InfoHub Logo

Aqtaý qalasynda keıbir turǵyndar qoqys shyǵarý qyzmeti úshin birden birneshe aıǵa arnalǵan tólem shottaryn aldy. Bul jaǵdaı turǵyndar arasynda túsinispeýshilik týdyrdy. Máselege qatysty «Zero Waste Aqtaý» kompanıasy túsinikteme berdi.

Bul týraly Infohub.kz aqparat agenttigi habarlaıdy.

Tólemderdi kim júzege asyrady?

«Zero Waste Aqtaý» kompanıasynyń málimetinshe, olar qala aýmaǵynda ortalyqtandyrylǵan qoqys jınaý júıesi boıynsha qoqys jınaý jáne tasymaldaý qyzmetterin zańdy túrde tek olar ǵana kórsetedi. Kompanıa 1 qańtardan bastap qyzmet kórsete bastaǵanymen, buǵan deıin «West Recycling Company», «Munaıly-Qyzmet», «Evroservıs DjO», «Atameken Tazalyq», «Sosservıs-A» jáne «Caspiy Operating Aktau» sıaqty basqa da kompanıalar turǵyndarǵa tólem shottaryn usynyp, aqshalaı qarajat qabyldap kelgen.

Qala prokýratýrasynyń tekserý sharalary kezinde qoqys tólemderi boıynsha shottardy berý ýaqytsha toqtatylǵan bolatyn. Alaıda, «Zero Waste Aqtaý» kompanıasy qoqys jınaý jáne tasymaldaý qyzmetterin tolyq kólemde kórsetýdi jalǵastyrǵan.

Turǵyndar ne isteýi kerek?

Endigi ýaqytta qoqys jınaý jáne tasymaldaý qyzmetteri úshin tólemder tek «Zero Waste Aqtaý» kompanıasynyń shotyna ǵana júrgizilýi tıis. Eger turǵyndar osy aılar ishinde basqa kompanıalarǵa qoqys shyǵarý úshin aqsha aýdarǵan bolsa, onda aqshany qaıtarý úshin tıisti kompanıalarǵa jazbasha ótinish berý qajet.

Tarıfter qandaı?

Qalalyq máslıhattyń 2022 jylǵy 4 qazandaǵy sheshimimen bekitilgen tarıf boıynsha, qoqys jınaý, tasymaldaý, suryptaý jáne kómý qyzmetterine bir turǵynǵa aıyna 450 teńge (QQS-syz) bolady. 1 qazannan bastap Qazaqstan Respýblıkasynyń salyq zańnamasyna sáıkes 16% QQS qosylǵanda, tarıf bir turǵynǵa aıyna 522 teńgege teńesedi.