InfoHub Logo

Aqyn jergilikti jerdegi bastyqtyń úıinde otyrdy. Bastyqtyń áıeli aqynǵa shaı quıǵaly jatyr edi, bastyq áıeline: "Shaıyńdy qoıa tur", - dedi de, aqynǵa qarap:

- Myna balalarǵa bir-bir shýmaqtan óleń laqtyryp-laqtyryp jibershi, - dedi.

Bastyqtyń balalary kóp edi. Aqyn súıkektetip jazyp otyryp: "Esil erim-aı! Azamatym-aı! Balany da taptyrǵan eken", - dep bastyqqa ishteı razy bolyp otyrdy.

- Aǵańnyń bólmesine barshy, - dedi bastyq tulymshaǵy seltıip turǵan kishkentaı qyzyna. - Aǵańnyń bólmesindegi sýretterdiń bárin osynda alyp kel.

- Mynaý Almatyda oqyp jatqan ulymyz edi, - dedi bastyq sýretterdi aqynnyń aldyna tosa berip. - Osyǵan qarap otyryp ta bir-eki shýmaq óleńdi laqtyryp-laqtyryp jibershi.

- Osy ıt qaıda? - dedi bastyq áıeline. Sosyn aqyndy jeńinen tartty: - Júrshi!

- Áı, ıt qaıda? - dedi bastyq aýlaǵa shyǵyp alyp. - A, munda sákiniń astynda jatyr eken ǵoı. Óziń eńkeıip qarashy sákiniń astyna. Baıqa, qaýyp alyp júrmesin.

- Mysyqtaryńyz joq pa edi? - dedi aqyn.

- Mysyq deısiń be? Áı, bizdiń úıdiń mysyǵy qaıda?! A, munda shatyrdyń ústinde júr eken ǵoı. Óziń shyqshy shatyrdyń ústine. Abaıla! Myna mysyq aqyndy kóre salyp tura qashty ǵoı! Áı, qaıda kettiń?! Sekirme deımin, oıbaı! Óı, myna aqyn degen halyq ólermen halyq bolady eken ǵoı?! Mysyqtyń sekirgen jerinen sekirgeni nesi?!

Bastyq tompańdap úıdi aınalyp kelgen kezde, mysyqty qushaqtaı qulap jatqan aqyndy kórdi.

- Aý, ne istep jatyrsyń mysyqty qushaqtap?! - dedi bastyq aqynǵa.

- Endi qaıteıin-aı! - dedi aqyn entige sóılep. - Ózim jolsoqty bolyp kelip edim. Basymdy shaı da qysyp bara jatyr. "Ul" ekenin nemese "qyz" ekenin kórip alyp jatqanym ǵoı, óleńge bir keregi bola ma dep.

Aqyn sol kúni bastyqtyń úıinen shaı iship attandy.

---