InfoHub Logo

Bul sonaý erte zamanda bolǵan eken. Ol kezde soǵystyń ne ekenin eshkim bilmepti. Bireýdi-bireý óltirmeıdi eken. Kedeı de, baı da, sarań da bolmapty.

         Kúnderdiń bir kúni Jaqsylyq degen kisiniń áıeli ul taýypty. Shildehanaǵa kóp adam jınalypty. Dıýana da kelipti. Dıýana sábıdiń betine qarap:

         — Myna bala túbinde jurtqa pále bolyp júrmese ne qylsyn, – depti.

         Jyl artynan jyl ótipti. Bala ósip er jetedi. Ósken saıyn sarańdyǵy da arta beredi. Dúnıege qomaǵaılanyp, eki kózi qantalap qaraıtyn bolady.

         Pyshaq, shot, balta sekildi ótkir zattarǵa áýes bolyp alady. Mundaı zattaryn jurt odan jasyratyn ádet taýypty.

         Kúnderdiń bir kúninde sarań bala ózine sadaq pen jebe jasap alady da qartaıǵan áke-sheshesin qýyp jiberedi. Daladaǵy ańdar men qustardyń bári meniki bolsa dep armandaıdy.

         Bir kúni ol qyrǵa shyǵady. Kóktem kezi eken. Kún jarqyrap, qustar saırap, jer júzi qulpyryp turady. Sarań qarasa baǵyndaǵy alma aǵashynda kógershin qonaqtap otyr eken. Ol: "Meniń alma aǵashyma qonaqtap otyrǵan kógershin de meniki bolý kerek" - deıdi. Sóıtedi de kógershindi kózdep, sadaǵymen atýǵa yńǵaılanady. Dál sol kezde kenetten aq kógershin ǵaıyp bolyp ketedi de, onyń ornynda saqaldy óziniń ákesiniń otyrǵanyn kóredi. Sarańnyń qoly salq etip tómen túsip ketedi. Mine qyzyq. Alma aǵashynda taǵy da aq kógershin otyr. Sarań sadaǵyn taǵy kóteredi de ákesiniń aǵashta otyrǵanyn taǵy kóredi. Yza bolǵan sarań endi aı-jaıǵa qaramaıdy. Sarańdyǵy  "At, at" - dep qystaıdy da, atyp jiberedi. Sol kezde alma aǵashynyń túbine sylq etip óziniń ákesi qulap túsedi. Al aq kógershin sharyqtap ushyp ketedi. Bireýdi-bireý óltiretin sumdyq oqıǵa jer betinde tuńǵysh ret osylaı bastalǵan eken deıdi.

Qart ákeniń qany alma aǵashynyń appaq gúline shashyraıdy. Sodan beri alma aǵashy aq túspen gúldemeı qyzǵylttanyp gúldeıdi eken. Al aq kógershin sodan beri eshýaqytta aǵashqa qonaqtamaıtyn bolypty. Kógershin kóziniń qyzyl bolýynyń sebebi de jerge tamǵan adam qanyn kórýmen eken deıdi.

---