InfoHub Logo

Halyq ishinde mynadaı bir ańyz bar eken: ertede ataqty bir dombyrashy jigit joldastarymen jolaýshylap kele jatyp, sýsyndap alý úshin jol-jónekeı bir úıge túsedi. Bulardyń aldynan bir qabaǵan ıt shyǵyp úıge kirgizbeıdi. Sonda úıden bir boıjetken qyz shyǵady. Jigit qasyndaǵy joldasyna: «Mynaý netken kórgensiz edi, kelgen qonaqtyń atyn baılamaq túgil, ıtti de qorymady-aý!» deıdi. Jigitter úıge kirse, qyz olarǵa kóz salmaı, tósek ústinde keste tigip otyrady. Dombyrashy jigit tósektiń bas jaǵynda turǵan kúmisteýli dombyrany alyp, shertpekshi bola bergende qyz:

— Dombyrany beri ákelińiz, buzyp qoıasyz, — deıdi. Jigit ashýmen dombyrany qyzǵa laqtyrady. Qyz dombyranyń qulaq kúıin buzyp tastap:

— Shertkish bolsańyz, endi shertińiz, — dep jigitke qaıta beredi. Jigit qulaq kúıi buzylǵan dombyramen uzaq bir kúı sherte bastaıdy. Jigit kúıi qyzdyń kóńil-kúıin tebirentip jiberedi.

Qyz kergishti súıep qoıyp, jigitke qaraı jyljı túsedi. Jigit:

— Aýylymyzǵa aıta baraıyq, sizde bir kúı shertip berińiz, — dep dombyrany qyzǵa beredi. Qyz da bir kúı shertip, dombyrany jigitke qaıta usynady. Jigit taǵy aǵytylyp bir kúı sherte jóneledi. Jigittiń ónerine rıza bolǵan qyz qymyz quıýǵa yńǵaılana bergende, qolynda saýmal quıǵan kónegi bar sheshesi úıge kirip:

— Bularyń kim, ıen úıde dúrildegen? — dep ashýlanady. Qyz:

— Apa, jolaýshy eken, sýsyn ishkeli kelipti, — dep ana ashýyna basý aıtyp, qymyz quıa bastaıdy. Qyz dombyrashy jigitke bir kese qymyz usynyp: «Kúıińizdiń aty ne?» — dep suraıdy. Sonda jigit: Bul — «Aq erke» degen kúı, al mynaý «Aq tolqyn», mynaý «Jaı tolqyn», — dep oǵan qosa taǵy eki kúı shertken eken.

Áshim osy áńgimeni estigennen keıin, bul kúıdiń deregin kóp izdep taba almaıdy, aqyry sol áńgime jelisi boıynsha óz aldyna qyzǵa arnap, «Aq erke», «Aq tolqyn» degen eki kúı, keshigip oılanatyn sheshesine arnap, «Jaı tolqyn» dep bir kúı shertedi.

---