InfoHub Logo

Anam Qońyrbaıqyzy Kúljámılanyń rýhyna arnaımyn.


- Qulyndarym, - deıdi apasy sýretterge qarap otyryp. - Sábıtim men Keńesim ǵoı. Tuńǵyshtarym. Osy eki qulynyma kóz tıdi. El suqtanyp qaraı berýshi edi. Ásirese, Sábıtke. Estıar adamsha oılanyp turýshy edi. Tili shyǵyp taqyldap turǵan bala ǵoı. "Áı, myna baldaryń túbi
bir jerden shyǵatyn bala, myna bala bolaıyn dep turǵan bala ǵoı" dep qoımaýshy edi. Ekeýi de qalpaqtaı ushty ǵoı, qulyndarym. Biriniń artynan biri kete bardy apasyn tastap...

Ákeńniń úlken inisi muǵalim ǵoı. Ol bala ózi saýatty pedagog boldy. Sabaǵyna baılanysty jazǵan dúnıelerin úlken jýrnaldarǵa usynyp otyratyn. Keıin mektepke de basshylyq jasady. Aýdannyń bilim bóliminde de jaýapty qyzmet atqardy. Qazaly aýdanynyń mádenıet bólimin de basqardy. Ol kezde muǵalim ǵoı. Sábıt sony erekshe jaqsy kóretin. "Táte" dep úıretken edik. Sol tátesin qatty jaqsy kóredi.

Ákeń qyzmetine ketedi ǵoı. Keıde qaladan qyzmetker jigitter keledi. Solardy úıge ertip keletini bar. Apy kirip, kúpi shyǵyp jatasyń ǵoı, úı bolǵan soń. Keńes te birjaǵynan qolbaılaý. Sonda Sábıttiń qaı jaǵynan shyǵyp ketetindigin bilmeısiń, zyp berip mektepke tátesin izdep ketip qalady eken. Sábıtte quldyrańdap mektepke jete bergende, muǵalimder keńsesiniń terezesinen kórip otyrǵan bar muǵalim qyz syrtqa atyp shyǵatyn kórinedi.

- Sábıt! Sábıt! Táteńe keldiń be? - deıdi qyzdar.

- Iá, - deıdi bala basyn ızep.

- Júr, táteńe alyp baramyz.

Ol qyzdardyń arandatqaly turǵanyn bala qaıdan bilsin? Aparady da, ana balanyń sabaq berip jatqan klasyna kirgizip jiberip, ózderi
syqylyqtaı kúlip, dúrkireı qashatyn kórinedi. Ana muǵalim balamen oıyndary kelip júr ǵoı. Sábıttiń qaperinde eshteńe joq, tátesin kórgenine qýanyp, klasqa arsalańdaı kirip barady. Oqýshylar dý etip kúletin kórinedi. Kúlmeı qaıtsin endi, aǵaıdyń kip-kishkentaı inisi klasqa kirip kelip turǵasyn. "Óı, bar bol, bar bolǵyr. Ana sheshesi qaıda qarap otyrǵany, balaǵa qaramaı?" Sodan ana bala maǵan renjıdi ǵoı.

Ol kezdiń oqýshylary eresek, estıar boldy. Sosyn aǵaıdyń aýzynan shyqqan sózdi qaǵyp alyp otyratyn. Bilimniń qadiri bar kez ǵoı. Bilimde qadir bolǵanda ǵana, muǵalimde qadir bolady. Bilimnen qadir ketse, muǵalimnen de qadir ketedi. Bilimniń ózinen qadir ketpeıdi ǵoı, bilimniń ózinen nege qadir ketsin?! Ketirip turatyn pendeniń sanasy ǵoı. Bilim degen adamǵa shyńyraýdyń túbindegi sýdaı bolyp turýy kerek.
Sodan álgi Sábıtti joǵary klastyń bir oqýshy qyzy kóterip ákep tastap turady: "Apa, Sábıt mektepke aǵaıdy izdep ketip qalypty". Ana bala túste tamaǵyn ishýge kelgende sosyn maǵan urysady ǵoı: "Balaǵa qaramaı, qaıda qarap otyrǵanyń, bul? Myna bala meni mektepke izdep
ketip qalypty. Bizdiń qyzdardyń da oıyndary keledi de júredi, osyny aparyp klasqa kirgizip jiberip..."

- Qulyndarym! - deıdi apasy sýretterdiń betin alaqanymen sıpap.

- Erteń ana dúnıege barǵanda, aldymnan shyǵady ǵoı qos qulynym. Bular ómirden perishte ketti ǵoı.

Qos sýrettiń birinen ózine shap-shaq teńizshi formasyn kıgen súıkimdi sábı kózi kúlimdep qarap turady. Al dál osyndaı ekinshi sýretten kekili jalbyrap, saýsaǵyn tistelegen kishkene sábı montany keıipte qarap otyrar edi. Bular - munyń aǵalary, apasynyń tuńǵyshtary. Olardyń
týýy týraly kýálikteri de saqtalyp qalǵan.

Apasy 1998 jyldyń 13 qańtarynda 70 jasynda ómirden ozdy.

---