InfoHub Logo

Qazaqstanda 1 sáýirden bastap komýnaldyq qyzmetterdiń tarıfteri ósedi. Bul týraly QR Ulttyq ekonomıka mınıstrliginiń Tabıǵı monopolıalardy retteý komıteti habarlady. Moratorıı aıaqtalǵannan keıin tarıf saıasaty kezeń-kezeńimen jáne teńdestirilgen túrde júrgiziletin bolady.

Bul týraly Infohub.kz aqparat agenttigi habarlaıdy.

Atalǵan komıtet 26 naýryzda tarıf saıasaty máseleleri boıynsha dóńgelek ústel ótkizdi. Onda jylý, elektr, sýmen jabdyqtaý jáne sý burý, sondaı-aq gazben jabdyqtaý salalaryndaǵy tarıfterdi odan ári retteýdiń negizgi tásilderi qaraldy.

Tarıf saıasatynyń negizgi baǵyttary

Vedomstvonyń habarlaýynsha, úkimet qabyldaǵan sharalar azamattardyń tabysyn qorǵaýǵa jáne ınflásıany tejeýge baǵyttalǵan. Komýnaldyq tarıfterdi kóterýge moratorıı engizý 2026 jyldyń naýryz aıynyń sońyna deıin tutynýshylarǵa tarıftik júktemeniń ósýin boldyrmaýǵa jáne úı sharýashylyqtaryna qosymsha qarjylyq turaqtylyqty qamtamasyz etýge múmkindik berdi.

Komıtet ókilderi dóńgelek ústel qorytyndysy boıynsha biryńǵaı tásil ázirlengenin atap ótti: moratorıı aıaqtalǵannan keıin tarıf saıasaty kezeń-kezeńimen jáne teńdestirilgen túrde iske asyrylatyn bolady. Bul rette halyqqa túsetin qarjylyq júkteme barynsha az deńgeıde saqtalady jáne qabyldanatyn sheshimder máseleniń áleýmettik sezimtaldyǵyn eskeredi.

Infraqurylymdy jańǵyrtý jáne baǵany tejeý

Komýnaldyq ınfraqurylymdy jańǵyrtý máselelerine aıtarlyqtaı kóńil bólindi. Investısıalyq jobalardy iske asyrý bekitilgen kestelerge sáıkes tolyq kólemde jalǵasýda. Bul júıelerdiń tozýyn azaıtýǵa jáne ómirdi qamtamasyz etý júıeleriniń senimdiligin arttyrýǵa baǵyttalǵan.

Memlekettik tarıf saıasatynyń negizgi qaǵıdaty – tutynýshylar men tabıǵı monopolıalar sýbektileriniń múddeleri arasyndaǵy teńgerimdi qamtamasyz etý. Bul halyq úshin qyzmetterdiń qoljetimdiligin jáne jetkizýshilerdiń qarjylyq turaqtylyǵyn qoldaý qajettiligin eskere otyryp sheshim qabyldanatynyn bildiredi.

Jalpy, iske asyrylyp jatqan sharalar 2026 jyly ınflásıalyq prosesterge baqylanatyn jáne boljamdy áser etýge múmkindik beredi. Bul ekonomıka men azamattardyń tabystary úshin basqarylatyn jáne qaýipsiz dıapazonda ustaýǵa baǵyttalǵan.

Sondaı-aq, áleýmettik mańyzy bar azyq-túlik taýarlaryna baǵany tejeý boıynsha sharalar qaraldy. Oǵan óndirýshiler úshin elektr energıasy men temirjol tasymaly qunynyń ósýin shekteý kiredi. Bul ónimniń ózindik qunyn tómendetýge jáne negizgi azyq-túlik baǵalaryn turaqtandyrýǵa yqpal etedi.

Áleýmettik qorǵaý sharalary

Halyqty áleýmettik qorǵaý máseleleri basymdyqtardyń qatarynda qala beredi. Áleýmettik jaǵynan osal toptar úshin turǵyn úı kómeginiń tetigi jumys isteıdi. Ol komýnaldyq qyzmetterge arnalǵan shyǵyndardy ataýly óteýdi kózdeıdi.

Dóńgelek ústel qorytyndysy boıynsha tarıf saıasatyn odan ári jetildirýdiń baǵyttary aıqyndaldy. Olar komýnaldyq qyzmetterdiń qoljetimdiligin qamtamasyz etýge, ınfraqurylymnyń sapasy men senimdiligin arttyrýǵa, sondaı-aq halyqtyń múddelerin qorǵaýǵa baǵyttalǵan.