InfoHub Logo

Aqtaýda artyq maıdan arylý úshin ota jasatqan Mańǵystaý oblysy máslıhatynyń depýtaty, KazPetroDrilling kompanıasynyń óńirlik vıse-prezıdenti Erbol Aıtýov qaıtys boldy. Bul týraly Infohub.kz aqparat agenttigi habarlaıdy.

Marqum ıek astyndaǵy maıdy lıposaksıa ádisimen aldyrý úshin Aqtaýdaǵy jekemenshik «Qasıet» klınıkasyna barǵan. Operasıa 4 sáýirde jasalǵanmen, kóp uzamaı naýqastyń jaǵdaıy kúrt nasharlap, komaǵa túsken. Ókinishke oraı, bir aıdan keıin, 5 mamyrda ol kóz jumdy.

Otbasy dárigerlerdi kinálaıdy

Marqumnyń jubaıy Laýra Aıtýovanyń aıtýynsha, ota aldyndaǵy taldaýlar jetkiliksiz zerttelgen. Ol Erbol Aıtýovtyń qanyndaǵy qant mólsheri joǵary bolǵanyna qaramastan, dárigerlerdiń operasıa jasaǵanyn alǵa tartady. «Anestezıolog ıntýbasıany durys jasaı almaı, tamaǵyna zaqym keltirdi. Sonyń saldarynan kúıeýimniń qan qysymy men qandaǵy qant mólsheri kúrt kóterilip, ınsýlt aldy», – deıdi Laýra Aıtýova.

Onyń sózinshe, klınıka qyzmetkerleri bastapqyda naýqastyń aýyr jaǵdaıyn otbasyna tolyq aıtpaǵan. Keıinnen ǵana naýqas oblystyq aýrýhanaǵa jetkizilgeni belgili boldy. Aıtýova klınıkany salǵyrttyqta aıyptap, kinálilerdiń jaýapqa tartylýyn talap etip otyr.

Klınıkada zańbuzýshylyqtar anyqtaldy

Medısınalyq jáne farmasevtıkalyq baqylaý komıtetiniń Mańǵystaý oblysy boıynsha departamenti júrgizgen tekseris barysynda klınıkada birqatar zańbuzýshylyq anyqtaldy. Ota jasalatyn bólim qajetti quraldarmen tolyq jabdyqtalmaǵany, keıbir aspaptardyń merzimi ótip ketkeni jáne shuǵyl kómekke arnalǵan arnaıy qurylǵylardyń joq ekeni belgili boldy. Sondaı-aq, anestezıologıa jáne reanımatologıa qyzmetine qatysty lısenzıalyq qujattardyń da tolyq emestigi anyqtaldy.

Komıtet mamandary naýqastyń operasıa aldynda tolyq tekserýden ótpegenin rastady. Sátsiz ıntýbasıa anestezıa kezinde mıǵa otteginiń jetispeýine ákelýi múmkin degen boljam joqqa shyǵarylmaıdy. Bul derek boıynsha Ákimshilik quqyqbuzýshylyq týraly kodekstiń 464-babymen hattama toltyrylyp, tekserý materıaldary prokýratýraǵa joldanbaq.