InfoHub Logo

Bir kishkentaı qalanyń jalǵyz ǵana aqyny bolypty. Bir kúni sol aqyn 60-qa tolǵan kezde, sol qalanyń ákimi aqynyna syı-sıapat kórsetedi. Jyly sózderin arnaıdy. "Siz bizdiń qalamyzdyń jalǵyz aqynysyz, - deıdi ákim aqynǵa. - 60 jasyńyz qutty bolsyn! Sizge áli de tolaǵaı shyǵarmashylyq shabyttar tileımin!"

Sodan keıin birshama ýaqyt ótti. Bir kúni osy qaladan shyǵatyn gazetke aqynnyń óleńi basylyp shyǵady. Ákim álgi óleńdi oqyp otyryp, kóńili nildeı buzyldy. Oǵan aqynnyń shabyty qaıtyp qalǵan sıaqty kórindi. Dereý aqyndy ózine aldyrtty.

- Siz bizdiń qalamyzdyń jalǵyz aqynysyz, - dedi ákim aqynǵa.  - Men qalanyń halqy bir nárseden tarshylyq kórip qalmaý úshin únemi jigitterge tapsyrma berip otyramyn. Biraq bizdiń qalanyń halqyna óleń de kerek. Endeshe, men jumysty jigittermen birdeı sizden de talap etem. Nege sizdiń shabytyńyz kemip júr? Biz sizge barlyq jaǵdaıdy jasap qoıǵan joqpyz ba?

- Barlyq jaǵdaıdy jasap qoıǵanyńyz ras, - dedi aqyn ákimge. - Biraq siz aıtyp otyrǵan nárseler aqynnyń shabytyn týdyrmaıdy.

- Aqynnyń shabytyn endi ne týdyrady?

- Aqynnyń shabytyn qyz, qyzdar týdyrady. Osy kúni qyzdar degen shabyt berýdi qoıdy. Keı qyzdarymyz sheteldikterdiń betine qarap jymıatyn ádet shyǵardy. Sheteldikterdiń betine qarap jymıǵannan ne shyǵady? Byldyr-byldyr, shúldir-shúldir degen sóz shyǵady. Shabytymnyń kemip ketýine osy qyzdar kináli, - dedi aqyn.

- Men - ákimmin! - dedi ákim. - Ákim aralassa, sheshimin tappaıtyn másele degen bolmaıdy. Biz bul máseleni de qolǵa alamyz.

Sol kúni ákim jigitterin jınap aldy.

- Qalamyzda jalǵyz ǵana aqyn bar, - dedi ákim jigitterine. - Biz ol kisiniń shabytynyń ne jaǵdaıda júrgenine nazar aýdarmaıdy ekenbiz.

Jigitter kúńkildeı bastady:

- Ol kisige taǵy ne kerek bop qaldy eken? Bar jaǵdaıdy jasap qoıǵan joqpyz ba?
Endi ne deıdi ol kisi bizge?

- Sizder aıtyp otyrǵan nárselerdiń eshqaısysy aqynnyń shabytyn týdyrmaıdy eken, - dedi ákim. - Aqynnyń shabytyn tek qyz, qyzdar týdyrady eken. Sondyqtan mekeme-mekemedegi qyzdarǵa aıtyńyzdar. Eń sulý, eń ádemi, jan-dúnıesi baı, talǵam tarazysy bıik qyryq qyz iriktelip alynsyn. Sol qyryq qyz erteńnen bastap aqyndy qorshalap júretin bolsyn. Qyzmetine barǵansha, qyzmetinen qaıtqansha. Barǵansha, qaıtqansha. Qorshalap. Qaýmalap. Jelpip. Syńǵyr-syńǵyr kúlki. Ádemi jymıys. Erteńnen bastap sol qyryq qyzdyń ortasynda balpań-balpań basyp kele jatqan aqyndy kóretin bolaıyn. Aqyn ózin beıne bir gúl japqan dalamen kele jatqandaı sezinetin bolsyn.

Sol túni qaladaǵy barlyq mekemeniń shamy sónbeı turypty desedi. Mekemeniń birinshi basshy jigitteri: "Kún saıyn qyzmetke baryp, kelemin degenshe, qyryq qyzdyń qorshaýynda júretin bolsań, mynaý bir raqat dúnıe ǵoı. Ózge dúnıeniń bárin tárk ettim. Endigi ǵumyrymdy
tek aqyndyqqa arnaımyn", - dep ózderi bir-birinen jasyryp óleń jazyp otyrypty.

---