «Azattyq» radıosynyń taǵdyryna alańdaýshylyq bildirip jatqandar kóp. Saıasattanýshy Shalqar Nurseıit bul radıostansıanyń qyzmeti toqtasa, elde «zań men tártip dıktatýrasynyń» kúsheıetinin aıtty.

Facebook jáne basqa da áleýmettik jelilerde jýrnalıser men azamattyq belsendiler «Azattyq» radıosynyń Qazaqstan qoǵamy úshin mańyzdy ekenin jazyp jatyr. Jýrnalıs Qoıshybek Múbarak:

"Táýelsiz aqparat quraldaryna qysym jasalyp, jýrnalıser jazyqsyz sottalyp jatqanda da «Azattyq» jýrnalıseri buǵyp qalǵan joq", – dep málimdedi.

Degenmen, «Azattyqtyń» jabylǵanyna qýanǵandar da joq emes. Jýrnalıs Almas Altaı Facebook paraqshasynda:

"RIP. AZATTYQ RADIOSY" – dep jazdy. Ol bul radıostansıa eshqashan halyqtyń múddesin oılamaǵanyn, kerisinshe, el ishindegi dúrbeleńdi kúsheıtýge baǵyttalǵanyn aıtty.

Altaıdyń jazbasyn synǵa alǵandar da bar. Keıbir qoldanýshylar onyń pikirin bıliktiń múddesine saı dep baǵalap, jazbanyń «tapsyryspen» jazylǵanyn meńzedi.

Qazirgi tańda «Azattyq» radıosynyń bolashaǵy áli de belgisiz. AQSH úkimeti resmı túrde qarjylandyrýdy toqtatqany týraly habarlama taratqan joq. Biraq bul taqyryptyń qyzý talqylanyp jatqanynyń ózi Qazaqstandaǵy táýelsiz aqparat quraldaryna degen kózqarastyń qanshalyqty ártúrli ekenin kórsetedi.